សប្បាយ | ព័ត៌មានពាណិជ្ជកម្ម | ម៉ោង១២ និង៣០នាទី ថ្ងៃព្រហស្បតិ៍ ទី១៣ ខែមិថុនា ឆ្នាំ២០១៣ គ្រឿងអលង្ការ និងត្បូងមានតម្លៃកម្ពុជាកំពុងសម្លឹងឱកាសដ៏ល្អរបស់ខ្លួនទីផ្សារអាមេរិក ក្នុងពេលឆាប់ៗខណៈការនាំចេញផលិតផលទាំងនេះទៅកាន់ទីផ្សារអាមេរិក ត្រូវបានលើកលែងពន្ធនាំចូល។នេះបើយោងតាមប្រសាសន៍របស់ លោក ចម ប្រសិទ្ធិ ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម ថ្លែងប្រាប់អ្នកការសែត ក្នុងឱកាស បើកពិព័រណ៍គ្រឿងអលង្ការ និងត្បូងថ្មមានតម្លៃកាលពីព្រឹកមិញនេះនៅកោះពេជ្រ។ លោកបានមានប្រសាសន៍ថា ពីមុនការនាំចូលផលិតផលគ្រឿងអលង្ការ និងត្បូងថ្មមានតម្លៃពីប្រទេសថៃ ទៅកាន់ទីផ្សារសហរដ្ឋអាមេរិក ក៏ត្រូវបានលើកលែងពន្ធដូចកម្ពុជាផងដែរ។ប៉ុន្តែដោយសារការនាំចូលរបស់ថៃលើផលិតផលនេះមានសន្ទុះខ្លាំង ទើបសហរដ្ឋអាមេរិកសម្រេចលុបចោលការមិនយកពន្ធ។លោកថា ក្នុងនាមប្រទេសមួយ ដែលមានការអភិវឌ្ឍតិចតួច កម្ពុជានឹងចំណេញពីរយ៉ាងពីវិស័យនេះទី១ ការនាំចេញផលិតផល ដោយមិនគិតពន្ធ ទាញអ្នកវិនិយោគបរទេសលើវិស័យនេះមកកាន់តែច្រើន ព្រោះកម្លាំងពលកម្មកម្ពុជាធូរថ្លៃជាងបណ្ដាប្រទេសនានា ហើយការនាំចេញទៀតសោត ក៏មិនមានគិតពន្ធ។ដូច្នេះការអភិវឌ្ឍលើផ្នែកវិស័យនេះ នឹងចូលរួមចំណែកអភិវឌ្ឍសេដ្ឋកិច្ចកម្ពុជា ព្រមទាំងបង្កើតការងារ ជំនាញច្បាស់លាស់ កាន់តែច្រើនសម្រាប់ប្រជាជនកម្ពុជា ប្រកបដោយភាពថ្លៃថ្នូរ ។ លោកទេសរដ្ឋមន្ត្រីបានបន្ថែមទៀតថា ជាច្រើនបានចាប់ផ្តើមមានវិញ្ញាបនបត្រ ដើម្បីបញ្ជាក់ពីគុណភាពត្បូងជូនដល់អតិថិជនរបស់ខ្លួន ដែលប្រការនេះក៏អាចជាចំណែកមួយ ក្នុងការទាក់ទាញភ្ញៀវទេសចរណ៍បរទេសមកកាន់កម្ពុជាផងដែរ៕ អត្ថបទ៖ មៃ សុខលីម
