ភ្នំពេញៈ ដោយសារតែហេដ្ឋារចនាសម្ព័ន្ធត្រូវបានកែលម្អនិងទីតាំងងាយស្រួលសួនឧស្សាហកម្មរបស់កម្ពុជាបានក្លាយជាកន្លែងពេញនិយមជាពិសេសក្នុងចំណោមវិនិយោគិនជប៉ុន។ផ្ទុយទៅវិញសួនឧស្សាហកម្មនៅក្នុងប្រទេសមីយ៉ាន់ម៉ានៅតែប្រឈមបញ្ហាលំបាកដូចជា ការខ្វះក្របខ័ណ្ឌច្បាប់ហេដ្ឋារចនាសម្ព័ន្ធនិងអគ្គិសនី។ ប៉ុន្តែអ្នកជំនាញបានថ្លែងថាបញ្ហានេះអាចផ្លាស់ប្តូរបានដោយមីយ៉ាន់ម៉ានឹងក្លាយជាកន្លែងទាក់ទាញវិនិយោគិននិងជាគូប្រកួតប្រជែងរបស់កម្ពុជា។ លោក នង សុយ៉េតនាយកទីផ្សារនៅកំពង់ផែស្វយ័តក្រុងព្រះសីហនុផ្នែកតំបន់សេដ្ឋកិច្ចពិសេសកំពង់ផែព្រះសីហនុបាននិយាយថា៖ «សួនឧស្សាហកម្មកម្ពុជា (តំបន់សេដ្ឋកិច្ចពិសេស) មានគុណភាពខាងផ្នែកហេដ្ឋារចនាសម្ព័ន្ធដូចជាអគ្គិសនីទឹកប្រព័ន្ធបង្ហូរទឹកស្អុយ ទូរគមនាគមន៍។ល។ ល្អប្រសើរជាងហេដ្ឋារចនាសម្ព័ន្ធរបស់ប្រទេសមីយ៉ាន់ម៉ា»។ លោក Ikumo Isono សេដ្ឋវិទូនៅវិទ្យាស្ថានស្រាវជ្រាវសេដ្ឋកិច្ចអាស៊ាននិងអាស៊ីអាគ្នេយ៍(ERIA)បាននិយាយដោយសង្ខេបថាពេលនេះមិនមែនជាពេលធ្វើការប្រៀបធៀបបរិយាកាសវិនិយោគរបស់កម្ពុជា និងប្រទេសមីយ៉ាន់ម៉ាទេ។ លោកបន្តថា៖ «រហូតមកដល់ពេលនេះ មីយ៉ាន់ម៉ា អញ្ជើញ វិនិយោគិនជាច្រើនប៉ុន្តែទទួលបានអ្នកវិនិយោគពិតប្រាកដតែមួយចំនួនប៉ុណ្ណោះ។ប៉ុន្តែវាអាចផ្លាស់ប្តូរក្នុងរយៈពេល៣ទៅ៥ឆ្នាំទៀត»។ ក្របខ័ណ្ឌច្បាប់សម្រាប់សួនឧស្សាហកម្មរបស់កម្ពុជាបានបង្កើតឡើងក្នុងឆ្នាំ ២០០៥។ អនុក្រឹត្យស្ដីពីអង្គការនិងមុខងាររបស់ក្រុមប្រឹក្សាអភិវឌ្ឍន៍កម្ពុជា (CDC) បានចេញកាលពីថ្ងៃទី២៩ខែធ្នូ ឆ្នាំ២០០៥ដើម្បីធ្វើរចនាសម្ព័ន្ធCDC ឡើងវិញ និងជាស្លាបថ្មីមួយរបស់ CDCដែលគេហៅថា «ក្រុមប្រឹក្សាតំបន់សេដ្ឋកិច្ចពិសេសកម្ពុជា (CSEZB)» ត្រូវបានបង្កើតឡើងដើម្បីធ្វើការរៀបចំផែនការតំបន់សេដ្ឋកិច្ចពិសេស។ លោក Kiyotaka Doho តំណាងរបស់អង្គការជប៉ុន JETRO នៅភ្នំពេញបានឲ្យដឹងថា CDCបានចុះបញ្ជីតំបន់សេដ្ឋកិច្ចពិសេសចំនួន២៣ រួចរាល់ហើយ។ក្នុងតំបន់សេដ្ឋកិច្ចពិសេសភ្នំពេញមានវិនិយោគិនជប៉ុនច្រើន។ វិនិយោគិនជាច្រើនទៀតមកពីប្រទេសម៉ាឡេស៊ី តៃវ៉ាន់ ចិន កម្ពុជា កូរ៉េ សិង្ហបុរី តួកគី ហ្វីលីពីន ថៃ អាមេរិក និងវៀតណាម។ ការវិនិយោគជាមូលដ្ឋានផ្នែករោងចក្រនៅក្នុង SEZ ភ្នំពេញកំពុងតែកើនឡើងដែលជប៉ុនមានទឹកប្រាក់វិនិយោគប្រហែល១៤០លានដុល្លារចាប់ពីឆ្នាំ២០០៨ មក។ លំដាប់ទីពីរគឺតៃវ៉ាន់ និងថៃ មានទឹកប្រាក់ជិត ២០លានដុល្លារ។ តំបន់សេដ្ឋកិច្ចពិសេស Manhattan ក្នុងក្រុងបាវិតអ្នកវិនិយោគភាគច្រើនជាជនជាតិចិននិងតៃវ៉ាន់។ នេះបើយោងតាមលោក Ikumo Isono ។ ប្រយោជន៍របស់កម្ពុជាចាប់ផ្ដើមក្នុងកម្រិតក្របខ័ណ្ឌច្បាប់។ លោក នង សុយ៉េត បាននិយាយថា៖ «ក្នុងប្រទេសកម្ពុជាប្រព័ន្ធច្បាប់ដូចជាច្បាប់ SEZ ត្រូវបានធ្វើរួចរាល់ហើយមានសារៈសំខាន់ចំពោះវិនិយោគិនបរទេស»។ លោកបន្តទៀតថា៖ «ប្រទេសមីយ៉ាន់ម៉ាមិនទាន់មានក្រុមហ៊ុនច្បាប់ ដើម្បីរៀបចំឲ្យរៀបរយលើការវិនិយោគបរទេសជាមួយនឹងការត្រួតពិនិត្យតឹងរ៉ឹងលើការផ្ញើរូបិយប័ណ្ណបរទេសទៅក្រៅទេ។ នេះគឺជាការប្រឈមដ៏ធំបំផុតចំពោះវិនិយោគិនមុនពេលយើងពិភាក្សាពីការប្រៀបធៀបផ្នែកគុណភាពនិងប្រាក់ចំណេញពីសួនឧស្សាហកម្ម។ ពួកគេត្រូវការពេលជាច្រើនឆ្នាំទៀតដើម្បីរៀបចំការទាក់ទាញវិនិយោគិនបរទេស»។ លោក Hiroshi Uematsu នាយកគ្រប់គ្រងតំបន់សេដ្ឋកិច្ចពិសេសភ្នំពេញបាននិយាយថា កម្ពុជាត្រៀមរួចជាស្រេចហើយដើម្បីទទួលយកអ្នកវិនិយោគចំណែកឯក្របខ័ណ្ឌច្បាប់ជានីតិវិធីរបស់រដ្ឋាភិបាល។ លោកថ្លែងថា៖«ខ្ញុំយល់ថាមីយ៉ាន់ម៉ាកំពុងតែដំណើរការដើម្បីធ្វើឲ្យបរិយាកាសវិនិយោគមានសភាពប្រសើរឡើងវិញ។ ទោះបីជាយ៉ាងណាក៏ដោយខ្ញុំសង្ឃឹមថា មីយ៉ាន់ម៉ានឹងធ្វើការកែលម្អបរិយាកាសវិនិយោគនេះក្នុងពេលឆាប់ៗនេះឬពេលណាមួយក្នុងឆ្នាំនេះ»។ លោក Hiroshi Suzuki នាយកប្រតិបត្តិនិងប្រធានសេដ្ឋវិទូនៅឯវិទ្យាស្ថានស្រាវជ្រាវពាណិជ្ជកម្មកម្ពុជាបាននិយាយថាបើប្រៀបធៀបជាមួយមីយ៉ាន់ម៉ាសួនឧស្សាហកម្មកម្ពុជា មានហេដ្ឋារចនាសម្ព័ន្ធដឹកជញ្ជូនល្អប្រសើរដូចជាផ្លូវជាតិនិងផែក្រុងព្រះសីហនុ។ លោក Ikumo Isono