អគារខ្ពស់ៗបង្ហាញពីការរីកចម្រើនផ្នែកសេដ្ឋកិច្ចនៅកម្ពុជា

ភ្នំពេញ: រយៈពេល៥ឆ្នាំចុងក្រោយនេះចំនួនអគារខ្ពស់ៗកប់ពពកបានរះឡើងយ៉ាងព្រោងព្រាតនៅក្នុងរាជធានីភ្នំពេញដែលនេះជាសារមួយបង្ហាញថាកម្ពុជាកំពុងធ្វើដំណើរឆ្ពោះទៅរកការរីកចម្រើនទាំងផ្នែកសេដ្ឋកិច្ចនិងសង្គម។

លោក ចេង ខេង អគ្គនាយកក្រុមហ៊ុនអចលនទ្រព្យកម្ពុជា ស៊ីភីអិល បានប្រាប់ថា ជាធម្មតាប្រទេសកំពុងអភិវឌ្ឍន៍គេសង់អគារខ្ពស់តាមចំណង់ចំណូលចិត្តរបស់អតិថិជនដែលគេចង់បានប៉ុន្តែការមានអគារខ្ពស់ៗក៏មានអវិជ្ជមានផងដែរ។ ផលអវិជ្ជមាននៅត្រង់ថា បើអ្នកវិនិយោគចំណាយទុនច្រើនយកមកវិនិយោគលើវិស័យនេះតើពួកគេអាចយកប្រាក់ត្រឡប់ទៅវិញបានដែរឬទេព្រោះកម្ពុជានៅសល់ដីទំនេរច្រើន នេះគឺជាហេតុផលមួយដែលអ្នកវិនិយោគតែងតែពិចារណា។

លោកបានបន្តថា ទោះបីយ៉ាងណាការមានអគារខ្ពស់ៗច្រើន គឺមានផលវិជ្ជមានច្រើនជាងផលអវិជ្ជមានព្រោះប្រជាជនដែលមានធនធានពួកគេចង់រស់នៅក្នុងសង្គមបែបស៊ីវិល័យនិងមានផាសុកភាពហើយការរស់នៅតាមខុនដូ ឬអាផាតមិនខ្ពស់ៗគឺជាការរស់នៅបែបទាន់សម័យ មានសុវត្ថិភាព និងអនាម័យទៀតផង។

លោកបានអះអាងថា៖ «ការមានអគារខ្ពស់ៗជាការជួយលើកមុខមាត់ប្រទេសជាតិ ព្រោះប្រទេសណាក៏ដោយតែងតែចង់បង្ហាញភាពអស្ចារ្យភាពស៊ីវិល័យពីប្រទេសរបស់ខ្លួនដែរ»។ លោកបានបន្ថែមថា៖«ការមានអគារខ្ពស់ៗនៅក្នុងប្រទេសក៏ជាការបង្ហាញពីស្ថិរភាពនយោបាយនិងសេដ្ឋកិច្ចរបស់ប្រទេសផងដែរ»។

យោងតាមរបាយការណ៍របស់អាជ្ញាធររាជធានីភ្នំពេញបានឲ្យដឹង កាលពីពេលថ្មីៗនេះថានៅក្នុងឆ្នាំ២០១២កន្លងមកនៅរាជធានីភ្នំពេញមានអគារខ្ពស់ៗកប់ពពកចំនួន៧២កន្លែង ក្នុងចំណោមនោះអគារដែលមានកម្ពស់ចាប់ពី១០ដល់១៩ជាន់មានចំនួន៦៣ កន្លែងអគារកម្ពស់២០ដល់២៩ជាន់មាន៣កន្លែងអគារកម្ពស់៣០ដល់៣៩ជាន់មាន៥កន្លែងនិងអគារកម្ពស់៤០ជាន់មាន១កន្លែង។

