ភ្នំពេញ: ការរស់នៅតាមខុនដូ និងអាផាតមិន គឺជាការប្រកាន់យកបែបផែនជីវិតប្រកបដោយភាពស៊ីវិល័យនៅកម្ពុជានារយៈពេលប៉ុន្មានឆ្នាំចុងក្រោយនេះខណៈដែលប្រទេសរីកចម្រើននានាលើពិភពលោកបានប្រកាន់យកការរស់នៅបែបនេះជាយូរណាស់មកហើយ។ ប៉ុន្តែអ្វីទាំងនោះមិនសំខាន់នោះទេអ្វីដែលសំខាន់គឺនៅត្រង់ថាតើអ្នករស់នៅតាមខុនដូ និងអាផាតមិនមានលក្ខណៈខុសគ្នានិងពិសេសបែបណាប៉ុណ្ណោះ។ លោក ប៉ូ អ៊ាវគង់ ប្រធានគ្រប់គ្រងទូទៅក្រុមហ៊ុន អេស៊ា រៀលអេស្ទេត លើកឡើងថាជីវិតរស់នៅតាមខុនដូមានលក្ខណៈជាជីវិតមានបែបផែនជាសាធារណៈច្រើនជាងការរស់នៅតាមអាផាតមិនដោយសារអ្នករស់នៅតាមខុនដូ ពួកគេរស់នៅក្នុងសហគមន៍មួយរួមគ្នាជាការរស់នៅបែបទាន់សម័យប៉ុន្តែវាមិនសូវមានលក្ខណៈឯកជនដូចជាការរស់នៅតាមអាផាតមិននោះទេព្រោះអ្នករស់នៅតាមខុនដូ អាចមានភ្ញៀវទៅលេងសួរសុខទុក្ខបានច្រើន និងមានសេរីភាពជាង។ ប៉ុន្តែអ្នករស់នៅតាមអាផាតមិនពួកគេរស់នៅក្នុងបរិយាកាសមានសុវត្ថិភាពល្អជាងដោយសារសន្តិសុខត្រូវបានធានា។ ពេលចេញចូលតែងមានប្រព័ន្ធសុវត្ថិភាពត្រួតពិនិត្យច្បាស់លាស់ប៉ុន្តែទោះបីជាយ៉ាងណាគុណភាពនៃការរស់នៅតាមអាផាតមិន មិនសូវមានភាពស៊ីវិល័យដូចរស់នៅតាមខុនដូនោះទេ។ ខុនដូសំដៅអគារដែលគេសង់សម្រាប់លក់ប៉ុន្តែអាផាតមិនសំដៅអគារដែលគេសង់ឡើងសម្រាប់ទុកជួល។ ប្រធានគ្រប់គ្រងទូទៅក្រុមហ៊ុន អេស៊ា រៀលអេស្ទេត ខាងលើបានអះអាងថា៖«ការរស់នៅតាមខុនដូគឺជីវិតមានភាពស៊ីវិល័យច្រើនព្រោះនៅតាមខុនដូគេបំពាក់សម្ភារការរៀបចំតុបតែងប្រណីតជាងអាផាតមិន និងមានហាងទំនិញឬហាងនៅជាមួយកន្លែងពួកគេស្នាក់នៅតែម្តងដើម្បីជួយសម្រួលដល់ការរស់នៅឲ្យកាន់តែមានផាសុកភាព»។ លោកបានបន្តថា៖«ទោះយ៉ាងណានៅពេលនេះមានម្ចាស់អាផាតមិន មួយចំនួនបានធ្វើការអភិវឌ្ឍសេវាកម្មរបស់ពួកគេកាន់តែទំនើបនិងប្រសើរឡើងដើម្បីប្រកួតប្រជែងជាមួយខុនដូ»។ លោក សន សៀប នាយកគ្រប់គ្រងក្រុមហ៊ុន ឃី រៀលអេស្ទេត បានប្រាប់ថា បើនិយាយពីខុនដូ និងអាផាតមិន គឺមិនមានភាពខុសគ្នានោះទេប៉ុន្តែអ្នករស់នៅអាផាតមិនភាគច្រើនជាអ្នកមានជីវភាពលំដាប់មធ្យម តែអ្នករស់នៅខុនដូភាគច្រើនជាអ្នកមានកម្រិតជីវភាពខ្ពស់ព្រោះខុនដូមានភាពទំនើបជាង ដោយគេរៀបចំឌីសាញឡើងដោយមានអាងហែលទឹកកន្លែងហាត់ប្រាណនៅក្នុងអគារនោះនិងមានសេវាកម្មជាច្រើនទៀត។ លោក នួន រិទ្ធី នាយកគ្រប់គ្រងទូទៅនៃក្រុមហ៊ុន ប៊ុណ្ណា រៀលធីគ្រុប មានយល់ឃើញស្រដៀងនឹងការលើកឡើងខាងលើដោយលោកបាននិយាយថា ដោយសារខុនដូគេធ្វើសម្រាប់លក់ជាហេតុធ្វើឲ្យគេរើសទីតាំងសម្រាប់សាងសង់និងការរៀបចំរចនា និងបំពាក់សម្ភារប្រណីតៗប៉ុន្តែអាផាតមិនគេធ្វើឡើងតាមលទ្ធភាពទឹកប្រាក់ដែលពួកគេមាន។ លោក បានបញ្ជាក់ថា៖«អ្នកវិនិយោគលើខុនដូ គឺធ្វើរួចត្រូវលក់ឲ្យអស់ហេតុនេះទើបគេត្រូវការទីតាំងល្អការរចនានិងរៀបចំសោភណភាពឲ្យបានប្រណីត ចំណែកអាផាតមិនធ្វើឡើងគឺសម្រាប់ជួលប៉ុណ្ណោះ ហេតុនេះទើបពួកគេធ្វើតាមធនធានដែលមាន»។ លោកបានបន្តថា រហូតមកដល់ពេលនេះខុនដូ និងអាផាតមិន មានអត្រាលក់ចេញនិងជួលក្នុងរង្វង់ពី៦០ទៅ៧០ភាគរយប៉ុណ្ណោះ។ តែទោះបីជាយ៉ាងណាចំនួននៃការផ្គត់ផ្គង់នៅពេលនេះនៅមិនអាចបំពេញតាមតម្រូវការពេលកម្ពុជាធ្វើសមាហរណកម្មសេដ្ឋកិច្ចអាស៊ាននៅឆ្នាំ២០១៥នោះទេ។ ទាក់ទងជាមួយការវិនិយោគលើអគារខុនដូ និងអាផាតមិន លោក នួន រិទ្ធី បានថ្លែងថា៖«បើគេចាប់ផ្តើមវិនិយោគនាពេលនេះប្រៀបបានដូចដាំបាយទុក ពេលឃ្លានគេអាចដួសញ៉ាំបានភ្លាមៗ ប៉ុន្តែបើរង់ចាំនៅពេលឃ្លានទើបរៀបចំដាំនោះវាហួសពេលរួចទៅហើយ»៕ Source : Phnom Penh Post
