ភ្នំពេញ: ចំនួនប្រជាជនកម្ពុជាដែលទទួលប្រាក់កម្ចីសម្រាប់ទិញផ្ទះកំពុងមានការកើនឡើងពីមួយឆ្នាំទៅមួយឆ្នាំស្របនឹងកំណើនតម្រូវការគេហដ្ឋានថ្មីៗនៅក្នុងប្រទេសកាន់តែកើនឡើង។អ្នកជំនាញផ្នែកហិរញ្ញវត្ថុបានលើកឡើងថា កំណើននេះឆ្លុះបញ្ចាំងពីការកើនឡើងនៃទំនុកចិត្តរបស់ស្ថាប័នធនាគារចំពោះស្ថិរភាពនយោបាយនិងសេដ្ឋកិច្ចហើយចំណុចនេះក៏បង្ហាញឲ្យពីផែនការវិនិយោគរយៈពេលវែងនៅកម្ពុជាផងដែរ។ លោកស្រីងួន សុខា អគ្គនាយកធនាគារជាតិនៃកម្ពុជាបានថ្លែងថាការផ្តល់សេវាកម្មប្រាក់កម្ចីទិញលំនៅឋានរបស់ធនាគារនានានៅកម្ពុជាបានកើនឡើងជារៀងរាល់ឆ្នាំស្របពេលដែលវិស័យនេះទើបត្រូវបានបង្កើតឡើងនារយៈពេលប៉ុន្មានឆ្នាំចុងក្រោយនេះ។លោកស្រីបន្តថាកំណើនការផ្តល់ប្រាក់កម្ចីទិញលំនៅឋាន និង ការផ្តល់សេវាកម្មកាន់តែល្អក្នុងចំណោមគ្រឹះស្ថានធនាគារគឺបង្ហាញពីវឌ្ឍនភាពជាវិជ្ជមានក្នុងវិស័យហិរញ្ញវត្ថុនៅកម្ពុជា។ លោកស្រីមានប្រសាសន៍ថា៖«កម្ពុជាជាប្រទេសដែលមានប្រជាជននៅវ័យក្មេងច្រើន ដូច្នេះតម្រូវការផ្ទះសម្បែងក៏មានទំហំធំដែរ។ ដោយសារការផ្តល់កម្ចីសម្រាប់ទិញផ្ទះជាការវិនិយោគរយៈពេលវែង ដូច្នេះការកើនឡើងទំហំប្រាក់កម្ចីអាចនិយាយបានថាក្រុមធនាគារកំពុងមានទស្សនវិស័យជាវិជ្ជមានពីស្ថិរភាពនយោបាយ និងកំណើនសេដ្ឋកិច្ចនៅកម្ពុជា»។ យោងតាមទិន្នន័យរបស់ធនាគារជាតិនៃកម្ពុជាទំហំផលប័ត្រឥណទានទិញផ្ទះសរុបក្នុងវិស័យធនាគារនៅកម្ពុជាបានកើនឡើងជារៀងរាល់ឆ្នាំជាពិសេសនាប៉ុន្មានឆ្នាំចុងក្រោយនេះ ជាក់ស្តែងចំនួនផលប័ត្រឥណទានសរុបបានកើនឡើងយ៉ាងគំហុកចាប់ពីចំនួនសរុបប្រមាណ១២០លានដុល្លារ នៅឆ្នាំ២០១០ ដល់២៧៤ លានដុល្លារនៅឆ្នាំ២០១១ ខណៈឆ្នាំ២០១២ ទំហំផលប័ត្រឥណទានទិញផ្ទះសរុបមាន៣៣០ លានដុល្លារ។ ទំហំនេះគឺកើនឡើងប្រមាណ២០ ភាគរយបើប្រៀបធៀបនឹងឆ្នាំ២០១១។ លើសពីនេះទិន្នន័យថ្មីចុងក្រោយដែលភ្នំពេញប៉ុស្តិ៍ទទួលបានពីធនាគារជាតិនៃកម្ពុជាបានបង្ហាញថាផលប័ត្រឥណទានទិញផ្ទះដែលធនាគារក្នុងស្រុកបានផ្តល់ទៅអតិថិជនបានកើនឡើងដល់៣៤៤,៥លានដុល្លារ រហូតមកទល់នឹងរយៈពេលពីរខែដំបូងក្នុងឆ្នាំនេះ។ រយៈពេលនៃការទទួលបានប្រាក់កម្ចី និងលក្ខខណ្ឌក្នុងការសងត្រឡប់តែងមានការផ្តល់ឲ្យខុសៗគ្នាពីស្ថាប័នមួយទៅស្ថាប័នមួយទៀត។គេសង្កេតឃើញថា ឥទ្ធិពលនៃការប្រកួតប្រជែងនៅលើទីផ្សារដែលមានអ្នកផ្គត់ផ្គង់កាន់តែច្រើន បានធ្វើឲ្យអត្រាការប្រាក់កម្ចីទិញផ្ទះមានការថយចុះគួរឲ្យកត់សម្គាល់ ដែលបច្ចុប្បន្ន អាចស្ថិតក្នុងចន្លោះ ពី១០ ទៅ១៥ភាគរយក្នុង១ឆ្នាំ។ លោកអ៊ិនចាន់នី ប្រធានអគ្គនាយកប្រតិបត្តិនៃធនាគារអេស៊ីលីដាបានប្រាប់ភ្នំពេញប៉ុស្តិ៍ ថា រហូតមកដល់ត្រីមាសទី១ ឆ្នាំ២០១៣នេះឥណទានទិញផ្ទះសរុបក្នុងធនាគារអេស៊ីលីដាបានកើនឡើងដល់ ៨៩ លានដុល្លារ ដែលចំនួននេះមានការកើនឡើងប្រមាណ១៨ ភាគរយបើប្រៀបធៀបរយៈពេលដូចគ្នាកាលពីឆ្នាំមុន។លោកបន្តថា ឥណទានទិញលំនៅឋានដែលធនាគារអេស៊ីលីដាកំពុងផ្តល់ឲ្យមានអត្រាការប្រាក់ប្រមាណ១២ ភាគរយក្នុង១ ឆ្នាំ ដែលរយៈពេលសងត្រឡប់មានរយៈពេលអតិបរមារហូតដល់២០ឆ្នាំ។ លោកថ្លែងថា៖«ទំហំឥណទានសម្រាប់ទិញផ្ទះកំពុងមានការកើនឡើងជារៀងរាល់ឆ្នាំ ស្របតាមកំណើនសេដ្ឋកិច្ច។ ភាគរយនៃឥណទានសម្រាប់ទិញផ្ទះមានប្រមាណ៦ ភាគរយធៀបនឹងទំហំផលប័ត្រឥណទានសរុបក្នុងធនាគារអេស៊ីលីដា»។ លោក លីម ខេវិន ប្រធានប្រតិបត្តិស្ថាប័នមីក្រូហិរញ្ញវត្ថុ First Finance ដែលជាស្ថាប័នឯកទេសក្នុងការផ្តល់កម្ចីទិញលំនៅឋានទៅឲ្យអតិថិជនបានឲ្យដឹងថា គិតមកត្រឹមត្រីមាសទី១ឆ្នាំ២០១៣នេះឥណទានទិញផ្ទះសរុបក្នុងស្ថាប័នរបស់លោកបានកើនឡើងដល់១,៥ លានដុល្លារ ដែលចំនួនមានការកើនឡើងប្រមាណ៣០ភាគរយពីត្រីមាសទី១ ឆ្នាំ២០១២។ លោកបញ្ជាក់ថា៖«បើយើងប្រមើលមើលទៅថ្ងៃអនាគតខ្ញុំនៅតែសង្ឃឹមថាឥណទានទិញផ្ទះនៅតែបន្តកើនឡើង ព្រោះថាការយល់ដឹងពីអត្ថប្រយោជន៍នៃការប្រើប្រាស់សេវាហិរញ្ញវត្ថុមានភាពល្អប្រសើរជាងមុន។ ប្រជាជនវ័យក្មេងដែលទើបរៀបការរួចត្រូវការលំនៅឋានក៏មានច្រើន ដែលនឹងជួយជំរុញឲ្យមានការកើនឡើងនៃតម្រូវការឥណទានទិញផ្ទះផងដែរ»៕ Source : khmerpost.com
