ខណៈពេលក្រុមហ៊ុនជាច្រើនបិទទ្វារបន្ទាប់ពីពួកគេបានជួបវិបត្តិតហិរញ្ញវត្ថុសកលកាលពីអំឡុងពាក់កណ្តាលឆ្នាំ២០០៨ លោក ឌឹត ចណ្ណា បែរជាសម្រេចចិត្តបើកក្រុមហ៊ុនអចលនទ្រព្យមួយដែលមានឈ្មោះថា វីអឹមស៊ី ទៅវិញ។លោក ចណ្ណា សម្រេចចិត្តបង្កើតក្រុមហ៊ុននៅដំណាក់កាលនោះព្រោះតែលោកគិតថា កាលៈទេសៈនោះជាឱកាសដ៏ល្អសម្រាប់លោក ក្នុងការចាប់ផ្តើមអាជីវកម្មនិងត្រៀមខ្លួនដើម្បីទទួលយកនូវផលប្រយោជន៍នៅពេលវិស័យអចលនទ្រព្យស្ទុះងើបឡើងវិញ។ដើម្បីចង់ដឹងលម្អិតអំពីបញ្ហានេះក៏ដូចជាបញ្ហានានាពាក់ព័ន្ធជាមួយវិស័យអចលនទ្រព្យនៅកម្ពុជានាពេលបច្ចុប្បន្ននិងអនាគត លោក ស៊ីវ ម៉េង អ្នកយកព័ត៌មាន ប៉ុស្តិ៍ អចលនទ្រព្យ បានជួបសម្ភាសពិស្តារជាមួយលោក ឌឹត ចណ្ណា ដើម្បីនិយាយអំពីដំណើរវិវត្តន៍វិស័យអចលនទ្រព្យនៅកម្ពុជា។ ហេតុអ្វីលោកបើកក្រុមហ៊ុនអចលនទ្រព្យនៅពេលវិស័យនេះកំពុងមានវិបត្តិ? ការដែលខ្ញុំបើកក្រុមហ៊ុននៅអំឡុងពេលនោះព្រោះខ្ញុំមើលឃើញថា ទីផ្សារអចលនទ្រព្យនឹងមានសន្ទុះងើបឡើងវិញដោយសារមូលហេតុមួយចំនួនដូចជាទី១ ទីផ្សារតម្លៃអចលនទ្រព្យនៅកម្ពុជានៅតែមានតម្លៃទាបបើប្រៀបធៀបជាមួយប្រទេសក្នុងតំបន់។ ហេតុនេះឱកាសឡើងថ្លៃនៅតែមានជាបន្តទៀត ទី២ដោយសារបទពិសោធនៅប្រទេសមួយចំនួនដែលតម្លៃវិស័យអចលនទ្រព្យធ្លាក់ចុះ នោះវានឹងឡើងថ្លៃម្តងទៀតដូចជានៅទីក្រុងហុងកុងជាដើមដែលពេលនោះក្រុមហ៊ុនជាច្រើនបានបិទទ្វារតែក៏មានក្រុមហ៊ុនមួយចំនួនបានបង្កើតឡើងនៅអំឡុងពេលនោះដែរដោយសារគេមើលឃើញឱកាសងើបឡើងវិញ។ តើក្រុមហ៊ុនក្នុងស្រុកប្រឈមបញ្ហាអ្វីខ្លះនៅពេលមានក្រុមហ៊ុនបរទេសកាន់តែច្រើន? ក្រុមហ៊ុនដែលធ្លាប់បិទមួយចំនួនកន្លងមក នៅពេលនេះបានបើកឡើងវិញហើយខណៈក្រុមហ៊ុនខ្លះដែលនៅពេលនោះបានបន្ថយសកម្មភាពនោះក៏ចាប់ផ្តើមពង្រីកសកម្មភាពរបស់ខ្លួនឡើងវិញដែរ។ ឥឡូវនេះមានក្រុមហ៊ុនបរទេសជាច្រើនបានចាប់អារម្មណ៍ក្នុងការវិនិយោគនៅកម្ពុជាដោយពីមុនមានតែក្រុមហ៊ុនមកពីប្រទេសកូរ៉េខាងត្បូងប៉ុណ្ណោះ ប៉ុន្តែពេលនេះក៏មានក្រុមហ៊ុនមកពីប្រទេសជប៉ុនជាច្រើនផងដែរដែលចូលមកបណ្តាក់ទុននៅកម្ពុជា។ ទាក់ទងនឹងការប្រកួតប្រជែងរវាងក្រុមហ៊ុនក្នុងស្រុកនិងក្រុមហ៊ុនបរទេសនោះខ្ញុំយល់ឃើញថា