បើយោងតាមល្បឿននៃការអភិវឌ្ឍចុងក្រោយនេះនិងស្ថិតិដែលភ្នំពេញ ប៉ុស្តិ៍ ធ្លាប់បានរាយការណ៍កន្លងមកបង្ហាញថាចំនួនអគារខ្ពស់ៗជាច្រើន ទៀតនឹងបញ្ចប់ការសាងសង់នៅអំឡុងឆ្នាំ២០១៥ និងឆ្នាំ២០១៧ខាងមុខដូចជាអគារខ្ពស់កប់ពពករបស់គម្រោង Riviera ក្នុងទីក្រុងកោះពេជ្រអគារខ្ពស់កប់ពពកក្នុងទីក្រុង Olympia City អគារខុនដូរបស់គម្រោងខុនដូ Bali Scenery ជាដើម។

លោក សន សៀប នាយកគ្រប់គ្រងទូទៅនៃក្រុមហ៊ុន ឃី រៀលអេស្ទេត បាននិយាយថាការមានអគារខ្ពស់ៗកប់ពពកមានទាំងផលវិជ្ជមាននិងអវិជ្ជមាន។ ផលវិជ្ជមានត្រង់ថាបង្ហាញអំពីមុខមាត់និងការរីកចម្រើនវិស័យសេដ្ឋកិច្ច។ លោកបានបន្តថាកាលពី១០ឆ្នាំមុនពេលយើងចុះពីលើយន្តហោះយើងឃើញអគារនៅប្រទេសយើងទាបៗនឹងដីប៉ុន្តែនៅស្រុកគេមានអគារខ្ពស់ៗព្រោងព្រាតដែលនេះបង្ហាញពីការវិវត្តល្អរបស់ប្រទេសនិងសេដ្ឋកិច្ចរបស់ប្រទេសមានការរីកចម្រើន។

លោកបន្តថាចំណែកផលអវិជ្ជមាននៅត្រង់ថាប្រទេសយើងស្ថិតក្នុងចំណោមប្រទេសកំពុងអភិវឌ្ឍន៍ដូច្នេះមានការខ្វះខាតទាំងចំណេះដឹង និងបទពិសោធ ទាក់ទងនឹងការសង់អគារធំៗខ្ពស់ៗដោយនៅមិនមានចំណតយានយន្តត្រឹមត្រូវឬមានមិនស្របតាមស្តង់ដារ។ លោកបានបន្តថា ពេលមានពិធីធំៗនៅតាមអគារទាំងនោះម្តងៗ ភ្ញៀវត្រូវចតរថយន្តលើចិញ្ចើមផ្លូវដែលធ្វើឲ្យស្ទះចរាចរណ៍។ បច្ចុប្បន្នយើងនៅមានការខ្វះខាតការគ្រប់គ្រងដីធ្លីដែលធ្វើឲ្យប្លង់សាងសង់នៅមិនទាន់រៀបរយបានល្អ ចំណែកការសង់អគារនៅមិនរត់តាមជួរច្បាស់លាស់ទេ។

លោកបានអះអាងថា៖«រាជរដ្ឋាភិបាលគួររឹតបន្តឹងការអនុវត្តច្បាប់ដើម្បីសោភណភាពទីក្រុងក៏ដូចជាធ្វើឲ្យការសង់អគារខ្ពស់ៗមានសណ្តាប់ធ្នាប់ប៉ុន្តែយើងរំពឹងថា បន្ទាប់ពីក្រសួងរៀបចំដែនដី នគរូបនីយកម្មនិងសំណង់រៀបចំគណៈកម្មាធិការប្រើប្រាស់ដីធ្លីរួចនឹងធ្វើឲ្យការប្រើប្រាស់ដីធ្លីនៅរាជធានីភ្នំពេញ មានភាពប្រសើរ។

លោកបន្តថា៖«ការរៀបចំប្លង់អភិវឌ្ឍន៍និងការគ្រប់គ្រងដីធ្លីនៅក្រុងបាវិតសៀមរាប និងក្រុងព្រះសីហនុ មានភាពល្អប្រសើរ។ តំបន់ទាំងនេះរៀបចំបានល្អនិងគួរយកធ្វើជាគំរូនៅកន្លែងដទៃទៀត»។

