ការនាំចេញកៅស៊ូរបស់កម្ពុជាបានកើនឡើង ១៧ ភាគរយ ប៉ុន្តែចំណូលបានធ្លាក់ចុះ ២១ ភាគរយ បើប្រៀបធៀបនឹងឆ្នាំ ២០១១ ដែលកត្តានេះគឺ បណ្ដាលមកពីតម្លៃកៅស៊ូក្នុងទីផ្សារអន្តរជាតិមានការធ្លាក់ចុះ។ នេះបើយោងតាមស្ថិតិរបស់រដ្ឋាភិបាលបញ្ចេញកាលពីថ្ងៃសុក្រ។ កម្ពុជាបាននាំចេញកៅស៊ូ ៥៤ ៥៣០ តោន កាលពីឆ្នាំ ២០១២ កើនពីចំនួន ៤៦ ៧៣០ តោនក្នុងឆ្នាំ ២០១១ ខណៈចំណូលបានត្រឹម ១៥៨ លានដុល្លារ ទាបជាងឆ្នាំ ២០១១ ដែលទទួលបាន ២០១ លានដុល្លារ។ នេះជាការបង្ហាញក្នុងរបាយការណ៍របស់មន្ត្រីកាំកុងត្រូល។ តម្លៃកៅស៊ូល្អបំផុតក្នុងមួយតោនគឺ ៣៣១០ ដុល្លារ ធ្លាក់ចុះ ៩ ភាគរយពីតម្លៃឆ្នាំ ២០១១ គឺ ៣៦៤៨ ដុល្លារក្នុងមួយតោន។ នេះបើតាមតារាងតម្លៃជ័រកៅស៊ូអន្តរជាតិ។ កៅស៊ូរបស់កម្ពុជាភាគច្រើនត្រូវបាននាំចេញទៅកាន់ប្រទេស ម៉ាឡេស៊ី វៀតណាម និងចិន។ ដំណាំកៅស៊ូ ជាដំណាំអាទិភាពរបស់កម្ពុជា បន្ទាប់ពីដំណាំស្រូវ។ គិតត្រឹមបច្ចុប្បន្នកម្ពុជាមានផ្ទៃដីដាំកៅស៊ូទំហំ ២៥៧ ៦៧០ ហិតា ដែលភាគច្រើនជាកៅស៊ូក្មេងមិនទាន់អាចចៀរយកជ័របាន។ នេះជាការបញ្ជាក់ការិយាល័យកៅស៊ូ នៃក្រសួងកសិកម្ម។ តាមការវាយតម្លៃ កម្ពុជាអាចផលិតជ័រកៅស៊ូបាន ៣សែនតោនក្នុងឆ្នាំ ២០២០៕