ក្រុមហ៊ុនណាដែលមានជំនាញនិងការតាំងចិត្តច្បាស់លាស់ក្រុមហ៊ុននោះនឹងមានឱកាសច្រើន។ តែទោះបើជាយ៉ាងណាបើប្រៀបធៀបរវាងក្រុមហ៊ុនក្នុងស្រុកនិងក្រុមហ៊ុនបរទេសនោះ គឺក្រុមហ៊ុនមកពីបរទេសគេមានបច្ចេកវិទ្យាល្អ ប៉ុន្តែក្រុមហ៊ុនក្នុងស្រុកមានចំណេះដឹងទាក់ទងនឹងភូមិសាស្រ្តច្រើនជាងគេដែរ។ តើសេវាកម្មវាយតម្លៃវិស័យអចលនទ្រព្យរបស់ក្រុមហ៊ុនក្នុងស្រុកបានផ្តល់ទំនុកចិត្តនិងមានគុណភាពក្នុងកម្រិតណាដែរបើប្រៀបធៀបជាមួយបណ្តាប្រទេសនានានៅក្នុងតំបន់? រយៈពេលប៉ុន្មានឆ្នាំចុងក្រោយនេះសមត្ថភាពរបស់យើងមិនចាញ់បណ្តាប្រទេសក្នុងតំបន់ទេ បើទោះបីជាយើងនៅមិនទាន់មានពេញលក្ខណៈទាំងអស់ក៏ដោយ តែយើងស្ថិតនៅក្នុងកម្រិតមួយអាចទទួលយកបានហើយព្រោះរយៈពេលកន្លងមកនេះយើងបានអញ្ជើញគ្រូមកពីបរទេសមកជួយបណ្តុះបណ្តាលក៏ដូចជាបញ្ជូនបុគ្គលិករបស់យើងចេញទៅបណ្តុះបណ្តាលនៅបរទេសផងដែរ។ ទន្ទឹមនឹងដំណើរការអាជីវកម្មក្នុងវិស័យនេះតើលោកមើលឃើញបញ្ហាប្រឈមអ្វីខ្លះនៅចំពោះមុខ? ការធ្វើការងារជាមួយស្ថាប័នរាជរដ្ឋាភិបាលគឺមិនមានបញ្ហាប្រឈមអ្វីច្រើននោះទេគឺរដ្ឋាភិបាលបានលើកទឹកចិត្តយើងច្រើនប៉ុន្តែបញ្ហាប្រឈមដែលយើងកំពុងជួបប្រទះគឺការប្រកួតប្រជែងមិនមានតម្លាភាពគ្នាដោយសារក្រុមហ៊ុនមួយចំនួនបើកធ្វើអាជីវកម្មមិនមានច្បាប់អនុញ្ញាតត្រឹមត្រូវ។ ក្រុមហ៊ុនមានច្បាប់ធ្វើអ្វីតាមច្បាប់ដូចជាត្រូវមានអាជ្ញាប័ណ្ណនិងកាតព្វកិច្ចបង់ពន្ធជាដើម ខណៈក្រុមហ៊ុនមិនមានច្បាប់ត្រឹមត្រូវតែងតែធ្វើអ្វីមិនគោរពច្បាប់ ដែលនាំឲ្យប៉ះពាល់ដល់ក្រុមហ៊ុនដែលមានច្បាប់ត្រឹមត្រូវ។ បញ្ហាប្រឈមមួយទៀតគឺមានធនាគារមួយចំនួនមិនទទួលយកសេវាកម្មវាយតម្លៃរបស់ក្រុមហ៊ុនឯករាជ្យទេដោយគេប្រើប្រាស់តែសេវាកម្មវាយតម្លៃផ្ទៃក្នុងតែប៉ុណ្ណោះ។ ហេតុនេះរដ្ឋាភិបាលគួរលើកទឹកចិត្តដល់ក្រុមហ៊ុនឯករាជ្យ ព្រោះក្រុមហ៊ុនរបស់យើងជាក្រុមហ៊ុនស្របច្បាប់មានអាជ្ញាប័ណ្ណត្រឹមត្រូវតែបើខាងណាក៏អាចធ្វើបានដោយខ្លួនឯងនោះនឹងធ្វើឲ្យប៉ះពាល់ក្រុមហ៊ុនឯករាជ្យនិងធ្វើឲ្យអតិថិជនបាត់បង់ជំនឿចិត្ត។ រហូតមកដល់ពេលនេះតើប្រជាជនកម្ពុជាមានការយល់ដឹងច្រើនជាងមុនដែរឬទេទាក់ទងនឹងវិស័យអចលនទ្រព្យ? បើប្រៀបធៀបទៅនឹងឆ្នាំ២០០៦-២០០៧កន្លងមកយើងមើលឃើញថានៅពេលនេះប្រជាជនកម្ពុជាមានការយល់ដឹងច្រើនទាក់ទងវិស័យអចលនទ្រព្យពេលទីផ្សារអចលនទ្រព្យឡើងថ្លៃខ្ពស់គាត់ចេះតែទារនិងបំប៉ោងតម្លៃ ប៉ុន្តែពេលនេះនៅពេលពួកគាត់ដាក់តម្លៃពួកគាត់មានការថ្លឹងថ្លែងជាងមុន។ តើលោកត្រៀមខ្លួនដូចម្តេចនៅពេលឆ្នាំ២០១៥មកដល់និងត្រៀមខ្លួនប្រកួតប្រជែងយ៉ាងដូចម្តេចនៅពេលអាស៊ានធ្វើសមាហរណកម្មជាមួយគ្នា? តាមពិតទៅខ្ញុំមានការយកចិត្តទុកដាក់មែនទែនចំពោះបញ្ហានេះព្រោះនៅពេលទីផ្សារតំបន់នេះកាន់តែទូលំទូលាយយើងពិតជាមានការប្រកួតប្រជែងកាន់តែខ្លាំងជាមួយប្រទេសជិតខាង។ ប្រទេសមួយចំនួនគេមានធនធានមនុស្សដែលមានជំនាញជាងយើង ហេតុនេះយើងត្រូវពង្រឹងសមត្ថភាពបុគ្គលិករបស់យើងឲ្យមានសមត្ថភាពប្រហាក់ប្រហែលគេដើម្បីកុំឲ្យអ្នកមកពីក្រៅមកដណ្តើមការងារ និងកាន់កាប់ទីផ្សាររបស់យើង។ តើលោកគិតថា វិស័យអចលនទ្រព្យនឹងស្ទុះងើបខ្លាំងដែរ ឬទេ នាឆ្នាំ២០១៥ខាងមុខ? ខ្ញុំគិតថានៅពេលយើងបើកទីផ្សារកាន់តែទូលាយវិស័យអចលនទ្រព្យរបស់យើងនឹងមានភាពកាន់តែល្អប្រសើរព្រោះឱកាសវិនិយោគនៅកម្ពុជាមានច្រើនណាស់ទាំងធនធានធម្មជាតិ កសិកម្ម ឧស្សាហកម្ម ដោយនៅពេលនេះយើងមិនទាន់មានក្រុមហ៊ុនច្រើននោះទេ ហេតុនេះឱកាសធ្វើការវិនិយោគនៅកម្ពុជានៅមានច្រើនណាស់។ តើលោកមានទស្សនៈវិស័យបែបណាដែរចំពោះការវិវត្តនៃវិស័យអចលនទ្រព្យនៅកម្ពុជា? ចលនាទិញនិងលក់ ក្នុងវិស័យអចលនទ្រព្យនៅតាមបណ្តាខេត្តមានសក្តានុពលធំៗកំពុងមានសកម្មភាពកើនឡើង ជាលំដាប់ ប៉ុន្តែតម្លៃមិនទាន់កើនឡើងនោះទេ ហើយឆ្នាំ២០១៣នេះក៏មិនទាន់មានសភាពល្អប្រសើរខ្លាំងនៅឡើយដែរបើទោះបីជាមានសកម្មភាពច្រើនជាងឆ្នាំមុនក៏ដោយ។ សម្រាប់ទស្សនរបស់ខ្ញុំ គឺអ្នកធ្លាប់ទិញដីធំៗនៅមុនពេលមានវិបត្តិពេលនេះគួរតែសប្បាយចិត្តចំពោះសមិទ្ធផលដែលពួកគាត់បានទិញកន្លងមកបើទោះបីជាពេលនេះតម្លៃដីធ្លីនៅមិនទាន់ឡើងថ្លៃនៅតំបន់ជាយៗក្រុងក៏ដោយតែវានឹងកម្រើកឡើងនៅពេលឆាប់ៗខាងមុខនេះ។ ចំណែកឯអ្នកមានទុនធំៗដែលគិតមិនទាន់ដឹងថាតើពួកគេគួរធ្វើអ្វីនោះក៏គួរតែវិនិយោគក្នុងវិស័យនេះឬធ្វើឃ្លាំងនៅតំបន់មានរោងចក្រច្រើនពីព្រោះពេលនេះតម្រូវការឃ្លាំងមានការកើនឡើងជាលំដាប់៕
