បន្ទាប់ពីទទួលជោគជ័យក្នុងវគ្គបណ្តុះបណ្តាលចំនួន ៤ លើករួចមក សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា គ្រោងនឹងបើកវគ្គបណ្តុះបណ្តាលថ្មីមួយទៀតនៅថ្ងៃ ទី១ ខែតុលា ឆ្នាំ២០១៤ ខាងមុខនេះ។
លោក សួន សូលេញ នាយកប្រតិបត្តិលេខាធិការដ្ឋានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បាននិយាយថា ខណៈវិស័យសំណង់ និងអចលនវត្ថុនៅកម្ពុជា រីកចម្រើនខ្លាំងគេសង្កេតឃើញថា កម្ពុជាកំពុងជួបប្រទះនឹងកង្វះធនធានមនុស្សយ៉ាងច្រើន។ ហេតុនេះទើបសមាគមសម្រេចបើកវគ្គសិក្សាជាបន្តបន្ទាប់នេះឡើងដើម្បីឆ្លើយតបនឹងបញ្ហាកង្វះខាតទាំងនោះ។
លោក សូលេញ បានថ្លែងថា៖ «វគ្គសិក្សាទាក់ទងនឹងជំនាញអចលនវត្ថុដែលសមាគមរៀបចំពិតជាមានសារៈសំខាន់ណាស់សម្រាប់អ្នកដែលចង់យល់ដឹងពីវិស័យអចលនវត្ថុ»។ លោកបានបញ្ជាក់ថា៖ «បន្ទាប់ពីបញ្ចប់ការសិក្សា សិក្ខាកាមនឹងទទួលបាននូវចំណេះដឹងដ៏ទូលំទូលាយ ព្រោះសមាគមបានអញ្ជើញវាគ្មិនដែលមានជំនាញ និងបទពិសោធជាច្រើនឆ្នាំមកបង្រៀនក្នុងវគ្គសិក្សានេះ ព្រមទាំងមានចេញវិញ្ញាបនបត្របញ្ជាក់ការសិក្សាជូនទៀតផង»។
វគ្គថ្មីនេះមានរយៈពេល ៣ខែ និងមានមុខជំនាញចំនួន ៥ គឺ៖
១- ជំនាញភ្នាក់ងារអចលនវត្ថុ (កម្រិតបឋម)
២- ជំនាញវាយតម្លៃអចលនវត្ថុ (កម្រិតបឋម)
៣- ជំនាញវាយតម្លៃអចលនវត្ថុ (កម្រិតមធ្យម)
៤- របៀបធ្វើផែនការ និងការគ្រប់គ្រងក្រុមហ៊ុនអចលនវត្ថុ
៥- ជំនាញគ្រប់គ្រងអគារៈ វគ្គនេះសិក្សារយៈពេល ១ខែ នឹងចាប់ផ្តើមចូលសិក្សានៅ ខែមករា ឆ្នាំ២០១៥។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ចេង ខេង ធ្លាប់ប្រាប់ថា វគ្គបណ្តុះបណ្តាលខាងលើនឹងបើកទូលាយដល់សាធារណជនទាំងអស់ដែលមានបំណងចង់ទទួលបានចំណេះដឹង និងជំនាញពាក់ព័ន្ធវិស័យអចលនវត្ថុ។ លោកបញ្ជាក់ថា៖ «នៅពេលអនាគតអ្នករកស៊ីក្នុងវិស័យអចលនវត្ថុទាំងអស់ត្រូវតែឆ្លងកាត់ការបណ្តុះបណ្តាល ទើបមានសិទ្ធិទទួលបានអាជ្ញាប័ណ្ណប្រកបអាជីវកម្ម»។
វគ្គសិក្សាខាងលើមានតម្លៃចាប់ពី ២២០-៣៥០ ដុល្លារ តែសម្រាប់សាធារណជនដែលបានមកចុះឈ្មោះមុនថ្ងៃ ទី១៥ ខែកញ្ញា និងទទួលបានការបញ្ចុះតម្លៃ ១០ ភាគរយ ចំណែកសមាជិកសមាគមនឹងទទួលបាននូវការបញ្ចុះតម្លៃ ២៥ ភាគរយផងដែរ។
លោក សេង សុភ័ក្ត្រ ប្រធានគ្រប់គ្រងទូទៅក្រុមហ៊ុនអចលនទ្រព្យកម្ពុជា ស៊ីភីអិល ដែលធ្លាប់មានបទពិសោធការងារទាក់ទងនឹងវិស័យអចលនទ្រព្យរយៈពេលជាង ១០ឆ្នាំ និងធ្លាប់ទៅចូលរួមក្នុងវគ្គបណ្តុះបណ្តាលនៅក្រៅប្រទេសជាច្រើនលើកនោះបានប្រាប់ថា លោកនឹងចូលរួមធ្វើជាវាគ្មិននៅក្នុងវគ្គបណ្តុះបណ្តាលនាពេលខាងមុខ។ លោកបានថ្លែងថា ការរីកចម្រើននៃវិស័យអចលនវត្ថុ ធ្វើឲ្យកម្ពុជា ត្រូវការនូវធនធានមនុស្សដែលមានចំណេះដឹងផ្នែកនេះជាច្រើន ខណៈនៅកម្ពុជា មិនទាន់មានមហាវិទ្យាល័យណាបើកបង្រៀនមុខវិជ្ជានេះនៅឡើយទេ។
ព្រមជាមួយគ្នានេះនៅថ្ងៃ ទី២៧ ខែកញ្ញា ខាងមុខ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាក៏នឹងរៀបចំសិក្ខាសាលាមួយក្រោមប្រធានបទ «Legal Aspect of the Real Estate Industry in Cambodia» ផងដែរ ដោយមានលោកបណ្ឌិត សុក ស៊ីផាន់ណា ជាវាគ្មិន។
សម្រាប់ព័ត៌មានបន្ថែមទាក់ទងនឹងការចុះឈ្មោះចូលសិក្សាក្នុងវគ្គសិក្សា និងសិក្ខាសាលាខាងលើអាចទាក់ទងមកកាន់ទីស្នាក់ការសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលស្ថិតនៅផ្ទះលេខ ២០ បេ ផ្លូវលេខ ២៩៤ កែងផ្លូវលេខ ២១ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ឬទូរស័ព្ទលេខ ០១២ ៦៥៤ ៦៧១ និង ០១២ ៧៣១ ៧១៩៕
Source : Phnom Penh Post
