ភ្នំពេញៈ ការកសាងទីក្រុងរណបថ្មីៗនៅរាជធានី ភ្នំពេញ ការលិចទឹក និងការកកស្ទះចរាចរណ៍ក្នុងទីក្រុងសុទ្ធតែជាប្រធានបទដែលកំពុងតែកើតមានជារៀងរាល់ថ្ងៃនៅរាជធានីភ្នំពេញ។ដើម្បីស្វែងយល់និងដំណោះស្រាយចំពោះបញ្ហាខាងលើលោក ស៊ីវ ម៉េង អ្នកយកព័ត៌មានផ្នែកអចលនទ្រព្យនៃកាសែត ភ្នំពេញ ប៉ុស្តិ៍ បានជួបសម្ភាសជាមួយលោក បណ្ឌិត វ៉ាន់ វ៉ាត កាលពីពេលថ្មីៗនេះ។ លោក បណ្ឌិត វ៉ាន់ វ៉ាត គឺជាអ្នកឯកទេសផ្នែករៀបចំដែនដី ដែលបានបញ្ចប់ការសិក្សាថ្នាក់បណ្ឌិតជំនាន់ ទី១ នៅប្រទេស វៀតណាម ដោយបច្ចុប្បន្ននេះលោកមានតួនាទីជាអនុប្រធានមន្ទីររៀបចំដែនដី នគរូបនីយកម្ម និងសំណង់ ខេត្ត កណ្តាល និងជាប្រធានអង្គការនិស្សិតកម្ពុជាដើម្បីអភិវឌ្ឍន៍ស្ថាបត្យកម្ម សំណង់រៀបចំដែនដី និងប្រព័ន្ធព័ត៌មានភូមិសាស្រ្ត។ តើដំណើរអភិវឌ្ឍន៍របស់រាជធានីភ្នំពេញ នាពេលបច្ចុប្បន្នមានសភាពដូចម្តេច? សន្ទុះ នៃការអភិវឌ្ឍរបស់យើងនាពេលបច្ចុប្បន្ននៅមានការខ្វះខាតច្រើន ដោយសារយើងមានបញ្ហាចម្បងមួយគឺកង្វះការអនុវត្តច្បាប់ បើទោះបីមានសារាចរណែនាំ មានក្រមច្បាប់មួយចំនួនហើយក៏ដោយ ប៉ុន្តែនៅពេលអនុវត្តជាក់ស្តែង គឺយើងនៅមានចំណុចចន្លោះប្រហោងជាច្រើន។ ក្រៅពីនេះការពិនិត្យ វាយតម្លៃ គឺមានសារៈសំខាន់ណាស់ ក្នុងការអនុវត្តការងារជាក់ស្តែង ប្រសិនបើខ្លឹមសារអភិវឌ្ឍន៍របស់យើងមាន ១០ ចំណុច យើងត្រូវពិនិត្យមើលថា តើយើងធ្វើបានប៉ុន្មានចំណុច? ប្រសិនបើយើងធ្វើបានទាំងអស់ហើយ យើងត្រូវមើលទៀតថា តើមានគុណភាពប៉ុន្មានភាគរយ និងឆ្លើយតបនឹងគម្រោងផែនការបានប៉ុន្មានភាគរយ។ កង្វះខាតជាក់ស្តែងរបស់យើង វាមែនមកពីកង្វះខាតលើការអភិវឌ្ឍទីក្រុងនោះទេ តែគឺជាកង្វះខាតទៅលើការអនុវត្តតាមនីតិវិធីច្បាប់ និងបច្ចេកទេសដែលយើងមានស្រាប់។ ហេតុនេះយើងត្រូវពិនិត្យឡើងវិញទៅលើក្រមច្បាប់ និងគោលការណ៍ផ្សេងៗនៃការអភិវឌ្ឍទីក្រុងរបស់យើងថា តើវាបានឆ្លើយតបទៅនឹងអ្វីដែលមានក្នុងច្បាប់ ហើយឬនៅ? ប្រសិនបើមិនទាន់មានតើយើងត្រូវកែតម្រូវត្រង់ចំណុចណា និងត្រូវសំណូមពរឲ្យរាជរដ្ឋាភិបាលជួយលើចំណុចណាខ្លះ។ យើងគឺជាអ្នកជំនាញ ត្រូវមានតួនាទីរួមចំណែកសិក្សា និងស្វែងរកដំណោះស្រាយទៅតាមតម្រូវការជាក់ស្តែង។ ប្រសិនបើច្បាប់ខ្វះខាតយើងត្រូវផ្តល់គំនិតកែតម្រូវចំណុចណា និងបំពេញបន្ថែមចំណុចណាដើម្បីឲ្យយើងដើរទៅមុខទៀត ព្រោះយើងមិនមែនរស់នៅតែឯងនោះទេ គឺយើងរស់ក្នុងលំហមួយដែលមានការអភិវឌ្ឍខ្លួនយើងផង ក៏ដូចជាបង្ហាញអ្នកដទៃទទួលស្គាល់ថា យើងពិតជាបានរៀបចំប្រទេសយើងបានត្រឹមត្រូវ និងដើរតាមក្របខ័ណ្ឌនៃសំណាញ់ច្បាប់មួយច្បាស់លាស់។ ផ្ទៃដីភ្នំពេញបានពង្រីកបន្ថែមកាលពីប៉ុន្មានឆ្នាំថ្មីៗនេះ។ តើការពង្រីកនេះបានឆ្លើយតបនឹងល្បឿននៃការអភិវឌ្ឍរបស់ទីក្រុងយើង ឬទេ? តើវាបានផ្តល់ប្រយោជន៍បែបណាដល់ប្រជាពលរដ្ឋ? ការពង្រីក ឬការបង្រួមក្នុងន័យផែនការវាមិនសំខាន់ទេ អ្វីដែលសំខាន់ត្រង់ថា តើ ស្ថាប័នដែលគ្រប់គ្រងដែនដីនោះបានរៀបចំផែនការច្បាស់លាស់ហើយ ឬនៅ? ហេតុនេះការរីក ឬរួម គ្រាន់តែជាផែនការមួយប៉ុណ្ណោះ ប៉ុន្តែដែនដីដែលយើងរស់នៅ និងដែនដីដែលបានរៀបចំឲ្យមានបែបផែនរដ្ឋបាលនេះ តើយើងគ្រប់គ្រងវាឲ្យមានផែនការច្បាស់លាស់សម្រាប់អភិវឌ្ឍន៍ ជាទូទៅតាមសក្តានុពលនៃភូមិសាស្រ្ត ធនធានធម្មជាតិ កំណើនប្រជាពលរដ្ឋ និងតាមចរន្តនៃការអភិវឌ្ឍ ជាតិ និងអន្តរជាតិដែរ ឬទេ? ដូច្នេះការពង្រីក ឬការបង្រួមទីក្រុង គឺវាកើតចេញអំពីតម្រូវការនៃការអភិវឌ្ឍសម្រាប់ប្រទេសជាតិ និងតំបន់នីមួយៗនៃការរីកលូតលាស់ផ្នែកនគរូបនីយកម្ម។ ដូច្នេះតាមលក្ខណៈបច្ចេកទេសកាលណាទីក្រុងមួយមានទំហំកាន់តែធំ វាមិនដែលត្រូវបង្រួមវិញនោះទេ ព្រោះទីក្រុងមានប្រជាជនកើនឡើងច្រើន ហើយតម្រូវការនៃការអភិវឌ្ឍក៏កាន់តែកើនដែរ ពេលនោះគឺរដ្ឋាភិបាលត្រូវតែពង្រីកទីក្រុង ដូចជារាជធានីភ្នំពេញយើងដែលបានពង្រីកបន្ថែមក្នុងរយៈពេលថ្មីៗ កន្លងមកនេះ។ នៅភ្នំពេញមានទីក្រុងរណបថ្មីៗបង្កើតឡើងជាច្រើន។ តើការអភិវឌ្ឍបែបនេះល្អដែរឬទេ? តើអាចមានបញ្ហាប្រឈមអ្វីខ្លះ? វា ជាសំណួរសំខាន់ដែលប្រទេសយើងកំពុងជួបប្រទះ។ ក្នុងក្រមច្បាប់របស់យើងបានចែងអំពីបឹងធម្មជាតិ ព្រៃឈើ សព្វបែបយ៉ាងដែលជាសម្បត្តិធម្មជាតិសាធារណៈរបស់រដ្ឋ ហើយច្បាប់របស់យើងក៏បានហាមឃាត់ក្នុងការលុប ឬកាប់បំផ្លាញសម្បត្តិធម្មជាតិទាំងអស់នោះផងដែរ។ អ៊ីចឹងអ្វីដែលខ្ញុំលើកឡើងនៅទីនេះ គឺការអនុវត្តច្បាប់ និងការពិនិត្យច្បាប់ចាស់ៗដែលមានស្រាប់ដើម្បីយកមកអនុវត្ត។ ប្រសិនបើយើងអនុវត្តតាមច្បាប់ទាំងអស់នោះ វានឹងជួយធ្វើឲ្យយើងងាយគេចផុតពីបញ្ហាផ្សេងៗបាន។ ការ អភិវឌ្ឍទីក្រុងរណបនៅរាជធានីភ្នំពេញ គឺជារឿងល្អ ប្រសិនបើមានអ្នកវិនិយោគគាត់មកអភិវឌ្ឍ ប៉ុន្តែយើងក៏ត្រូវសិក្សាអំពីតម្រូវការជាក់ស្តែងរបស់ប្រជាពលរដ្ឋ និងតម្រូវការអភិវឌ្ឍន៍ជាក់ស្តែងរបស់កម្ពុជាផងដែរ។ ប្រសិនបើយើងមិនបានសិក្សាអំពីតម្រូវការនៃការអភិវឌ្ឍរបស់ប្រជាពលរដ្ឋ អំពីចក្ខុវិស័យ យុទ្ធសាស្រ្ត ផែនការសកម្មភាព ថវិកាសម្រាប់គាំទ្រការអនុវត្តគម្រោង និងការតាមដានវាយតម្លៃរបស់រដ្ឋាភិបាលថាតើក្នុងអំឡុងពេល ៥ ឬ ១០ ឆ្នាំ ឬលើសពីនេះទៀតយើងត្រូវធ្វើអ្វីខ្លះទៅលើដីធ្លីនោះទេ វាប្រាកដជានឹងមានបញ្ហាកើតឡើងជាមិនខានសម្រាប់ពេលបច្ចុប្បន្ន និងអនាគត។ ផ្ទុយទៅវិញបើយើងមានផែនការលំហច្បាស់លាស់ ហើយយើងយកផែនការនោះផ្សព្វផ្សាយបង្ហាញដល់អ្នកវិនិយោគថា កន្លែងនេះរដ្ឋាភិបាលមានផែនការទុកសម្រាប់ធ្វើអ្វីមួយជាក់លាក់នោះអ្វីៗនឹងមានភាពប្រសើរ។ អ្នកវិនិយោគដែលមានបំណងវិនិយោគលើវិស័យណាមួយពួកគេនឹងមានទំនុកចិត្តក្នុងការសម្រេចចិត្តដើម្បីអភិវឌ្ឍនៅតាមតំបន់នីមួយៗតាមផែនការដីធ្លីដែលរដ្ឋាភិបាលបានបែងចែក និងអនុម័តរួច។ ដូច្នេះការរៀបចំឲ្យមានប្លង់ និងតំបន់អភិវឌ្ឍន៍ជាក់លាក់ គឺពិតជាមានផលប្រយោជន៍សំខាន់សម្រាប់ប្រជាពលរដ្ឋ អ្នកវិនិយោគ និងរដ្ឋាភិបាល។ តើគម្រោងអភិវឌ្ឍន៍ទីក្រុងរណបទាំងនោះបានដើរតាមរចនាសម្ព័ន្ធដែនដី និងគោរពបទដ្ឋានបរិស្ថានច្បាស់លាស់ ឬទេ? ការ កំណត់តំបន់អភិវឌ្ឍន៍គឺក្រសួងរៀបចំដែនដី នគរូបនីយកម្ម និងសំណង់ និងសាលារាជធានី ភ្នំពេញ បានរៀបចំឲ្យមានការកំណត់កម្ពស់សំណង់អគារផងដែរ។ ហេតុនេះជាគំនិតរបស់ខ្ញុំរាល់សំណុំបែបបទដែលក្រុមហ៊ុនអភិវឌ្ឍន៍នីមួយៗ បានស្នើសុំទៅស្ថាប័នជំនាញអ្នកជំនាញនឹងសិក្សាមើលថា តើការអភិវឌ្ឍនោះនឹងមានផលប្រយោជន៍អ្វីដល់សង្គមជាតិ ហើយរក្សាបាននូវបរិស្ថានកម្រិតណា និងមានផលប៉ះពាល់កម្រិតណា ព្រមទាំងផ្តល់ផលប្រយោជន៍កម្រិតណាដល់ប្រជាជន និងប្រទេសជាតិ? ប៉ុន្មាន ឆ្នាំចុងក្រោយនេះនៅភ្នំពេញ មានការកសាងអគារខ្ពស់ៗជាច្រើន។ តើការអភិវឌ្ឍបែបនេះអាចមានផលប៉ះពាល់ផ្នែកបរិស្ថានដែរ ឬទេ? ប្រទេស