លោកស្រីអគ្គនាយកក្រុមហ៊ុន តុសិត រៀលធី ខូអិលធីឌីដែលសុំមិនឲ្យបញ្ចេញឈ្មោះបានប្រាប់ថាអគារខុនដូ អាផាតមិនខ្ពស់ៗមានភាពអំណោយផលដល់ការរស់នៅពិសេសជនបរទេសពួកគេចូលចិត្តដោយសារបរិយាកាសរស់នៅល្អមានសន្តិសុខ សុវត្ថិភាពខ្ពស់ហើយបើពួកគេទៅលេងស្រុកកំណើតរយៈពេលបួនប្រាំខែក៏មិនមានព្រួយបារម្ភពីការថែទាំដែរ ព្រោះមានអ្នកថែទាំជាប្រចាំនៅតាមខុនដូ និងអាផាតមិនទាំងនោះ។

លោកស្រីបានថ្លែងថា៖«ការមានអគារខ្ពស់នៅកម្ពុជាវាជួយលើកស្ទួយមុខមាត់ប្រទេសជាតិហើយពេលឃើញអគារខ្ពស់ៗខ្ញុំសប្បាយរីករាយនិងមានមោទនភាពព្រោះជាការបង្ហាញពីការរីកចម្រើនរបស់ប្រទេសរបស់យើង»។ លោកស្រីបានបន្តថា៖«នេះមកពីស្រុកយើងមានសន្តិភាព និងស្ថិរភាពនយោបាយល្អទើបវិនិយោគិនធំៗសម្រេចមកបោះទុនរាប់លានដុល្លារសាងសង់អគារទាំងនោះព្រោះបើគ្មានសន្តិភាពទេគេមិនយកលុយគេមកបោះចោលឡើយ។

ប្រភពដដែលបានបន្តថាយើងបានរៀនសូត្រនិងយកបទពិសោធពីគេច្រើនទើបអគារយើងធ្វើបានល្អដូចជាទីក្រុងរណប ខេមកូស៊ីធី គេរៀបចំបានល្អទាំងប្រព័ន្ធទឹកភ្លើង ប្រព័ន្ធលូគឺធ្វើយ៉ាងណាមិនឲ្យលិចទឹកនោះទេ។ បុរីដែលសង់ថ្មីៗក៏មិនលិចទឹកដែរ ដោយសារពួកគេទទួលបានចំណេះដឹងថ្មីៗកាន់តែប្រសើរទើបធ្វើឲ្យបុរី របស់ពួកគេមិនលិចទឹក។

លោក ចេង ខេង បានបន្តថាទោះបីជាយ៉ាងណាការសាងសង់អគារខ្ពស់ៗក៏ត្រូវគិតគូរទៅលើទីតាំងនិងធនធានផងដែរព្រោះបើគេសង់លក់មួយម៉ែត្រការ៉េតម្លៃ២០០០ដុល្លារគេមិនអាចសង់ខុនដូនៅតំបន់ទួលគោក ឬតំបន់ទួលសង្កែបាននោះទេ។ហេតុនេះហើយអ្នកសង់មិនមែនចេះតែសង់ទីកន្លែងណាតាមចិត្តនឹកឃើញនោះទេ។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញមិនអាចទាក់ទងសុំការអត្ថាធិប្បាយបានទេ៕

Source : www.postkhmer.com

អគារខ្ពស់ៗបង្ហាញពីការរីកចម្រើនផ្នែកសេដ្ឋកិច្ចនៅកម្ពុជា

20 March, 2013

1.5K

អគារ​ខ្ពស់ៗ​បង្ហាញ​ពី​ការ​រីក​ចម្រើន​ផ្នែក​សេដ្ឋកិច្ច​នៅ​​កម្ពុជា

20 March, 2013

1.5K

អគារខ្ពស់ៗបង្ហាញពីការរីកចម្រើនផ្នែកសេដ្ឋកិច្ចនៅកម្ពុជា