សិង្ហបុរីៈ តម្លៃផ្ទះនៅប្រទេសសិង្ហបុរីបានកើនឡើងដល់កម្រិតខ្ពស់បំផុតនៅត្រីមាសទី២នេះដោយសារកំណើនតម្លៃផ្ទះនៅតំបន់ជាយក្រុងបានហក់ឡើងខ្ពស់ដោយជំរុញឲ្យរដ្ឋាភិបាលចាត់វិធានការថ្មីលើឥណទានទិញផ្ទះកាលពីចុងសប្តាហ៍កន្លងមក។ សន្ទស្សន៍តម្លៃលំនៅឋានស្នាក់នៅឯកជនរបស់ប្រទេសដែលស្ថិតនៅលើដីកោះនេះបានកើនឡើងពី០,៨ភាគរយក្នុងរយៈពេលបីខែដែលបានបញ្ចប់កាលពីថ្ងៃទី៣០ ខែមិថុនា និងបន្តកើនឡើងលើកំណើន០,៦ភាគរយកាលពីត្រីមាសទីមួយនេះបើយោងតាមការប៉ាន់ប្រមាណជាបឋមដែលចេញផ្សាយដោយអាជ្ញាធរផ្នែកអភិវឌ្ឍន៍ទីក្រុងកាលពីដើមសប្តាហ៍នេះ។ កំណើនតម្លៃផ្ទះនៅតំបន់ជាយក្រុងបានកើនឡើងជាង២ដងធៀបនឹងកំណើនថ្លៃនៅត្រីមាសទីមួយ។ តម្លៃផ្ទះខ្ពស់បំផុតនៅពេលដែលអត្រាការប្រាក់មានកម្រិតទាបបានជំរុញឲ្យមានក្តីបារម្ភពីកំណើនថ្លៃអចលនទ្រព្យ ដែលបានជំរុញឲ្យរដ្ឋាភិបាលសិង្ហបុរី បង្កើនយុទ្ធនាការក្នុងរយៈពេលបួនឆ្នាំកាលពីខែមករា ដើម្បីទប់ស្កាត់ការកើនឡើងនៃតម្លៃអចលនទ្រព្យនៅក្នុងប្រទេសដែលមានអចលនទ្រព្យថ្លៃជាងគេទីពីរនៅអាស៊ី។ កាលពីថ្ងៃទី២៨ ខែមិថុនា កន្លងមក ប្រទេសសិង្ហបុរី បានប្រកាសច្បាប់ថ្មីស្តីពីការគ្រប់គ្រងវិធីសាស្ត្រដែលគ្រឹះស្ថានហិរញ្ញវត្ថុផ្តល់កម្ចីទិញផ្ទះដល់អតិថិជនដោយបង្កើនកិច្ចខិតខំប្រឹងប្រែងទប់ស្កាត់កំណើនថ្លៃអចលនទ្រព្យខ្ពស់ពេក។ លោក Desmond Ch'ng និងលោក Wilson Liew អ្នកវិភាគប្រចាំក្រុមហ៊ុន Maybank Kim Eng Securities បានប្រាប់ឲ្យដឹងនៅក្នុងសេចក្តីជូនដំណឹងដល់អតិថិជនកាលពីដើមសប្តាហ៍នេះថា៖«នៅក្នុងរយៈពេលមធ្យម អាចមានផលប៉ះពាល់ជាអវិជ្ជមានមួយចំនួនទៅលើការលក់អចលនទ្រព្យដោយសារតែអតិថិជន ត្រូវចំណាយពេលវេលាពិចារណាទៅលើកម្រិតនៃផលប៉ះពាល់។ យើងនៅតែរក្សាទស្សនៈរបស់យើងថា ទីផ្សារលំនៅឋានដ៏ធំមានតម្លៃខ្ពស់បំផុតចំពោះការកាត់បន្ថយសម្ពាធថ្លៃ»។ ក្រុមអ្នកវិភាគ បានបន្តឲ្យដឹងថា ពួកគេពេញចិត្តចំពោះក្រុមហ៊ុនអភិវឌ្ឍន៍ដែលបានធ្វើពិពិធកម្ម(diversified) និងលក់រាយ។ រីឯតំបន់ជាងក្រុងក៏កំពុងរីកចម្រើនផងដែរ។ តម្លៃផ្ទះល្វែងបានធ្លាក់ចុះ០,២ភាគរយនៅតាមសង្កាត់ល្អក្នុងត្រីមាសទីពីរនេះ បើធៀបនឹងកំណើនថ្លៃ០,៤ភាគរយនៅត្រីមាសទីមួយ។ យោងតាមទិន្នន័យរបស់រដ្ឋាភិបាលសិង្ហបុរីកាលពីដើមសប្តាហ៍នេះ បានឲ្យដឹងថា តម្លៃផ្ទះនៅតំបន់ជាយក្រុងបានកើនឡើង៣ភាគរយនៅត្រីមាសទីពីរនេះ បើធៀបនឹងកំណើនថ្លៃ១,៤ភាគរយនៅត្រីមាសទីមួយ។ ភាគហ៊ុនរបស់ក្រុមហ៊ុនCapitaLand Ltd ដែលជាក្រុមហ៊ុនអភិវឌ្ឍន៍ធំជាងគេនៅសិង្ហបុរីបានធ្លាក់ចុះ ២ភាគរយ មកនៅត្រឹម៣,០២ដុល្លារសិង្ហបុរី ចំណែកភាគហ៊ុនរបស់ក្រុមហ៊ុន City Developments Ltd ដែលជាក្រុមហ៊ុនអចលនទ្រព្យធំជាងគេទីពីរនៅប្រទេសនេះ ក៏បានធ្លាក់ចុះ១,២ភាគរយផងដែរ៕ BP
