ភ្នំពេញ: ជនបរទេសប្រមាណ១០០នាក់បានទិញលំនៅឋាននៅកម្ពុជាក្នុងត្រីមាសទី១ឆ្នាំ២០១៣នេះដែលធ្វើឲ្យចំនួនលំនៅឋានគ្រប់គ្រងដោយជនបរទេសនៅកម្ពុជាកើនឡើងពី៩៩៧Unit នាដំណាច់ឆ្នាំ២០១២ដល់ប្រមាណ១១០០Unit ពេលបច្ចុប្បន្ននេះ។នេះបើតាមការប្រាប់ឲ្យដឹងពីក្រុមអ្នកជំនាញក្នុងវិស័យអចលនទ្រព្យនៅកម្ពុជា ។ លោក នួនរិទ្ធី នាយកគ្រប់គ្រងទូទៅក្រុមហ៊ុនអចលនទ្រព្យប៊ុណ្ណា រៀលធីគ្រុបបានប្រាប់ថាចំនួនជនបរទេសទិញលំនៅឋាននៅកម្ពុជាមានកំណើនក្នុងរង្វង់ពី៥ទៅ១០ភាគរយក្នុងត្រីមាសទី១ឆ្នាំនេះ បើប្រៀបធៀបនឹងរយៈពេលដូចគ្នាកាលពីឆ្នាំមុនហើយកំណើននេះអាចនឹងកើនឡើងរង្វង់ពី១០ទៅ២០ភាគរយនៅត្រីមាសក្រោយៗទៀត។លោកថ្លែងថា៖«កំណើនតិចតួចនៃការទិញលំនៅឋានរបស់ជនបរទេសក្នុងត្រីមាសទី១ឆ្នាំ២០១៣នេះគឺដោយសារតែពួកគេរង់ចាំមើលសភាពការណ៍បោះឆ្នោតនាពេលខាងមុខនេះ»។ ជនបរទេសទិញខុនដូនៅកម្ពុជាភាគច្រើនមកពីសិង្ហបុរីចិនជប៉ុនម៉ាឡេស៊ីនិងអង់គ្លេស ជាដើម។ យោងតាមរបាយការណ៍របស់ក្រុមហ៊ុនប៊ុណ្ណារៀលធីគ្រុបដែលបានធ្វើការសិក្សាក្នុងខណ្ឌចំនួន៥នៅរាជធានីភ្នំពេញកាលពីចុងឆ្នាំ២០១២បានរកឃើញថាគិតត្រឹមដំណាច់ឆ្នាំ២០១២មានជនបរទេសជាម្ចាស់កម្មសិទ្ធិលើខុនដូចំនួន៩៩៧Unit ។ របាយការណ៍ដដែលក៏បានឲ្យដឹងទៀតថាតម្លៃខុនដូនៅតំបន់ជាយក្រុងមានចាប់ពី៦០០ទៅ១០០០ដុល្លារ និងនៅកណ្តាលក្រុងមានតម្លៃពី១០០០ដល់២៥០០ដុល្លារអាមេរិកក្នុងមួយម៉ែត្រការ៉េ។ នៅឆ្នាំ២០១៣នេះខុនដូមួយចំនួនទៀតនឹងបញ្ចប់ការសាងសង់ដូចជាខុនដូសែនសុខខុនដូវិមានកែវចរណៃនិងខុនដូ De Castle Royalជាដើម។ លោក ឌឹតចណ្ណាប្រធានគ្រប់គ្រងទូទៅនៃក្រុមហ៊ុនអចលនទ្រព្យ វីអឹមស៊ីបានប្រាប់ថា លោកគិតថាចំនួនជនបរទេសទិញខុនដូនៅកម្ពុជាមិនបានកើនលើស៥ភាគរយនោះទេក្នុងត្រីមាសទី១ឆ្នាំនេះដោយសារជនបរទេសរស់នៅកម្ពុជាភាគច្រើនចូលចិត្តជួលអាផាតមិនស្នាក់នៅជាជាងទិញផ្ទះផ្ទាល់ខ្លួន ប៉ុន្តែបើនិយាយពីផលចំណេញគឺការទិញខុនដូស្នាក់នៅមានផលចំណេញច្រើនជាងការជួលអាផាតមិន ពីព្រោះការទិញខុនដូបង់ប្រាក់តែម្តងរួចដោយមិនចាំបាច់ត្រូវបង់ប្រាក់ប្រចាំខែទេ។តម្លៃខុនដូអាចនឹងឡើងថ្លៃនៅក្រោយពេលពួកគាត់ទិញរួច។ លោកបានអះអាងថា៖«ទោះបីជាយ៉ាងណាខ្ញុំមានសុទិដ្ឋិនិយមសម្រាប់ឆ្នាំ២០១៥ខាងមុខព្រោះនៅពេលនោះកម្ពុជានឹងត្រូវធ្វើសមាហរណកម្មសេដ្ឋកិច្ចទៅក្នុងតំបន់អាស៊ានដែលនៅពេលនោះតម្រូវការខុនដូស្នាក់នៅនឹងកើនឡើងច្រើន»។លោកបានបន្តថា៖«ពេលអាស៊ានធ្វើសមាហរណកម្មនឹងមានការចល័តប្រជាជនច្រើននៅក្នុងតំបន់ ដែលមានអ្នកខ្លះមកធ្វើការនៅកម្ពុជា និងមានខ្លះទៀតមកបើកអាជីវកម្មនៅកម្ពុជា ហេតុនេះតម្រូវការកន្លែងស្នាក់នឹងមានកាន់តែច្រើន»។ ទោះបីជាយ៉ាងណាលោក គុយវ៉ាត ប្រធានក្រុមហ៊ុនអចលនទ្រព្យវីត្រាស់បានប្រាប់ថាចំនួនជនបរទេសទិញខុនដូបានកើនឡើងចាប់តាំងពីកម្ពុជាមានច្បាប់ស្តីពីសហកម្មសិទ្ធិដែលអនុញ្ញាតឲ្យជនបរទេសមានសិទ្ធិទិញលំនៅឋាននៅកម្ពុជា។ច្បាប់នេះបានជួយជំរុញឲ្យវិស័យអចលនទ្រព្យកាន់តែមានដំណើរការល្អប្រសើរ៕ Source : Postkhmer.com
