ភ្នំពេញ: សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាគឺជាស្ថាប័នមួយដែលបានដើរតួនាទីយ៉ាងសំខាន់ក្នុងការងារទាក់ទងនឹងវិស័យអចលនទ្រព្យនៅកម្ពុជា។លោក ចេង ខេងអគ្គនាយកក្រុមហ៊ុនអចលនទ្រព្យកម្ពុជា ស៊ីភីអិល ដែលទើបបានជាប់ជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា កាលពីថ្ងៃទី១៧ ខែធ្នូ ឆ្នាំ២០១២កន្លងមក បានចំណាយពេលដ៏មមាញឹករបស់លោកដើម្បីជួបសម្ភាសជាមួយលោក ស៊ីង ម៉េង អ្នកយកព័ត៌មានប៉ុស្តិ៍ អចលនទ្រព្យកាលពីពេលថ្មីៗនេះដើម្បីបង្ហាញពីការងាររបស់សមាគមនិងការរៀបចំយុទ្ធសាស្រ្តដើម្បីឲ្យសមាគមនេះពង្រីកសមាជិកភាពនិងពង្រឹងខ្លួនឲ្យកាន់តែខ្លាំង។ តើនៅពេលនេះសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាមានក្រុមហ៊ុនជាសមាជិកប៉ុន្មាន? នៅកម្ពុជាមានក្រុមហ៊ុនជាច្រើនបានបើកបម្រើសេវាកម្មទាក់ទងនឹងវិស័យអចលនទ្រព្យប៉ុន្តែនៅពេលនេះសមាជិករបស់សមាគមមានចំនួនត្រឹមតែ២២ប៉ុណ្ណោះដោយក្នុងនោះក្រុមហ៊ុនចំនួន២០ជាសមាជិកពេញសិទ្ធិ និងមាន២ក្រុមហ៊ុនទៀតជាសមាជិកគាំទ្រ។ សូមបញ្ជាក់ថានៅពេលនេះក៏មានក្រុមហ៊ុនបរទេសមួយចំនួនកំពុងសុំចុះឈ្មោះចូលជាសមាជិករបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាផងដែរ។ ប្រសិនបើយើងពង្រឹងខ្លួនបានល្អនោះនឹងមានក្រុមហ៊ុនជាច្រើនទៀតមកសុំចុះឈ្មោះចូលជាសមាជិកជាមិនខាន ពីព្រោះយើងអាចធ្វើការពិភាក្សារួមគ្នាដើម្បីរកប្រយោជន៍រួមសម្រាប់ក្រុមហ៊ុននីមួយៗ ក៏ដូចជាចំពោះប្រទេសជាតិទាំងមូលតែម្តង។ តើលោកមានយុទ្ធសាស្ត្របែបណាដើម្បីទាក់ទាញឲ្យក្រុមហ៊ុននានាចូលជាសមាជិកសមាគម? ក្នុងករណីនេះយើងបានធ្វើការពិភាក្សាគ្នាយ៉ាងល្អិតល្អន់ដើម្បីរកចំណុចពិសេសអាចទទួលយកបានទាំងអស់គ្នា។ក្នុងនាមយើងជាសមាគមដែលមានក្រុមហ៊ុនជាង២០និងមានបុគ្គលិកជាង៣០០នាក់បើយើងចង់និយាយទៅកាន់សារព័ត៌មាន ម្ចាស់បុរី ខុនដូ ឬអាផាតមិន ណាមួយគេរីករាយនឹងស្វាគមន៍យើង។ ជាក់ស្តែងនាពេលកន្លងមកយើងសហការជាមួយនឹងទីក្រុងរណប Camko City ថាតើយើងគួរសហការគ្នាបែបណាដើម្បីឲ្យគម្រោងនេះដំណើរការទៅមុខល្អ ហើយខាង Camko City ក៏គេរីករាយដែរ ព្រោះខាង Camko City គេមិនចាំបាច់ចំណាយពេលដើម្បីពិភាក្សាជាមួយក្រុមហ៊ុនម្តងមួយៗ។ ផ្ទុយទៅវិញបើយើងទៅជជែកជាមួយគាត់ក្នុងនាមក្រុមហ៊ុនឯកជនរបស់យើងធ្វើឲ្យគាត់មានអារម្មណ៍ពិបាកសម្រេចចិត្តបើទោះបីជាគាត់គិតថាក្រុមហ៊ុនយើងជាក្រុមហ៊ុនធំមួយក៏ដោយអ៊ីចឹងបើយើងធ្វើក្នុងនាមសមាគមយើងនឹងទទួលបានផលប្រយោជន៍ទាំងអស់គ្នា។ តើការរកទទួលទានរវាងក្រុមហ៊ុនដែលមានអាជ្ញាប័ណ្ណនិងក្រុមហ៊ុនដែលគ្មានអាជ្ញាប័ណ្ណមានការប្រកួតប្រជែងនិងមានបញ្ហាប្រឈមអ្វីខ្លះ? ធម្មតាតែងមានការប៉ះពាល់ព្រោះយើងជាក្រុមហ៊ុនដែលមានច្បាប់មានអាជ្ញាប័ណ្ណការចំណាយនឹងមានចំនួនច្រើនពាក់ព័ន្ធនឹងផ្លូវច្បាប់ប៉ុន្តែក្រុមហ៊ុនដែលគ្មានអាជ្ញាប័ណ្ណនិងច្បាប់ត្រឹមត្រូវគាត់ធ្វើអ្វីមិនខ្វល់ពីការបង់ពន្ធនោះទេ ហើយក្រុមហ៊ុនទាំងនោះតែងតែក្រឡុកទីផ្សារដែលអាចមានជះឥទ្ធិពលដល់ក្រុមហ៊ុនយើងដែលមានច្បាប់ត្រឹមត្រូវ។ នៅពេលមានបញ្ហាណាមួយកើតឡើងមនុស្សទូទៅនឹងសម្លឹងមើលក្រុមហ៊ុនទាំងអស់ក្នុងរូបភាពដូចគ្នា ដោយកន្លងមកមានអ្នកវិនិយោគមួយចំនួនចូលមកតាមរយៈក្រុមហ៊ុនដីធ្លី តែគាត់បែរជារៀបចំផែនការមិនល្អ ដែលធ្វើឲ្យប៉ះពាល់ដល់កេរ្តិ៍ឈ្មោះរបស់ក្រុមហ៊ុននិងប៉ះពាល់ដល់ទំនុកចិត្តអតិថិជនទាំងអស់តែម្តង។ ដូច្នេះអ្វីដែលយើងបានខំធ្វើនាពេលកន្លងមកដើម្បីក្លាយជាអ្នកប្រកបរបរវិជ្ជាជីវៈនិងមានក្រមសីលធម៌អាចមានផលប៉ះពាល់ខ្លះដោយសារក្រុមហ៊ុនដែលធ្វើការងារដោយគ្មានវិជ្ជាជីវៈនិងច្បាប់ទម្លាប់ត្រឹមត្រូវ។ មកដល់ពេលនេះតើសេវាកម្មក្នុងវិស័យនេះបានផ្តល់ទំនុកចិត្តដល់អតិថិជនទាំងក្នុងប្រទេស និងក្រៅប្រទេសបានកម្រិតណា? ធម្មតាការវាយតម្លៃអ្វីមួយតែងតែមានភាពខុសគ្នាដោយសារគំនិត