ភ្នំពេញៈ នៅអំឡុងពេលវិបត្តិនយោបាយក្នុងប្រទេសមិនទាន់មានភាពល្អប្រសើរ ១០០ ភាគរយនោះ កម្ពុជាក៏បានទទួលរងវិបត្តិថ្មីមួយបន្ថែមទៀត គឺទឹកជំនន់ដែលនេះហាក់បីដូចជាព្រនង់មួយយ៉ាងធំកំពុងវាយសំពងដល់វិស័យអចលនទ្រព្យនៅកម្ពុជា។ លោក គីម ហ៊ាង នាយកក្រុមហ៊ុន ខ្មែរ រៀលអេស្ទេត បានប្រាប់ថា សកម្មភាពទិញ លក់ អចលនទ្រព្យនៅក្នុងពេលនេះមានសភាពស្ងប់ស្ងាត់ ពីព្រោះតំបន់មួយចំនួនកំពុងក្លាយទៅជាបឹង។ លោកបានលើកជាសំណួរថា នៅពេលអតិថិជនទៅមើលទីតាំងលើកដំបូងទីនោះគឺជាដីស្ងួត ប៉ុន្តែនៅពេលនេះទីនោះបានក្លាយជាបឹងតើមានអ្នកណាហ៊ានទិញដីទីនោះទៀត? លោកប្រាប់ទៀតថា ទឹកជំនន់នៅពេលនេះបានធ្វើឲ្យមានផលប៉ះពាល់យ៉ាងខ្លាំងដល់វិស័យ អចលនទ្រព្យ ពីព្រោះផ្លូវធ្វើដំណើរជាច្រើនត្រូវខូចខាត។ នៅពេលនេះសូម្បីតែអ្នករស់នៅតាមបណ្តោយមហាវិថី ព្រះមុនីវង្ស ក្នុងរាជធានីភ្នំពេញក៏ចាប់ផ្តើមត្អូញត្អែរពីការកកស្ទះចរាចរណ៍ និងទឹកលិចផងដែរ។ លោកថ្លែងថា៖ «វិបត្តិទឹកជំនន់កំពុងប៉ះពាល់ដល់វិស័យអចលនទ្រព្យ ព្រោះពេលនេះគ្មានអ្នកណាចាប់អារម្មណ៍ទៅមើលដីទេ»។ លោក ឌឹត ចណ្ណា ប្រធានគ្រប់គ្រងទូទៅក្រុមហ៊ុនអចលនទ្រព្យ វីអឹមស៊ី បាននិយាយថា វិស័យអចលនទ្រព្យបានចាប់ផ្តើមទទួលផលប៉ះពាល់ពីវិបត្តិទឹកជំនន់ជាបណ្តើរៗហើយ។ សម្រាប់ទីតាំងក្នុងរាជធានីភ្នំពេញ ហាក់មិនសូវមានផលប៉ះពាល់ប៉ុន្មានទេ ប៉ុន្តែនៅតាមខេត្តកំពុងរងផលប៉ះពាល់ខ្លាំង ព្រោះផ្លូវគមនាគមន៍កំពុងជួបការលំបាក។ លោកបន្តថា ខណៈស្ថានភាពនយោបាយមិនទាន់ល្អប្រសើរ ស្របពេលគ្រោះទឹកជំនន់មកដល់នោះ វិស័យអចលនទ្រព្យពិតជាទទួលរងផលប៉ះពាល់ខ្លាំង ហើយពិបាកទស្សន៍ទាយថា នឹងប្រសើរឡើងវិញនៅពេលណានោះទេ ជាពិសេសបើស្ថានភាពនយោបាយនៅតែបន្តអូសបន្លាយបែបនេះយូរតទៅទៀតនោះ។ លោក ប៉ូ អ៊ាវគង់ ប្រធានគ្រប់គ្រងទូទៅក្រុមហ៊ុន អេស៊ា រៀល អេស្ទេត បានប្រាប់ថា វិបត្តិបានកើតឡើងផ្ទួនៗនៅកម្ពុជា ដោយវិបត្តិនយោបាយមិនទាន់ចប់ផង វិបត្តិទឹកជំនន់ក៏បានមកដល់តែទោះបីជាយ៉ាងណាវិបត្តិទឹកជំនន់មិនជ្រៅដូចវិបត្តិនយោបាយទេ។ លោកបន្តថា អ្នកទិញ លក់ ដីធ្លីមួយចំនួនរង់ចាំទឹកស្រក ហើយអតិថិជនរបស់លោកដែលមានបំណងទិញដីនៅផ្លូវជាតិ លេខ៦ ក៏បានផ្អាកសកម្មភាពផងដែរនាពេលនេះ។ ទាក់ទងទៅនឹងវិបត្តិ នយោបាយ និងទឹកជំនន់លោក អ៊ាវគង់ បានអះអាងថា៖ «ផលប៉ះពាល់នៃការទិញ លក់ នៅតែបន្តកើតមានបើទោះបីជារដ្ឋាភិបាលថ្មីកើតឡើងរួចទៅហើយ ក្តី តែបក្សមួយទៀតនៅតែតវ៉ាដែលធ្វើឲ្យអ្នកវិនិយោគមានការគិតច្រើន និងមិនទាន់មានជំនឿចិត្តទាំងស្រុងទេ»។ លោកបានបន្តថា៖ «ទោះបីជាយ៉ាងណាអ្នកវិនិយោគដែលមានមូលដ្ឋានគ្រឹះរឹងមាំនៅកម្ពុជានៅតែវិនិយោគដដែល លើកលែងតែអ្នកថ្មីដែលមិនទាន់ចូលមកវិនិយោគ»។ លោក គុយ វ៉ាត អគ្គនាយកក្រុមហ៊ុន VTrust Group បានប្រាប់ថា លោកមិនទាន់អាចវាយតម្លៃបានភ្លាមៗពីផលប៉ះពាល់ដោយសារទឹកជំនន់នេះនៅឡើយទេ ប៉ុន្តែអ្នកវិនិយោគពិតប្រាកដគេកំពុងចាប់យកឱកាសនេះ ព្រោះជាពេលដែលពួកគេងាយចរចាតម្លៃជាមួយម្ចាស់អចលនទ្រព្យ។ លោក ចេង ខេង អគ្គនាយកក្រុមហ៊ុនអចលនទ្រព្យ កម្ពុជា ស៊ីភីអិល និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍ថា វិបត្តិទឹកជំនន់ គឺជាក្តីបារម្ភដ៏ធំមួយសម្រាប់កម្ពុជា ព្រោះកន្លងមកនៅពេលមានទឹកជំនន់ដ៏ធំនៅប្រទេស ថៃ ប្រទេសកម្ពុជាមិនមានបញ្ហាអ្វីនោះទេ។ ប៉ុន្តែពេលនេះទឹកជំនន់កំពុងបង្កផលប៉ះពាល់ដល់កម្ពុជា ហើយ បើទោះបីជាមិនទាន់ប៉ះពាល់ដល់តំបន់ឧស្សាហកម្មនានាក៏ដោយ តែវិស័យកសិកម្មកំពុងរងផលប៉ះពាល់ហើយ។ លោកបានបញ្ជាក់ថា៖ «វិស័យអចលនទ្រព្យនៅពេលនេះបានរងផលប៉ះពាល់តិចតួចតែប៉ុណ្ណោះ ដោយសារនៅរាជធានីភ្នំពេញ និងតំបន់ឧស្សាហកម្មនានាមិនទទួលរងផលប៉ះពាល់ធ្ងន់ធ្ងរ»៕
