ភ្នំពេញៈ ទើបតែចាប់ផ្តើម ដំណើរការ មិនទាន់បាន១ឆ្នាំផង ពេលនេះ មជ្ឈមណ្ឌល វិមានសុភមង្គល ដែលជាវិមានកូនកាត់បែប ខ្មែរ-អឺរ៉ុប នៅជាយ រាជធានីភ្នំពេញ កំពុងទទួលបាន ការពេញនិយមយ៉ាងខ្លាំង ពីសំណាក់ ប្រជាពលរដ្ឋកម្ពុជា រៀបចំ ពិធីផ្សេងៗ ។ មជ្ឈមណ្ឌល វិមានសុភមង្គល មានទីតាំង នៅលើផ្លូវចំការដូង ចូលតាមច្រកបុរីប៉េងហួត ស្ថិតក្នុងសង្កាត់ ស្ទឹងមានជ័យ ខណ្ឌមានជ័យ រាជធានីភ្នំពេញ ដែលជាទីកន្លែង ផ្តល់សេវាកម្មដ៏ល្អប្រណិត សម្រាបរៀប ចំពិធីមង្គលការ ភ្ជាប់ពាក្យ ពិធីជប់លៀង ពិធីខួបកំណើត សន្និបាត និងពិធីអបអរផ្សេងៗ ដល់ប្រជាពលរដ្ឋ គ្រប់កម្រិត។ មជ្ឈមណ្ឌល វិមានសុភមង្គល កំពុងតែ ពេញនិយម សម្រាប់រៀបចំ ពិធីផ្សេងៗ ក្នុងទឹកមុខរីករាយ អ្នកចាត់ការទូទៅ នៃមជ្ឈមណ្ឌល វិមានសុភមង្គល បានឱ្យដឹងថា មជ្ឈមណ្ឌល វិមាន សុភមង្គល មានលក្ខណៈ ធំទូលាយ ដែលផ្តល់ភាពងាយស្រួល សម្រាប់ចតរថយន្ត ម៉ូតូ និងមាន សុវត្ថិភាពខ្ពស់ ដោយមានសន្តិសុខ ត្រួតពិនិត្យ គ្រប់កន្លែង។ លោក ម៉េង ប៊ុនហាប់ បានមានប្រសាសន៍ថា “ និយាយរួមទីតាំង របស់យើង គឺអាចដាក់ឡានបាន ៥០០គ្រឿង និងម៉ូតូ៣០០គ្រឿង និងមានមានផ្ទៃដី៥ហិកតា សម្រាប់សម្រួល ដល់ការងារនេះ”។ លោកថា “រីឯចំនួន ភ្ញៀវវិញ គឺយើងអាចទទួលបាន រហូតដល់១២០០០នាក់ បើគិតជាតុ គឺ១២០០តុ តែបើគិតជារោង គឺយើងមាន ១២រោង បានន័យថាក្នុង១រោង គឺយើងអាចដាក់ បាន១០០តុ” ។ ដោយមាន អគារដ៏ធំស្គឹមស្គៃ កម្អស់៤ជាន់ ចាក់ដោតនៅលើផ្ទៃដីទំហំ ៥ហិកតា គិតតាំងពីចាប់ផ្តើម ពីខែវិច្ឆិកា ឆ្នាំ២០១២ រហូតមកដល់ពេលនេះ មជ្ឈមណ្ឌល វិមានសុភមង្គល បានទទួល រៀបចំពិធីជាច្រើន ជូនដល់ ប្រជាពលរដ្ឋកម្ពុជា រួចមកហើយ ជាពិសេស ពលរដ្ឋរាជធានីភ្នំពេញ ជាមួយនឹង សេវាកម្មរួម ជាកញ្ចប់។ លោក ប៊ុនហាប់ បានមានប្រសាសន៍ថា វិមានសុភមង្គល មានសេវាកម្ម គ្រប់ប្រភេទ ជាលក្ខណៈកញ្ចប់ ដើម្បីត្រៀមទទួលអតិថិជន គ្រប់កម្រិត។ លោកថា៖ “ទាក់ទងនឹងសេវាកម្មវិញ ខាងខ្ញុំមាន សេវាកម្មគ្រប់ទាំងអស់ ដូចជា សេវាកម្មអគារ ពិធីការ ដេគ័រផ្ការ ការរៀបឆាក ទៅលើម្ហូប ហើយសេវាកម្ម របស់ខ្ញុំ បំពេញហើយ គឺអត់មាន ខ្វះខាតទេ គឺបំពេញគ្រប់សេវាកម្ម ទាំងអស់” ។ លោកបន្ថែមថា “ទាក់ទងម្ហូបវិញ ខ្ញុំមានគ្រប់រស់ជាតិ អនាម័យ ហើយនិង គុណភាព។ បាទ! មានន័យថា ម្ហូបទាំងនេះ ភ្ញៀវគាត់ ទទួលស្គាល់បានច្រើន ដោយសារយើង មានការ ប្រកួតប្រជែង ទៅលើចុងភៅ មុននឹង ជ្រើសរើស មកធ្វើជាចុងភៅនៅទីនេះ” ។ ទោះជាយ៉ាងនេះក្តី ពិធីរៀបអាពាហ៍ពិពាហ៍ ឬ ពិធីមង្គលផ្សេងៗ របស់ប្រជាពលរដ្ឋកម្ពុជា ពុំមែនចេះតែធ្វើឡើង ជារាល់ថ្ងៃនោះទេ ពោលគឺ សម្បូរទៅតាម រដូវកាល និងថ្ងៃល្អ ឧទាហរណ៍ពិធីមង្គលការ ត្រូវបានពលរដ្ឋខ្មែរ ភាគច្រើន ធ្វើឡើង ក្រោយពេល ចេញវស្សា ដោយឡែក ពលរដ្ឋមួយចំនួន បានសម្រេចយកថ្ងៃចុងសប្តាហ៍ ដែលជាថ្ងៃ មនុស្សមួយ ភាគធំ មានពេលទំនេរ គ្រប់គ្រាន់ ហើយសម្រាប់ មជ្ឈមណ្ឌល វិមានសុភមង្គល ក៏មិនខុសគ្នា ទៅនឹង មជ្ឈមណ្ឌល រៀបចំពិធីនានា ផ្សេងទៀតប៉ុន្មានដែរ ។ អ្នកចាត់ការទូទៅ វ័យប្រមាណ ២០ឆ្នាំផ្លាយ រូបនេះ បានឱ្យដឹងទៀតថា “ចំពោះពិធី... យើងមិនអាចនិយាយបានថា មានរាល់ថ្ងៃនោះទេ ពេលខ្លះមានច្រើន ពេលខ្លះ មានតិច ទៅតាមដែលគេមើលថា ថ្ងៃល្អ ឬមិនល្អ សម្រាប់គេរៀបអាពាហ៍ពិពាហ៍។ តែយើងសង្កេត ឃើញថា ថ្ងៃដែលពិសេស គឺសៅរ-អាទិត្យ”។ លោកបន្ថែមថា “ចំពោះរដូវកាលវិញ ចាប់ពីខែ១១ រហូតដល់ខែ៥ ជាខែ ដែលគេបុក រៀបចំអាពាហ៍ពិពាហ៍ ហើយខែផ្សេងៗទៀត យើងមានទទួលរៀបចំ ពិធីជប់លៀង ពិធីប្រជុំ ពិធីផ្សេងៗទៀត ច្រើនទៅវិញ”។ មជ្ឈមណ្ឌល វិមានសុភមង្គល កំពុងតែ ពេញនិយម សម្រាប់រៀបចំ ពិធីផ្សេងៗ មានអគារចំនួន៨ បែរមុខទៅទិសខាងកើត ជាមួយនឹងឆាក សម្រាប់ច្រៀង សម្តែង នៅតាមជាន់នីមួយៗ មជ្ឈមណ្ឌល វិមានសុភមង្គល មានភ្ញៀវ មករៀបចំពិធីតិចបំផុត ៣រោង ក្នុងមួយថ្ងៃ និងឡើងខ្ពស់ បំផុត ដល់ទៅ ៨រោង នៅថ្ងៃអាទិត្យ ទី២៤ ខែមីនា ឆ្នាំ២០១៣ ។ មជ្ឈមណ្ឌលនេះ ត្រូវបានវិនិយោគ ដោយអ្នក ជំនួញកម្ពុជា សុទ្ធសាធ ប៉ុន្តែមិនបង្ហើបឱ្យដឹង ពីចំនួនទឹកប្រាក់ពិតប្រាកដនោះទេ។ ការវិនិយោគនេះ គឺដើម្បី ជួយ សម្រួលដល់ ប្រជាពលរដ្ឋ រាជធានីភ្នំពេញ និងដោយការមើលឃើញ ពីកង្វះខាត អគារសម្រាប់រៀបចំពិធី នៅក្នុងមូលដ្ឋាន ខណ្ឌមានជ័យផងដែរ ។ លោក ប៊ុនហាប់ បានឱ្យដឹងថា “តម្រូវការ ផ្នែករៀបចំពិធី នៅរាជធានីភ្នំពេញ មានការកើនឡើងច្រើន ហើយអគារដែលផ្គត់ផ្គង ពិធីទាំងនេះ នៅមានតិច ពេលខ្លះមាន មិត្តភក្តិ របស់ខ្ញុំ គេរៀបចំពិធីរបស់គេ នៅផ្ទះ ឬនៅតាមហាងតូចៗ នេះជាបញ្ហាមួយ ដែលនាំឱ្យយើង បង្កើតមជ្ឈមណ្ឌល នេះឡើង ហើយមួយវិញទៀត យើងសង្កេតឃើញ នៅស្ទឹងមានជ័យនេះ មានប្រជាជន រស់នៅច្រើនមែនទែ ប៉ុន្តែអត់មានអគារសម្រាប់រៀបចំពិធី ល្អមួយនៅឡើយ ” ។ លោកថា “មូលហេតុ ចម្បងនោះ គឺដោយសារយើងជឿទុកចិត្ត ទៅលើគោលនយោបាយ របស់រាជរដ្ឋាភិបាល គឺយើងឃើញថា សេដ្ឋកិច្ច គឺកំពុងតែលូតលាស់ ទៅមុខរហូត មិនងាកថយក្រោយឡើយ ដែលជាហេតុធ្វើឱ្យយើងហ៊ាន ដាក់ទុនយ៉ាងច្រើន សាងសង់អគារមួយនេះ ” ។ មជ្ឈមណ្ឌល វិមានសុភមង្គល កំពុងតែ ពេញនិយម សម្រាប់រៀបចំ ពិធីផ្សេងៗ ទន្ទឹមនឹងមានការគាំទ្រច្រើន ពីប្រជាពលរដ្ឋ នៅរាជធានីភ្នំពេញផងនោះ លោកបានឱ្យដឹងទៀតថា “យើងមានគម្រោង បើកអគារលក្ខណៈ ទំនើបបែប វិមានសុភមង្គល អញ្ចឹងដែរ នៅតំបន់ ផ្សេងទៀត ប៉ុន្តែមិនមែនបើករកស៊ីតែ ផ្នែករៀបអាពាហ៍ពិពាហ៍មួយមុខ ប៉ុណ្ណោះទេ យើងនឹងរកស៊ី អ្វីដែលសាកសម ទៅនឹងតំបន់ណាមួយ ប៉ុន្តែយើងធ្វើឱ្យអគារធំសម្បើមដូចគ្នា នៅរាជធានីភ្នំពេញនេះ ប៉ុន្តែនៅតាមបណ្តាខេត្ត យើងអត់ទាន់ មានគម្រោងនៅឡើយទេ” ។ លោកថា “ជំហ៊ានដំបូងនេះ យើងចង់អភិវឌ្ឍន៍ នៅតំបន់ រាជធានីភ្នំពេញសិន” ។ ទោះជាយ៉ាងណា លោកក៏បានជំរុញ ដល់ប្រជាពលរដ្ឋ ដែលមានបំណង រៀបចំពិធីមង្គលផ្សេងៗ ជ្រើសរើស ទីតាំងរៀបចំ ពិធីឱ្យបានត្រឹមត្រូវ និងសូមឱ្យប្រជាពលរដ្ឋទាំងនោះ គាំទ្រដល់ មជ្ឈមណ្ឌល វិមានសុភមង្គល ដោយសារតែនៅទីនោះ មានភាពងាយស្រួលច្រើនដល់ពួកគេ ជាមួយនឹង សេវាកម្មជាច្រើន នៅផ្តុំកន្លែងតែមួយ ព្រមទាំងមាន ទីធ្លាធំទូលាយ ប្រកបដោយ សោភ័ណភាព ក៏ដូចជា អគារទំនើបស្រស់ស្អាត ជាដើម ៕