និងយោបល់ដែលអាចធ្វើឲ្យអតិថិជនមានកង្វល់ពាក់ព័ន្ធនឹងស្តង់ដារនៃការវាយតម្លៃ ដែលពុំទាន់ឯកភាពគ្នាលើតម្លៃទីផ្សារ។ ដូច្នេះនៅក្នុងអាណត្តិនេះខ្ញុំបានរៀបចំស្តង់ដារមួយគឺក្រុមហ៊ុន អចលនទ្រព្យគួរនិយាយអ្វីក្នុងសម្លេងតែមួយបើលំអៀងគឺក្នុងកម្រិតតិចតួចនិងទទួលយកបានហើយបញ្ហានេះក្រសួងរៀបចំដែនដី នគរូបនីយកម្មនិងសំណង់ បានអនុម័តហើយៗយើងនឹងជួបប្រជុំគ្នាមុនធ្វើការសម្រេច។ តើធនធានមនុស្សក្នុងវិស័យនេះស្ថិតនៅក្នុងកម្រិតណា? តើសមាគមមានគម្រោងបែបណាដើម្បីពង្រឹងធនធានមនុស្ស? សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាជាសមាជិករបស់សមាគមអចលនទ្រព្យអាស៊ានដែលជារៀងរាល់មួយឆ្នាំម្តងយើងតែងចូលរួមប្រជុំនៅតាមបណ្តាប្រទេសផ្សេងៗក្នុងតំបន់។ តាមរយៈកិច្ចប្រជុំនេះ អាចជួយឲ្យយើងអាចទទួលបានបទពិសោធថ្មីៗជាច្រើនទាក់ទងទៅនឹងបច្ចេកទេសផ្សេងៗហើយក្នុងនាមសមាគមកាលពីឆ្នាំកន្លងមកយើងបានយកអ្នកមានបទពិសោធជាច្រើនមកជួយធ្វើការបណ្តុះបណ្តាលដោយមានការជួយជ្រោមជ្រែងពីក្រសួងរៀបចំដែនដី នគរូបនីយកម្ម និងសំណង់។ រហូតមកដល់ពេលនេះស្តង់ដារនៃការវាយតម្លៃរបស់យើងអាចប្រកួតប្រជែងជាមួយប្រទេសនានាក្នុងតំបន់អាស៊ានបានហើយខាងធនាគារក៏ទទួលស្គាល់ស្តង់ដារនៃការវាយតម្លៃរបស់យើងដែរ។ តើលោកបានរៀបចំផែនការធ្វើអ្វីខ្លះដើម្បីលើកស្ទួយវិស័យនេះ? គោលបំណងរបស់សមាគមគឺធ្វើយ៉ាងណាគ្រប់គ្រងវិស័យអចលនទ្រព្យឲ្យមានប្រសិទ្ធិភាព និងធ្វើយ៉ាងណាឲ្យក្រុមហ៊ុនដែលបម្រើសេវាកម្មផ្នែកអចលនទ្រព្យទាំងអស់មានការរួបរួមគ្នា ហើយធ្វើការជាមួយគ្នាប្រកួតប្រជែងគ្នាដោយយុត្តិធម៌ ត្រឹមត្រូវនិងសហការគ្នាព្រោះក្នុងនាមជាអ្នកប្រកបរបរនេះយើងអាចធ្វើជាដៃគូជាមួយគ្នា។ កន្លងមកមានក្រុមហ៊ុនជាច្រើនបានធ្វើការប្រកួតប្រជែងគ្នាយ៉ាងខ្លាំងក្លា ជាហេតុធ្វើឲ្យតម្លៃរបស់សមាគមធ្លាក់ចុះ។ អ៊ីចឹងហើយយើងគិតថាសមាគមមានគោលដៅមួយធ្វើការរួមគ្នាអង្គុយជជែកគ្នាធ្វើម៉េចដើម្បីយើងធ្វើអ្វីឲ្យមានប្រយោជន៍ទាំងអស់គ្នានិងជាដៃគូរបស់រាជរដ្ឋាភិបាលផងដែរ។ នៅពេលណាយើងជាក្រុមហ៊ុនមួយដែលត្រឹមត្រូវរកស៊ីតាមរបៀបវិជ្ជាជីវៈនិងមានក្រមសីលធម៌នោះ គួរតែស្ថិតក្រោមច្បាប់របស់រដ្ឋាភិបាល។ ហេតុនេះសមាគមរបស់យើងក៏ត្រូវការរាជរដ្ឋាភិបាលជួយដើម្បីឲ្យយើងរឹងដៃរឹងជើងនិងចង់ឲ្យអ្នករកស៊ីទាំងអស់ក្លាយជាសមាជិកសមាគមនិងមានអាជ្ញាប័ណ្ណត្រឹមត្រូវ។ តើសមាគមបានរួមចំណែកជួយរាជរដ្ឋាភិបាលអ្វីខ្លះនិងចង់ឲ្យមានការគាំទ្រពីរាជរដ្ឋាភិបាលយ៉ាងណា? នៅប្រទេសនីមួយៗតែងតែមានសមាគមរបស់គេ។ សមាគមគឺជាមុខមាត់របស់ប្រទេស ឧទាហរណ៍បើសមាគមអ្នកវាយតម្លៃ និងភ្នាក់ងារអចលនវត្ថុអាស៊ានគេត្រូវការប្រជុំរឿងដីធ្លីហើយប្រទេសយើងជាសមាជិករបស់សមាគមអាស៊ាននឹងគេដែរ តែមិនមានសមាគមដូចគេចូលរួមប្រជុំនោះគឺជាការខាតបង់។ ហេតុនេះយើងត្រូវពង្រឹងសមត្ថភាពរបស់យើង ព្រោះពេលយើងទៅចូលរួមប្រជុំយើងត្រូវនិយាយអ្វីជាឱកាសរបស់ប្រទេសយើងដើម្បីឲ្យគេដឹងពីចំណុចខ្លាំងរបស់យើង ហើយអាចទាក់ទាញគេឲ្យមកវិនិយោគនៅប្រទេសយើងដោយសារប្រទេសយើងមានភាពអំណោយផលសព្វបែបយ៉ាងទាំងបេតិកភណ្ឌនិងធនធានធម្មជាតិខណៈកន្លងមកដោយសារប្រទេសយើងមានសង្រ្គាម ធ្វើឲ្យប្រទេសជិតខាងឆក់យកឱកាស និងផលប្រយោជន៍យ៉ាងច្រើនពីកម្ពុជា។ កត្តាស្ថិរភាពនយោបាយល្អនិងកំណើនសេដ្ឋកិច្ចរឹងមាំបានធ្វើឲ្យមជ្ឈដ្ឋានអន្តរជាតិងាកមកចាប់អារម្មណ៍ចំពោះឱកាសវិនិយោគនៅកម្ពុជាកាន់តែកើនឡើងជាលំដាប់ស្របពេលដែលប្រទេសយើងមានធនធានធម្មជាតិសម្បូរបែបនិងមិនសូវមានគ្រោះធម្មជាតិ។ ហេតុនេះហើយទើបថ្មីៗនេះអ្នកវិនិយោគចូលមកច្រើនហើយកម្លាំងពលកម្មចាប់ផ្តើមឡើងថ្លៃដែលជាចំណុចចាប់ផ្តើមដ៏ល្អប្រសើរ ពីព្រោះបើយើងធ្វើអ្វីមួយមិនមានការព្រៀងទុកយើងអាចចាញ់គូប្រកួតប្រជែងរបស់យើង។ យើងក្រឡេកមើលទៅប្រទេសសិង្ហបុរី យើងនឹងឃើញអគារកប់ពពកគេមានរាប់រយរាប់ពាន់។ បើអ្នកវិនិយោគចង់បណ្តាក់ទុនក្នុងរង្វង់ពី១០០ទៅ២០០លានដុល្លារគេមិនចាំបាច់ពិចារណាយូរទេប៉ុន្តែនៅស្រុកយើងគេពិចារណារយៈពេលយូរមុនគេយកលុយមកដាក់វិនិយោគ ដោយសារគេត្រូវការសិក្សាប្រព័ន្ធច្បាប់របស់យើងជាមុនសិន។ប៉ុន្តែតាមរយៈការខិតខំរបស់រាជរដ្ឋាភិបាល និងខិតខំរបស់យើងទាំងអស់គ្នាអ្នកវិនិយោគបានហូរចូលមកកាន់តែច្រើន។ ការខិតខំរបស់រាជរដ្ឋាភិបាលក្នុងការបង្កើតច្បាប់វាមិនទាន់គ្រប់គ្រាន់ទេ ពោលគឺត្រូវបានការខិតខំរបស់ប្រជាពលរដ្ឋគ្រប់រូប ពីព្រោះយើងទាំងអស់គ្នាក៏ជាកោសិកាមួយរបស់សង្គមដែរ។ បើយើងមិនខិតខំហើយអាងតែរដ្ឋាភិបាលក៏មិនអាចអភិវឌ្ឍន៍ប្រទេសបានលឿនដែរព្រោះអ្នកវិនិយោគមិនមែនមករកតែរដ្ឋាភិបាលទេគេក៏មករកវិស័យឯកជនដែរ។ យើងចង់ឲ្យរដ្ឋាភិបាលពង្រឹងច្បាប់ហើយយើងរៀបចំធ្វើស្តង់ដារនៃការវាយតម្លៃក្រមសីលធ៌មវិជ្ជាជីវៈពាក់ព័ន្ធនឹងតម្លៃដីធ្លីដោយត្រូវកំណត់តម្លៃលើទីផ្សារ។ តើក្រុមហ៊ុនរបស់លោកក៏ដូចជាសមាគមបានត្រៀមខ្លួនយ៉ាងដូចម្តេចនៅពេលកម្ពុជាធ្វើសមាហរណកម្មជាមួយអាស៊ាន? ក្នុងនាមយើងសមាជិករបស់សមាគមអាស៊ាន យើងមិនចង់ឃើញប្រជាជនខ្មែរយើងចេញទៅក្រៅប្រទេសជាកម្មករគ្មានជំនាញទេ។ យើងមិនចង់ឃើញទេ យើងក៏ជាមនុស្សម្នាក់យើងក៏មានខួរក្បាលដូចគេដែរមានសមត្ថភាពដូចគេដែរអ៊ីចឹងនៅស្រុកយើងៗធ្វើជាថៅកែទៅស្រុកគេក៏យើងត្រូវធ្វើថៅកែគេដែរដូច្នេះយើងត្រូវតែខិតខំប្រឹងប្រែង។ខ្ញុំបានជួបជាមួយជនជាតិហ្វីលីពីន ច្រើនណាស់នៅស្រុកខ្មែរគេបានមកធ្វើជាប្រធានឬថ្នាក់ដឹកនាំ។ ចំណុចទាំងនេះក្នុងមានជាប្រជាពលរដ្ឋម្នាក់យើងក៏មានការព្រួយបារម្ភដែរ អ៊ីចឹងយើងធ្វើយ៉ាងម៉េចដើម្បីកុំឲ្យគេវាយតម្លៃយើងទាបពេកគឺយើងត្រូវតែខិតខំហើយរឿងអីគេធ្វើបានយើងធ្វើមិនបាន។ខ្ញុំបានមើលឃើញឯកសារមួយនិយាយអំពីការវាយតម្លៃនៅអាស៊ីដូចជា ឡាវ វៀតណាម ថៃ ម៉ាឡេស៊ី គឺប្រជាជនយើងចេះភាសាអង់គ្លេសច្រើនជាងប្រជាជនប្រទេសទាំងនោះ។ ហេតុនេះបើយើងខំប្រឹងទាំងអស់គ្នា យើងមិនចាញ់គេនោះទេ គេធ្វើបានយើងក៏ធ្វើបានដូចគេដែរ ហើយអាចល្អលើសគេទៀតផង៕