បានឲ្យដឹងថាវិនិយោគិនជប៉ុនជាច្រើនឆ្ពោះមកអាស៊ានចូលរួមក្នុងសួនឧស្សាហកម្មដែលមាន «ស្ដង់ដារអន្តរជាតិ» ពីព្រោះពួកគេតម្រូវឲ្យមានផ្លូវដឹកជញ្ជូនល្អប្រសើរនិរន្តរភាពអគ្គិសនីនិងការផ្គត់ផ្គង់ទឹកនិងប្រព័ន្ធលូទឹក។លោកបន្តថា៖ «អ្នកគ្រប់គ្រងជប៉ុនធ្វើការងារក្នុងរោងចក្រជាច្រើនត្រូវការលក្ខខណ្ឌក្នុងការរស់នៅល្អដូចជាអាផាតមិន ភោជនីយដ្ឋានមានគុណភាពនិងលទ្ធភាពថែទាំសុខភាពកាន់តែប្រសើរ។អាស្រ័យហេតុនេះក្នុងប្រទេសកម្ពុជាមានវិនិយោគិនជប៉ុនជាច្រើនមកតំបន់សេដ្ឋកិច្ចពិសេសភ្នំពេញ»។ ទោះបីជាយ៉ាងណាក៏ដោយមីយ៉ាន់ម៉ា មិនមានអគារគ្រប់គ្រាន់ទៅតាមស្ដង់ដារអន្តរជាតិនិងទីកន្លែងគ្រប់គ្រាន់សម្រាប់ការស្នាក់នៅរបស់វិនិយោគិន។ លោកបន្តថា៖«ក្នុងប្រទេសមីយ៉ាន់ម៉ាមានអគារឧស្សាហកម្មស្ដង់ដារអន្តរជាតិតែមួយគត់ក្នុងទីក្រុងយ៉ាំងហ្គោន។ អគារឧស្សាហកម្មនេះត្រូវបានគេទិញឬធ្វើការកក់ទុកអស់ហើយ។ ទោះបីពេលនេះវិនិយោគិនជប៉ុនជាច្រើនធ្វើទស្សនកិច្ចក្នុងប្រទេសមីយ៉ាន់ម៉ាដើម្បីមើលបរិយាកាសវិនិយោគនោះក៏គ្មានអគារឧស្សាហកម្មអាចឲ្យពួកគេស្នាក់នៅបានទេ»។ លោកបន្ថែមថាក្នុងប្រទេសមីយ៉ាន់ម៉ាមានការខ្វះខាតច្រើន៖ «ទីមួយគឺកង្វះអគ្គិសនី។ ទីពីរគឺកង្វះការិយាល័យផ្ទះល្វែងនិងសណ្ឋាគារ។ ឆ្នាំនេះតម្លៃសណ្ឋាគារបានកើនឡើងបីដងហើយវាបង្អាក់ពាណិជ្ជករជប៉ុនមិនឲ្យចូលមកទីក្រុងយ៉ាំងហ្គោន។ចំនួនក្រុមហ៊ុនផ្ដល់សេវាដឹកជញ្ជូនត្រូវបានកម្រិតទូរស័ព្ទចល័តមិនស្ថិតស្ថេរ»។ លោក នង សុយ៉េត បានថ្លែងថាសួនឧស្សាហកម្មរបស់មីយ៉ាន់ម៉ា កំពុងស្ថិតក្នុងដំណាក់កាលមួយនៅក្មេងខ្ចី និងមិនទាន់ធ្វើការអភិវឌ្ឍនៅឡើយហើយមិនទាន់បានត្រៀមជាស្រេចសម្រាប់ការវិនិយោគបរទេសសម្រាប់ការបង្កើតរោងចក្រ ដើម្បីប្រតិបត្តិការឲ្យបានរលូនទេ។ លោកបានបន្តថា៖ «ក្នុងឋានៈជាប្រទេសមួយ មីយ៉ាន់ម៉ាមានប្រជាជនជាង៦០លាននាក់ដែលមានតម្លៃពលកម្មថោកជាមួយនឹងផ្ទៃដីដ៏ធំល្វឹងល្វើយសម្បូរដោយប្រភពធនធានធម្មជាតិច្រើនជាងកម្ពុជា»៕PB ឱកាសវិនិយោគក្នុងសួនឧស្សាហកម្មនៅកម្ពុជា [Resource: ភ្នំពេញប៉ុស្តិ៍]
