ភ្នំពេញ: បើទោះបីជានៅក្នុងឆ្នាំ២០១២កន្លងមកមានភ្ញៀវទេសចរជាច្រើនបានចូលមកទស្សនានៅកម្ពុជានិងបានធ្វើដំណើរទៅកម្សាន្តនៅទីក្រុងព្រះសីហនុក៏ដោយក៏គេសង្កេតឃើញថា តម្លៃដីធ្លីនៅទីនោះមិនបានកើនឡើងច្រើននោះទេពោលគឺកើនឡើងក្នុងរង្វង់ពី៥ទៅ១០ភាគរយតែប៉ុណ្ណោះនាដើមឆ្នាំ២០១៣នេះ។ លោក ចេង ខេង អគ្គនាយកក្រុមហ៊ុនអចលនទ្រព្យកម្ពុជា ស៊ីភីអិល និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងថា មានចលនាទិញ លក់ដីធ្លីច្រើននៅក្នុងខេត្តព្រះសីហនុនាដើមឆ្នាំ២០១៣នេះ ដោយសារតំបន់នេះមានភ្ញៀវទេសចរកើនឡើងជាបន្តបន្ទាប់។ តម្លៃដីធ្លីនៅក្នុងខេត្តព្រះសីហនុបានកើនឡើងចន្លោះពី៥ទៅ១០ភាគរយនៅក្នុងឆ្នាំនេះ ប៉ុន្តែតម្លៃដីបានកើនឡើងនៅតាមតំបន់ដោយតំបន់ខ្លះបានកើនឡើងច្រើន និងតំបន់ខ្លះទៀតកើនឡើងតិចតួច។ លោកបានអះអាងថា៖«ខ្ញុំទើបបានបើកសាខាក្រុមហ៊ុនរបស់ខ្ញុំនៅខេត្តព្រះសីហនុកាលពីពេលថ្មីៗនេះដើម្បីផ្តល់សេវាកម្មទាក់ទងវិស័យអចលនទ្រព្យនៅក្នុងតំបន់»។ លោកបានបន្ថែមថា៖«តំបន់នេះមានការហូរចូលអ្នកវិនិយោគច្រើន ប៉ុន្តែមិនទាន់មានខុនដូ និងអាផាតមិន នៅឡើយទេប៉ុន្តែវានឹងមាននៅពេលឆាប់ៗនេះដោយសារមានក្រុមហ៊ុនមួយចំនួនកំពុងសិក្សាដើម្បីធ្វើការវិនិយោគនៅទីនោះ»។ ខេត្តព្រះសីហនុ គឺជាតំបន់មានភាពទាក់ទាញសម្រាប់ភ្ញៀវទេសចរសម្រាកកម្សាន្ត ព្រោះពេលភ្ញៀវទៅឃើញសមុទ្រពណ៌ខៀវដាច់កន្ទុយភ្នែកអាចធ្វើឲ្យពួកគេបាត់អស់ទុក្ខកង្វល់។ ហេតុនេះនៅពេលមានការចាប់អារម្មណ៍ច្រើន ចំនួនអ្នកវិនិយោគនឹងកើនឡើងហើយតម្លៃដីធ្លីនឹងកើនឡើងទៅតាមនិន្នាការនោះដែរ។ លោក ម៉ៅ ប៉ូលីន នាយកក្រុមហ៊ុនអចលនទ្រព្យ Great Home បានសម្តែងការយល់ស្របនឹងការលើកឡើងរបស់លោក ចេង ខេង ដោយលោកបានប្រាប់ថាខេត្តព្រះសីហនុពិតជាមានសក្តានុពល ដោយសារតែជាតំបន់ឆ្នេរសមុទ្រដែលអាចទាក់ទាញភ្ញៀវទេសចរទាំងក្នុង និងក្រៅស្រុក។ ចំនួនជនបរទេសដែលបោះទុនវិនិយោគធ្វើសណ្ឋាគារនិងបាំងហ្កាឡូ មានការកើនឡើងច្រើននាពេលថ្មីៗនេះ។លោកបានបន្តថាទោះបីជាយ៉ាងណាតម្លៃដីធ្លីមិនកើនឡើងខ្ពស់ពេកនោះទេគឺមានកំណើនចន្លោះពី៥ទៅ១០ភាគរយតែប៉ុណ្ណោះ បើប្រៀបធៀបជាមួយរយៈពេលដូចគ្នាកាលពីឆ្នាំ២០១២កន្លងមក។ ទាក់ទងនឹងការវិនិយោគធ្វើបុរីនៅក្រុងព្រះសីហនុវិញលោក ប៉ូលីន បានប្រាប់ថាការកសាងផ្ទះវីឡា និងផ្ទះល្វែងលក់របស់ក្រុមហ៊ុនមួយចំនួននាពេលកន្លងមកមិនសូវទទួលជោគជ័យទេ ព្រោះលក់មិនសូវដាច់ព្រោះបើមានអ្នកទិញគឺអ្នកទិញភាគច្រើនជាអ្នកមានប្រាក់ច្រើន ដោយពួកគេទិញយកធ្វើជាទីតាំងលម្ហែកាយ ប៉ុន្តែបើរំពឹងប្រជាជននៅក្នុងក្រុងនេះពួកគេមិនសូវមានលទ្ធភាពទិញច្រើននោះទេ។ តែទោះបីជាយ៉ាងណា លោក ចេង ខេង មានសុទិដ្ឋិនិយមជាងនេះដោយលោកមានប្រសាសន៍ថាបុរីទាំងនោះបានទទួលជោគជ័យដោយសារមានអ្នកទិញជាបន្តបន្ទាប់ បើទោះបីជាការលក់មិនសូវបានលឿនដូចការរំពឹងទុកក៏ដោយ។ លោក ឌឹត ចណ្ណា ប្រធានគ្រប់គ្រងក្រុមហ៊ុនអចលនទ្រព្យ វីអឹមស៊ី បានសម្តែងនូវសុទិដ្ឋិនិយមខ្ពស់ជាងគេទាក់ទងទៅនឹងសក្តានុពល និងតម្លៃដីធ្លីនៅខេត្តព្រះសីហនុ ដោយលោកបាននិយាយថា តម្លៃដីធ្លីនៅខេត្តព្រះសីហនុមានកំណើនចន្លោះពី១០ទៅ២០ភាគរយនៅក្នុងឆ្នាំនេះប៉ុន្តែតំបន់ជាយក្រុងឆ្ងាយៗក៏នៅតែមិនសូវមានសកម្មភាពនិងកើនតម្លៃនោះទេ។ លោកបានបន្តថាចំនួនសណ្ឋាគារ ផ្ទះសំណាក់ និងបាំងហ្កាឡូ បានកើនឡើង នៅតំបន់នេះនិងមានភ្ញៀវស្នាក់នៅពេញៗជាហេតុធ្វើឲ្យតម្លៃដីធ្លីនៅក្នុងក្រុងមានការកើនឡើង។ លោកប្រាប់ទៀតថាគេអាចរកទិញដីបានក្នុងតម្លៃ១០០០ទៅ១៥០០ដុល្លារនៅតាមបណ្តោយផ្លូវធំៗ និងមានតម្លៃចន្លោះពី៣០០ទៅ៤០០ដុល្លារនៅតំបន់ជាប់មាត់សមុទ្រ។ ដីសម្រាប់លំនៅដ្ឋានមានតម្លៃចន្លោះ១០០ទៅ១៥០ដុល្លារក្នុងមួយម៉ែត្រការ៉េ និងដីនៅក្នុងតំបន់សេដ្ឋកិច្ចពិសេសមានតម្លៃចន្លោះពី១៥ទៅ២០ដុល្លារក្នុងមួយម៉ែត្រការ៉េ៕
