ភ្នំពេញៈ តម្រូវការឃ្លាំងសម្រាប់ជួលក្នុងត្រីមាសទី២ឆ្នាំ២០១៣នេះមានកំណើនតិចតួចបើប្រៀបធៀបទៅនឹងត្រីមាសទី១ឆ្នាំ២០១៣នេះបើតាមការឲ្យដឹងពីក្រុមអ្នកជំនាញផ្នែកអចលនទ្រព្យ។លោក ប៉ូ អ៊ាវគង់ប្រធានគ្រប់គ្រងទូទៅនៃក្រុមហ៊ុនអេស៊ា រៀលអេស្ទេត បាននិយាយថាតម្រូវការឃ្លាំងជួលក្នុងត្រីមាសទី២នេះ មានការប្រែប្រួលតិចតួចបើប្រៀបធៀបនឹងត្រីមាសទី១ប៉ុន្តែទោះបីយ៉ាងណាក៏ដោយក៏តម្រូវការឃ្លាំងជួលនៅតែមានជាហូរហែដដែល ខណៈកាលពីត្រីមាសទី១តម្រូវការឃ្លាំងមានការកើនឡើងយ៉ាងច្រើន។ លោកបានប្រាប់ទៀតថា បច្ចុប្បន្នឃ្លាំងជួលនៅតាមបណ្តោយផ្លូវវេងស្រេង និងក្នុងខណ្ឌដង្កោមានតម្លៃប្រហែល២ដុល្លារចំណែកនៅបណ្តោយផ្លូវជាតិលេខ៤ដែលមានចម្ងាយប្រហែល១០គីឡូម៉ែត្រពីរាជធានីភ្នំពេញមានតម្លៃចន្លោះពី១,៨ទៅ២ដុល្លារអាមេរិក និងនៅក្នុងទីក្រុងម្តុំតំបន់ទួលគោកដែលមានឃ្លាំងប្រភេទតូចៗសម្រាប់ស្តុកទំនិញនោះមានតម្លៃចន្លោះពី៣ទៅ៤ដុល្លារក្នុងមួយម៉ែត្រការ៉េក្នុង១ខែ។ លោក គីមហ៊ាង នាយកក្រុមហ៊ុនអចលនទ្រព្យខ្មែរ បានយល់ឃើញស្រដៀងគ្នានឹងការលើកឡើងខាងលើដែរដោយលោកមានប្រសាសន៍ថា បច្ចុប្បន្ននេះតម្រូវការឃ្លាំងមិនសូវមានភាពរស់រវើកទេ បើទោះជាមានតែដីទំនេរធំៗច្រើននៅជាយក្រុងក៏ដោយ ខណៈតម្រូវការមានការកើនឡើងក្នុងរង្វង់៥ភាគរយក្នុង១ឆ្នាំ។ លោកបានថ្លែងថា៖«ផលវិបាកសម្រាប់ឃ្លាំងជួលនៅពេលនេះគឺអ្នកត្រូវការឃ្លាំងគេចង់បានឃ្លាំងដែលសង់រួចស្រាប់ៗតែម្ចាស់ដីភាគច្រើនគាត់មិនហ៊ានសង់ទុកនោះទេ ព្រោះខ្លាចគ្មានអ្នកជួល។ ដូច្នេះនៅពេលមានតម្រូវការទើបចាប់ផ្តើមសាងសង់ ហើយការសាងសង់អាចប្រើរយៈពេល៥ទៅ៦ខែដែលពេលនោះអ្វីៗអាចនឹងត្រូវហួសពេល»។ នាយកក្រុមហ៊ុនអចលនទ្រព្យខ្មែរ ខាងលើបានប្រាប់ទៀតថា ការស្វែងរកឃ្លាំងជួលនៅកណ្តាលរាជធានីភ្នំពេញពិតជាលំបាកខ្លាំងណាស់ជាពិសេសនៅម្តុំផ្សារអូឡាំពិក ដោយសារបច្ចុប្បន្នដីនៅតំបន់នោះមួយម៉ែត្រការ៉េមានតម្លៃចន្លោះពី២០០០ទៅ២៥០០ដុល្លាររួចទៅហើយ។ ម្ចាស់ដីនៅតំបន់នោះភាគច្រើនគេមិនចង់សង់ឃ្លាំងទុកជួលនោះទេព្រោះការសង់ឃ្លាំងមួយម៉ែត្រការ៉េអាចចំណាយប្រាក់អស់ពី១០០-១២០ដុល្លារ តែដល់ពេលជួលបានត្រឹមតែជាង២ដុល្លារប៉ុណ្ណោះក្នុងមួយការ៉េដូច្នេះគេត្រូវប្រើរយៈពេលរហូតដល់ប្រាំឆ្នាំទើបរួចខ្លួន។ ចំណែកលោក ខាត់សុវណ្ណប្រធានគ្រប់គ្រងទូទៅនៃក្រុមហ៊ុនអចលនទ្រព្យ ខេមថប បានយល់ឃើញផ្ទុយពីការលើកឡើងខាងលើ ដោយលោកអះអាងថា តម្រូវការឃ្លាំងជួលមានកំណើនខ្ពស់គួរសមព្រោះការផ្គត់ផ្គង់នៅពេលនេះមិនទាន់ឆ្លើយតបនឹងតម្រូវការបានទេ ដោយសារអ្នកវិនិយោគច្រើនមកពីប្រទេសចិន ជប៉ុន និងមកពីបណ្តាប្រទេសនៅប៉ែកអឺរ៉ុបចូលមកវិនិយោគនៅកម្ពុជាកាន់តែច្រើន។ លោកបានបន្តទៀតថា កាលពីចុងឆ្នាំ២០១២និងដើមឆ្នាំ២០១៣នេះតម្រូវការឃ្លាំងជួលភាគច្រើនមានទំហំ៥០០០ម៉ែត្រការ៉េចុះប៉ុន្តែបច្ចុប្បន្នតម្រូវការមានការប្រែប្រួលច្រើនជាងមុន ដោយអ្នកវិនិយោគភាគច្រើនគេត្រូវការឃ្លាំងដែលមានទំហំធំជាង១០០០០ម៉ែត្រការ៉េហើយនៅតាមបណ្តោយផ្លូវជាតិសំខាន់ៗ។ លោកបានអះអាងថា៖«តម្រូវការឃ្លាំងភាគច្រើនគ្របដណ្តប់នៅតាមបណ្តោយផ្លូវជាតិលេខ៤ លេខ៣និងលេខ២ដោយសារការដឹកជញ្ជូននៅតំបន់ទាំងនោះមានភាពងាយស្រួលនិងជាច្រកសេដ្ឋកិច្ចដ៏សំខាន់»។ លោកបន្តថា៖«តំបន់ជាយក្រុងតម្រូវការឃ្លាំងជួលមានកំណើនក្នុងរង្វង់១០ភាគរយក្នុង១ឆ្នាំនិងនៅក្នុងទីក្រុងតម្រូវការមានកាន់តែខ្ពស់ដោយអាចមានកំណើនចន្លោះពី១០ទៅ១៥ភាគរយ»។ លោក សុវណ្ណបានបន្តថាបើប្រៀបធៀបនឹងឆ្នាំ២០០៧-២០០៨មុនពេលមានវិបត្តិសេដ្ឋកិច្ចនិងហិរញ្ញវត្ថុសាកល ឃ្លាំងជួលមានតម្លៃជាមធ្យមចន្លោះពី១ទៅ១,៥ដុល្លារប៉ុន្តែពេលនេះតម្លៃមានចន្លោះពី១,៥ទៅ២ដុល្លារ៕
