ភ្នំពេញៈ ខណៈកំណើនអាជីវកម្មផ្នែកវេជ្ជសាស្រ្តកើតចេញពីការវិនិយោគពីប្រទេសថៃនិងវៀតណាមនៅក្នុងប្រទេសកម្ពុជានាពេលបច្ចុប្បន្ននេះ វេជ្ជបណ្ឌិតកម្ពុជាកំពុងតែស្វែងរកឱកាសប្រកួត ប្រជែងក្នុងវិស័យនេះ។ លោកវេជ្ជបណ្ឌិត អ៊ូច ឌីណា នាយកមន្ទីរសម្ភព និងសម្រាកព្យាបាលឥន្ទ្រទេវី និងក្រុមរបស់លោកបានសម្រេចចិត្តធ្វើការវិនិយោគខាងវិស័យ សុខាភិបាលសម្រាប់ថ្ងៃអនាគតចំពោះគ្រួសារកម្ពុជា និងជួយដល់មន្ទីរពេទ្យរដ្ឋដែលកំពុងមានអ្នកជំងឺច្រើនកកកុញ។មន្ទីរពេទ្យនេះមានកម្ពស់៧ជាន់រួមមានជាង៤០បន្ទប់សម្រាប់អ្នកជំងឺសម្រាកព្យាបាល។ លោកនិយាយថាលោកនិងក្រុមការងាររបស់លោកបានវិនិយោគប្រាក់ជាងមួយលាន ដុល្លារ រួមមានការបំពាក់ឧបករណ៍ក្នុងមន្ទីរពេទ្យ។មន្ទីរព្យាបាលនេះទើបតែបានចាប់ផ្តើមដំណើរការរបស់ខ្លួនកាលពីដើមឆ្នាំ២០១៣ ប៉ុណ្ណោះ។ លោកថ្លែងថា៖ «យើងគិតអំពីថវិកា និងការងារគ្រួសាររបស់យើងដោយសារតែពីមួយថ្ងៃទៅមួយថ្ងៃរាល់អ្វីៗទាំងអស់កាន់តែមានភាពប្រសើរឡើង។ ដូច្នេះបើយើងមិនធ្វើតាមស្ថានការណ៍បច្ចុប្បន្ននេះទេ ជីវិតរបស់យើងគឺមានការលំបាកណាស់»។ គ្រូពេទ្យចូលនិវត្តន៍ដែលមានជំនាញខាងសម្ភពនិងជំងឺស្រ្តីរូបនេះនិយាយថា លោកធ្លាប់បានទៅសិក្សាផ្នែកនេះនៅសាធារណរដ្ឋឆេក កាលពីឆ្នាំ១៩៨៨ ដល់ឆ្នាំ១៩៩១។ នៅឆ្នាំ១៩៩៩ ដល់ឆ្នាំ ២០០០ លោកបន្តជំនាញរបស់លោកនៅប្រទេសបារាំង។ មន្ទីរពេទ្យដែលទើបនឹងដំណើរការនេះកំពុងទទួលបានការចាប់អារម្មណ៍ពីសាធារណជនក្នុងការទៅព្យាបាល។ ក្នុងនាមជាគ្រូពេទ្យមា្នក់ធ្លាប់បម្រើការនៅមន្ទីរពេទ្យកាល់ម៉ែតលោក អ៊ូច ឌីណាបាននិយាយថា មន្ទីរពេទ្យនេះមានអ្នកជំងឺច្រើនជាពិសេសផ្នែកសម្ភព។ លោកបានបន្តថា ជួនកាលមានពេលខ្លះខ្វះគ្រែសម្រាប់អ្នកជំងឺសម្រាកហើយបុគ្គលិកក៏ប្រឈមនឹងកង្វះខាតផងដែរ។ លោកបន្តថា៖ «ដូច្នេះយើងមានគំនិតសាងសង់អគារថ្មីដើម្បីបើកគ្លីនិកដោយផ្តល់សេវាទាក់ទងទៅនឹងសម្ភពនិងជំងឺផ្សេងៗទៀត»។ លោកបានឲ្យដឹងទៀតថា៖ «ដើម្បីប្រទេសជាតិយើងមានបំណងដើម្បីចែករំលែកការងារពីមន្ទីរពេទ្យរដ្ឋដែលមានអ្នកជំងឺកាន់តែច្រើនឡើងៗជារៀងរាល់ថ្ងៃ»។លោក អ៊ូច ឌីណា បានបន្ថែមថា៖ «សព្វថ្ងៃនេះខ្ញុំបានចូលនិវត្តន៍ហើយប៉ុន្តែមន្ទីរពេទ្យនៅតែត្រូវការខ្ញុំដើម្បីជួយ»។ ដោយមានបទពិសោធរយៈពេល៣០ឆ្នាំក្នុងការពិនិត្យព្យាបាលអ្នកជំងឺ លោក អ៊ូច ឌីណា បាននិយាយថា លោកធ្លាប់ជួយព្យាបាលអ្នកជំងឺយ៉ាងហោចណាស់៥នាក់ក្នុងមួយថ្ងៃជាមធ្យម។ លោកបានប៉ាន់ប្រមាណថា សេវាព្យាបាលនៅវិស័យឯកជនមានតម្លៃខ្ពស់ជាងមន្ទីរពេទ្យរដ្ឋ ប្រហែលពី២០ទៅ៣០ភាគរយ ខណៈដែលរដ្ឋាភិបាលទទួលខុសត្រូវលើថ្លៃទឹក និងអគ្គិសនីមួយកម្រិតទៀតនោះ។ លោកបានបន្តថា៖ «សេវានេះមានតម្លៃខ្ពស់ជាងបន្តិចដោយសារតែគ្លីនិកឯកជនមានការទទួលខុសត្រូវគ្រប់អ្វីៗទាំងអស់»។ លោកបន្តថា៖ «តម្លៃសម្រាប់បច្ចេកទេសក្នុងការព្យាបាលគឺប្រហាក់ប្រហែលគ្នា»។ ជាមួយគ្នានេះដែរមន្ទីរពេទ្យនិងគ្លីនិកឯកជនកំពុងកើនឡើងយ៉ាងខ្លាំងលើទីផ្សារកម្ពុជារួម ទាំងវិនិយោគិនវៀតណាមដែលវិនិយោគមន្ទីរពេទ្យ ជោ រៃ និងវិនិយោគិនថៃ វិនិយោគមន្ទីរពេទ្យ រ៉ូយ៉ាល់រតនៈនៅភ្នំពេញ។ ទោះបីជាការវិនិយោគពីបរទេសក្នុងវិស័យនេះធ្វើឲ្យមានការព្រួយបារម្ភសម្រាប់អ្នកឯកទេសក្នុងស្រុកប៉ុន្តែវាជាសញ្ញាមួយផងដែរសម្រាប់វេជ្ជបណ្ឌិតកម្ពុជាដើម្បីធ្វើការងារនេះដើម្បីភាពប្រកួតប្រជែង។ ទស្សនៈមហាជនកម្ពុជាមានជំនឿទុកចិត្តលើវេជ្ជបណ្ឌិតបរទេសហើយភាគច្រើនធ្វើដំណើរទៅព្យាបាលនៅប្រទេសវៀតណាម ថៃ ម៉ាឡេស៊ី និងសិង្ហបុរី។ ដោយមានបទពិសោធច្រើនឆ្នាំ លោកវេជ្ជបណ្ឌិត ឌីណា បាននិយាយថា សមត្ថភាពធនធានមនុស្សមិនខុសគ្នាច្រើនទេ ដោយសារតែលោកធ្លាប់ទៅរៀននៅបរទេសហើយលោកអាចធ្វើការជាមួយវេជ្ជបណ្ឌិតបរទេសហើយអ្វីដែលខុសគ្នាខ្លាំងគឺឧបករណ៍ព្យាបាល វេជ្ជសាស្ដ្រ។ លោកបន្តថា៖ «សម្រាប់គំនិតរបស់ខ្ញុំផ្ទាល់បន្ទាប់ពីការស្ដារប្រទេសឡើងវិញក្រោយរបបប៉ុលពត វិស័យសុខាភិបាលត្រូវបានបំផ្លាញចោលទាំងស្រុងដូច្នេះចាប់ពីពេលនោះមក ទស្សនៈមហាជនមានការមិនទុកចិត្តលើវិស័យសុខាភិបាលដោយសារតែយើងជាជំនាន់ដែលមានវ័យក្មេងខ្ចី»។ លោកបន្តថា៖ «ចាប់តាំងពីពេលនោះវាធ្វើឲ្យមនុស្សទាំងអស់នៅក្នុងប្រទេសរបស់យើងមានជំនឿទុកចិត្តតិចតួចលើវេជ្ជបណ្ឌិតរបស់យើងហើយវានឹងក្លាយជាទម្លាប់សម្រាប់ប្រជាជនរបស់យើង»។ លោកបន្តថា៖ «ខ្ញុំគិតថា ប្រសិនបើយើងព្យាយាមលើកកម្ពស់បច្ចេកទេសរបស់យើង ធនធានមនុស្សរបស់យើងពួកគេនឹងមានជំនឿលើយើង។ សព្វថ្ងៃនេះសេវារបស់យើងកំពុងដំណើរការប៉ុន្តែវាមិនទាន់ល្អនៅឡើយ»៕ PB
