ភ្នំពេញ : ក្រុមអ្នកជំនាញវិស័យអចលនទ្រព្យបាននិយាយថាការចេញដើរកម្សាន្តរបស់ប្រជាជនក្នុងឱកាសបុណ្យចូលឆ្នាំប្រពៃណីជាតិខ្មែរនាពេលកន្លងមកបានជួយជំរុញឲ្យសកម្មភាពទិញ លក់ អចលនទ្រព្យកើនឡើង។ លោក ឌឹត ចណ្ណា ប្រធានគ្រប់គ្រងទូទៅក្រុមហ៊ុនអចលនទ្រព្យ វីអឹមស៊ី បាននិយាយថា ការធ្វើដំណើរទៅកម្សាន្តនៅរមណីយដ្ឋាននិងស្រុកកំណើតរបស់ប្រជាជន ក្នុងឱកាសបុណ្យចូលឆ្នាំប្រពៃណីជាតិខ្មែរនាពេលកន្លងមក បានជួយធ្វើឲ្យដំណើរការទិញ លក់អចលនទ្រព្យមានដំណើរការល្អប្រសើរ។ លោកបានប្រាប់ទៀតថា សកម្មភាពទិញ លក់អចលនទ្រព្យនៅតាមបណ្តាខេត្តដែលមានសក្តានុពលសេដ្ឋកិច្ចនិងពាណិជ្ជកម្ម អាចកើនឡើងប្រហែល២០ភាគរយ ចំណែកខេត្តមិនសូវមានសក្តានុពលអាចកើនឡើងនៅក្នុងរង្វង់ពី៥ទៅ ១០ភាគរយ។ លោកបានអះអាងថា៖«តាមបទពិសោធរបស់ខ្ញុំបន្ទាប់ពីពិធីបុណ្យនេះចលនានៃការទិញ លក់ និងលើកស្លាកសញ្ញាដាក់លក់អចលនទ្រព្យតែងកើនឡើង»។ លោកបន្តថា៖«ទាំងអ្នកធ្វើការ ក៏ដូចជាអ្នកធ្វើជំនួញតែងសម្លឹងរកមើលឱកាសធ្វើពាណិជ្ជកម្មនៅពេលពួកគេចេញដំណើរទៅកម្សាន្តនៅតាមបណ្តាខេត្ត»។ លោក គឹម ហ៊ាង នាយកក្រុមហ៊ុនអចលនទ្រព្យខ្មែរ រៀលអេស្ទេត បានប្រាប់ថាពិធីបុណ្យចូលឆ្នាំថ្មីប្រពៃណីជាតិគឺជាពេលវេលាល្អសម្រាប់វិស័យទេសចរណ៍ ប៉ុន្តែវាក៏ជាប់ទាក់ទងនឹងវិស័យអចលនទ្រព្យផងដែរព្រោះវាជាឱកាសដែលគាត់ចាប់ផ្តើមសម្លឹងមើលឱកាសទិញ លក់អចលនទ្រព្យ ហើយការចេញដើរកម្សាន្តច្រើនរបស់ប្រជាជនក៏ជាកតាលីករមួយធ្វើឲ្យ ការទិញ លក់ អចលនទ្រព្យមានកំណើនខ្ពស់ជាងមុន។ តែទោះបីជាយ៉ាងណាលោកមានប្រសាសន៍ថា៖«ចលនានៃការទិញ លក់ មិនកើនលើស៥ភាគរយនោះទេព្រោះអ្នកទិញភាគច្រើនជាអ្នកនៅភ្នំពេញហើយពួកគេមិនទិញសម្រាប់វិនិយោគនោះទេគឺពួកគេទិញសម្រាប់ប្រើប្រាស់ជាលក្ខណៈគ្រួសារ»។ លោក គុយ វ៉ាត ប្រធានក្រុមហ៊ុនអចលនទ្រព្យ វីត្រាស់ ក៏យល់ឃើញថា ពិធីបុណ្យចូលឆ្នាំថ្មីជា ឱកាសល្អសម្រាប់វិស័យអចលនទ្រព្យផងដែរ ដោយលោកមានប្រសាសន៍ថា ព្រឹត្តិការណ៍ធំៗបែបនេះពិតជាអាចជួយជំរុញឲ្យវិស័យអចលនទ្រព្យមានកំណើនស្របពេលដែលកំណើននៃតម្រូវការផ្ទះសំណាក់ សណ្ឋាគារ និងភោជនីយដ្ឋានកើនឡើង។ នៅពេលវិស័យបដិសណ្ឋារកិច្ចកើនឡើងចលនានៃការសាងសង់និងវិនិយោគនឹងកើនឡើងដោយស្វ័យប្រវត្តិ។ លោកបញ្ជាក់ថា៖«នៅពេលជីវភាពប្រជាជនកើនឡើងតម្រូវការនិងការវិនិយោគផ្សេងៗក៏កើនឡើងដូច្នេះចលនានៃការសាងសង់និងទិញ លក់ អចលនទ្រព្យនឹងកើនឡើងដែរ»។ ពិធីបុណ្យចូលឆ្នាំថ្មីប្រពៃណីជាតិខ្មែរគឺជាពេលប្រជាជនចេញដើរកម្សាន្តហើយនឹងធ្វើឲ្យពួកគាត់ចាប់អារម្មណ៍លើការទិញលក់អចលនទ្រព្យច្រើនក្រោយពិធីបុណ្យបានបញ្ចប់។ លោក ចេង ខេង អគ្គនាយកក្រុមហ៊ុនអចលនទ្រព្យ ស៊ីភីអិល និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍ថា ធម្មតាការធ្វើជំនួញក៏ពាក់ព័ន្ធនឹងវិស័យទេសចរណ៍ផងដែរព្រោះបើកាលណាភ្ញៀវទេសចរធ្វើដំណើរទៅកាន់តំបន់ណាច្រើននោះ នឹងធ្វើឲ្យសកម្មភាពជំនួញកើនឡើងដោយស្វ័យប្រវត្តិនៅតំបន់នោះ។ លោកបានបញ្ជាក់ថា៖«ដោយសារសេដ្ឋកិច្ចនៅកម្ពុជាកំពុងមានកំណើនល្អ ការទិញ លក់អចលនទ្រព្យមានជាហូរហែ មិនថានៅតំបន់ណានោះទេប៉ុន្តែយើងមិនមានទិន្នន័យជាក់លាក់ថាការទិញ លក់ អចលនទ្រព្យ បានកើនឡើងប៉ុន្មានភាគរយទេនាអំឡុងពេលនោះទាល់តែអាជ្ញាធរមូលដ្ឋានដែលធ្វើការងារនេះទើបពួកគាត់ដឹងច្បាស់»។ លោកបានបន្តថា៖«បើធ្វើការប្រៀបធៀបរវាងរដូវទាំងពីរក្នុងឆ្នាំនីមួយៗគឺចាប់ពីដើមខែមករា ដល់ខែមេសា គឺជាពេលវេលាដែលការទិញ លក់អចលនទ្រព្យមានសកម្មភាពច្រើនគឺច្រើនជាងរដូវភ្លៀងធ្លាក់»។ លោក ចេង ខេង បន្តថា អំឡុងរដូវប្រាំងគឺជាពេលដែលផ្តល់ភាពងាយស្រួលក្នុងការចេញចូលទៅ មើលដី ហើយពេលនេះក៏ជាពេលដែលអតិថិជនធ្វើការសម្រេចចិត្តមុនរដូវភ្លៀងមកដល់ផងដែរ៕ Source : khmerpost.com
