ដើមអំពិល | ព័ត៌មានពាណិជ្ជកម្ម | ម៉ោង១៥ និង១៦នាទី ថ្ងៃពុធ ទី០៥ ខែមិថុនា ឆ្នាំ២០១៣

ភ្នំពេញ៖ វិស័យបច្ចេកវិទ្យា បានដើរតួនាទីយ៉ាងសំខាន់ ក្នុងវិស័យហិរញ្ញវត្ថុ និង ធនាគារ ដើម្បីជំរុញការរីកចម្រើន នូវកំណើន សេដ្ឋកិច្ច ឲ្យកាន់ល្អប្រសើរ ដូចប្រទេសនានា នៅលើពិភពលោក។សន្និសីទអន្តរជាតិ លើកទី៥ ស្តីពីវិស័យធនាគារ និងមីក្រូហិរញ្ញវត្ថុ ឆ្នាំ២០១៣ ត្រូវបានរៀបចំឡើង នាថ្ងៃទី០៥ ដល់ថ្ងៃទី០៦ ខែមិថុនាឆ្នាំ២០១៣ ហើយក៏ជាពេល ដ៏មានតម្លៃអស្ចារ្យ ជាលើកដំបូងមួយ នៃការប្រារព្ធឡើង នៅពិធីប្រគល់រង្វាន់ ស្តីពី ស្ថាប័នធនាគារ និងមីក្រូហិរញ្ញវត្ថុ ដែលមានភាព នាំមុខគេមួយប្រចាំនៅកម្ពុជា និងមានរួមសហការ ដោយសមាគម មីក្រូ ហិរញ្ញវត្ថុកម្ពុជា និងក្រុមហ៊ុនទិន្នន័យអន្តរជាតិ ហៅកាត់ថា (IDG ASEAN)។

ប្រធានក្រុមហ៊ុន រៀបចំរាល់ព្រឹត្តិការណ៍ធំៗ ការស្រាវជ្រាវ និងផ្សព្វផ្សាយ ផ្នែកបច្ចេកវិទ្យា (IDG) លោក Derrick Tan បានមាន ប្រសាសន៍ សន្និសីទនេះ បានឆ្លុះបញ្ចាំងយ៉ាងខ្លាំងក្លា និងមានភាពជិតស្និទ្ធបំផុត ជាមួយនិងប្រព័ន្ធសេដ្ឋកិច្ចសកល នៅក្នុងឆ្នាំ នេះផងដែរ ដែលយើងបានរៀបចំឡើង នៅក្រោមបរិបទ «បច្ចេកវិទ្យាដ៏ទំនើប កំពុងនាំទៅរកវិស័យធនាគារ និងមីក្រូហិរញ្ញវត្ថុ សកល» នេះ គឺត្រូវបានរចនាឡើង ដើម្បីធ្វើការឆ្លុះបញ្ចាំង នៃវិស័យបច្ចេកវិទ្យា ដែលមានលក្ខណៈជាសកល និងជាឯកជន នៅក្នុងវិស័យធនាគារ និងស្ថាប័នឯកជន ដែលអាចនឹងជំរុញ នូវភាគទុនជាច្រើន ដោយមានការឆ្លងកាត់ តាមការបត់បែន នៃ ការវិភាគរបស់អតិថិជន ជាមួយនិងការពង្រឹង ឲ្យកាន់តែមានប្រសិទ្ធភាព ព្រមទាំងការធ្វើការទប់ស្កាត់ ជាមួយឧសបគ្គនៃ ការ គ្រប់គ្រង។

កំណើនសេដ្ឋកិច្ចកម្ពុជា បាននិងកំពុងបង្ហាញនូវភាពមាំមួន ឆ្ពោះទៅរកគោលនយោបាយ ប្រចាំឆ្នាំ ៧,០ភាគរយ តាមយុទ្ធ សាស្ត្រ ចតុកោណដំណាក់កាលទី២ របស់រាជរដ្ឋាភិបាល។ ហើយកំណើននេះ សម្រេចបាន ៧,៣ភាគរយ នៅឆ្នាំ២០១២ នឹង ត្រូវបានព្យាករណ៍ថា សម្រេចបានក្នុងរង្វង់ ៧,០ភាគរយ នៅឆ្នាំ២០១៣នេះ។ តម្លៃផលិតផលសរុបក្នុងស្រុក (គិតតាមថ្លៃ បច្ចុប្បន្ន) មានចំនួន ៥៦.៦១៧ពាន់លានរៀល ឬប្រមាណ ១៤.០៣៨លានដុល្លារអាមេរិក។ កំណើនសម្រាប់ ឆ្នាំ២០១២នេះ បានសម្រេច ដោយកំណើនវិស័យកសិកម្ម បានកើនឡើង ៦,៧ភាគរយ ដែលនៅក្នុងនោះ វិស័យកាត់ដេរ បានកើនឡើង ៦,៩ ភាគរយ និងវិស័យសេវាកម្ម បានកើនឡើង ៨,១ភាគរយ ដែលនៅក្នុងនោះ វិស័យសណ្ឋាគារ និងភោជនីយដ្ឋាន បានកើន ឡើង ១២,៥ភាគរយផងដែរ។

សូមជម្រាបថា ពិធីសន្និសីទ ដ៏មានប្រយោជន៍នេះ មានការចូលរួម ពីសំណាក់ធនាគារ ស្ថាប័នមីក្រូហិរញ្ញវត្ថុ និងបណ្តាអ្នក វាយតម្លៃ ដែលមកពីមជ្ឈដ្ឋានផ្សេងៗ ហើយនិងមានការណែនាំ ដាក់តាំងបង្ហាញ នូវសេវាកម្ម និងផលិតផលថ្មីៗ ដែលក្នុង នោះ មានការចូលរួមចំណែក ពីសំណាក់ ៥០០ ប្រធានក្រុមប្រឹក្សាភិបាល CEOs, CIOs, CFOs, Presidents, Directors, Senior Managers និងបណ្តាអ្នកជំនាញ ចូលរួមទស្សនាជាង ២៥០០នាក់ ដែលមានដូចជាពាណិជ្ជករ ក្នុងវិស័យធនាគារ អ្នក ជំនាញផ្នែកហិរញ្ញវត្ថុ ៕