លោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្ម បានប្រាប់អ្នកសារព័ត៌មានថា ក្នុងឆ្នាំ២០១២នេះ កម្ពុជាអាចនាំអង្ករចេញបានជាង៥សែនតោន។ លោកលើកឡើងបែបនេះ បន្ទាប់ពីជំនួបជាមួយរដ្ឋមន្ត្រីក្រសួងពាណិជ្ជកម្មអារ៉ាប់រួមកាលពីម្សិលមិញ។ លោកបញ្ជាក់ថា បើរួមបញ្ចូលទាំងការនាំចេញស្រូវគឺអាចដល់ជាង១លានតោន។ ទាំងនេះមិនគិតការនាំចេញតាមច្រករបៀងខុសច្បាប់ផង។ បើនិយាយដើមឆ្នាំ២០១២វិញ លោកអធិប្បាយថា ក្នុងរយៈពេល៩ខែ កម្ពុជាបាននាំអង្ករចេញចំនួនជាង៣សែនតោន ហើយរាប់ទាំងស្រូវផង ក៏បានជាង១លានតោនដែរ។ លោករដ្ឋមន្ត្រីគូសបញ្ជាក់ថា ទីផ្សារ សំខាន់ៗរបស់កម្ពុជារួមមាន ប្រទេសថៃ, វៀតណាម, សហរដ្ឋអាមេរិក, និងសហគមអឺរ៉ុប។ និយាយពីការប្រមូលទិន្នផលស្រូវ ក្នុង១ឆ្នាំៗ កម្ពុជាទទួលបានជាង៨លានតោន។ ក្រៅពីទំនប់បំរុងក្នុងស្រុក កម្ពុជាអាចនៅសល់ស្រូវជាង៤លានតោន។ ៤លានតោននេះ អាចកិនជាអង្ករបានប្រហែល២លានតោនកន្លះដែរ។ សម្រាប់ចំនួននេះ លោកមិនបារម្ភពីការខ្វះស្បៀងក្នុងស្រុកឡើយ។ សម្រាប់អង្ករជាង២លានតោននេះ កម្ពុជាអាចបញ្ចេញទៅលក់នៅទីផ្សារថៃ និងវៀតណាមបាន។ អ្នកជំនាញលើកឡើងថា កម្ពុជានៅខ្វះអ្នកជំនាញខាងទីផ្សារក្រៅប្រទេស។ ចំណែករោងម៉ាស៊ីនកិនស្រូវស្ដង់ដា កិនស្រូវបានល្អ គឺមានប្រហែល១០គ្រឿងប៉ុណ្ណោះក្នុងប្រទេសកម្ពុជាបច្ចុប្បន្ន ដូច្នេះហើយស្រូវដែលផលិតបាន ត្រូវបង្ខំដឹកទៅលក់ឲ្យប្រទេសជិតខាង ដែលអាចយកចំណេញយ៉ាងច្រើនពីកសិករខ្មែរ៕ Source : Sabay.com.kh
