កម្ពុជា នឹងទទួលបានភ្ញៀវ ទេសចរ ចំនួន ៧លាននាក់នៅឆ្នាំ២០២០។ នេះជាការលើកឡើងរបស់ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ ថ្លែងក្នុងពិធីសម្ពោធ ពិព័រណ៍ ប្រកួតធ្វើម្ហូបអាហារ ភេសជ្ជៈនិងបដិសណ្ឋារកិច្ច Cam food និង Cam hotel កាលពីម្សិលមិញនេះ។ឯកឧត្ដម ថោង ខុន បានថ្លែងថា ក្នុងអំឡុងពេល ៨ខែ ដើមឆ្នាំ២០១២នេះ ទេសចរអន្តរជាតិ បានមកទស្សនាប្រទេស កម្ពុជាមានចំនួន ២,៣លាននាក់ បើប្រៀបធៀបនឹងរយៈពេលដូចគ្នា នៅឆ្នាំ ២០១១ មានកំណើន ២៤,៥%។ បើតាមការព្យាករណ៍ របស់ក្រសួងនៅឆ្នាំ២០១២នេះ កម្ពុជានឹងអាចទទួលបានទេសចរណ៍អន្តរជាតិបានប្រមាណ៣,៣ លាននាក់ ហើយនៅឆ្នាំ២០១៥ នឹងទទួលបាន៤,៥លាននាក់ ដល់ឆ្នាំ២០២០ កម្ពុជានឹងទទួលបាន ៧លាននាក់។ នៅក្នុងពិធីពិព័រណ៍ Cam food និង Cam hotel រយៈពេល៣ថ្ងៃនេះ នឹងមានការដាក់បង្ហាញ ម្ហូបអាហារ និងគ្រឿងបរិក្ខារសម្រាប់សណ្ឋាគារ ប្រមាណ២០០ស្តង់ ហើយក្នុងឱកាសនោះដែរ សមាគមភោជនីយដ្ឋានកម្ពុជា បានរៀបចំព្រឹត្តិការណ៍ប្រកួតប្រជែង ចាប់ពីថ្ងៃទី១០ ដល់ថ្ងៃទី១២ ខែតុលានេះ លើ ៨វិញ្ញាសា ដូចជា ក្រឡុកស្រា ឆុងកាហ្វេ រៀបចំគ្រែ តុបតែងលម្អ នំ ឆ្លាក់ផ្លែឈើ រៀបចំតុអាហារ ដើរប្រណាំងអ្នករត់តុ និងធ្វើម្ហូបថ្នាក់ជាតិផងដែរ។ ចំពោះកម្មវិធីប្រកួតប្រជែងខាងលើនេះ ឯកឧត្ដម ថោង ខុន បានកោតសរសើរថា ជាកម្មវិធីពង្រឹងដល់ឧស្សាហកម្មទេសចរ នៅកម្ពុជា ពិសេសលើសេវាម្ហូបអាហារ ភេសជ្ជៈ និងបដិសណ្ឋាកិច្ច កាន់តែមានគុណភាពស្តង់ដារដល់ភ្ញៀវជាតិ និងអន្តជាតិ ក៏ដូចជាការអភិវឌ្ឍជំនាញនេះឲ្យកាន់តែប្រសើរឡើងផងដែរ។ នៅឆ្នាំ២០១១ កន្លងមកនេះ កម្ពុជាបានទទួលភ្ញៀវទេសចរអន្តរជាតិ ចំនួនប្រមាណ ២,៨លាននាក់ ផ្ដល់ឱកាសការងារបានចំនួន ៣៥ម៉ឺននាក់ ដល់ប្រជាជនកម្ពុជា ។ វិស័យនេះអាចរកចំណូលបានប្រមាណ ១៩០០លានដុល្លារ និងរួមចំណែកប្រមាណ១២% នៃផលិតផលដុលក្នុងស្រុកសរុបរបស់ប្រទេស៕ អត្ថបទ៖កង ចាន់បញ្ញា Source : Sabay.com.kh