យើងស្ថិតក្នុងភាពក្រីក្រ ហេតុនេះការអភិវឌ្ឍសំណង់ គឺយើងនៅយឺតជាងគេឆ្ងាយណាស់ដោយសារប្រទេសយើងនៅមានបញ្ហាផ្នែកកង្វះថវិកា ប៉ុន្តែទោះបីយ៉ាងណាយើងបានសង្កេតឃើញថា ទសវត្សរ៍ចុងក្រោយនេះប្រទេសយើងមានសន្ទុះអភិវឌ្ឍន៍ផ្នែកអចលនទ្រព្យ យ៉ាងខ្លាំង។ មានអគារខ្ពស់ៗជាច្រើនត្រូវបានគេសាងសង់ក្នុងរាជធានីភ្នំពេញ ខណៈរាជធានីភ្នំពេញរបស់យើងរហូតមកដល់ពេលនេះនៅមិនទាន់មានការ អនុម័តប្លង់គោលនៅឡើយទេ ប៉ុន្តែទោះបីយ៉ាងណាពង្រាងប្លង់គោលរាជធានីភ្នំពេញដល់ឆ្នាំ ២០២០ បាននិងកំពុងត្រូវបានគេអនុវត្តក្នុងចរន្តអន្តរកាលនេះ។ ការសាងសង់អគារខ្ពស់ៗនៅប្រទេសមួយចំនួនដែលមានការអភិវឌ្ឍ គេមានស្តង់ដារបច្ចេកទេសទាក់ទងនឹងស្តង់ដារកម្មបច្ចេកទេសមួយនៃផលប៉ះពាល់បរិស្ថាន។ ឧទាហរណ៍ មុននឹងសាងសង់អគារមួយគេត្រូវគិតគូរថា តើសំណង់មួយនោះនឹងមានផលប៉ះពាល់បរិស្ថាន សង្គម និងវប្បធម៌កម្រិតណា ខណៈកម្ពុជាកំពុងមានការខ្វះខាត? ផលប៉ះពាល់ដល់បរិស្ថាននៃសំណង់ដែលសង់គឺពិតជាមានបញ្ហាច្រើន។ ហេតុនេះប្រសិនបើយើងមានបទប្បញ្ញត្តិជាផ្លូវច្បាប់គ្រប់គ្រងបញ្ហា នេះជាការល្អប្រសើរណាស់។ នេះជាបញ្ហាដែលរដ្ឋាភិបាលគួរពិនិត្យនូវការងារនេះឡើងវិញ ដើម្បីធ្វើឲ្យវិស័យសំណង់ និងការរៀបចំដែនដីនៅកម្ពុជា ធានាបាននូវស្តង់ដារបច្ចេកទេសត្រឹមត្រូវ និងរក្សាបាននូវផលប៉ះពាល់បរិស្ថាន សង្គម និងវប្បធម៌នាក្នុងសម័យសាកលភាវូបនីយកម្ម។ នៅស្រុកគេអ្នកមានសង់អគារខ្ពស់ៗបង្អួតគ្នា តែប្រទេសយើងនៅក្រីក្រ ដូច្នេះយើងគួរសង់អ្វីដែលសមស្របតាមវប្បធម៌ និងតាមរចនាប័ទ្មរបស់យើង។ បើយើងសង់តាមអេកូធម្មជាតិ តាមបែបផែនវប្បធម៌ដូនតារបស់យើង គឺវាអាចទាក់ទាញភ្ញៀវទេសចរបរទេសឲ្យចូលមកទស្សនានៅប្រទេសយើង បន្ថែមទៀតផងដែរ។ តើការមានអគារខ្ពស់ និងទំនើបៗអាចជាការគំរាមកំហែងដល់អត្តសញ្ញាណស្ថាបត្យកម្មជាតិរបស់យើងដែរ ឬទេ? ការគំរាមកំហែងពិតជាមាន ប៉ុន្តែមិនរហូតដល់កម្រិតដែលយើងបោះបង់ទាំងស្រុងនូវអ្វីដែលជា របស់យើងទេ។ យើងរស់នៅលើផែនដីតែមួយ ដូច្នេះការទទួលឥទ្ធិពលពីគ្នាទៅវិញទៅមកពិតជាមាន។ ភ្នំពេញកំពុងប្រឈមនឹងការកកស្ទះចរាចរណ៍កាន់តែខ្លាំង និងទឹកលិចនៅពេលភ្លៀងធ្លាក់តើយើងគួរដោះស្រាយបែបណា? បញ្ហា កកស្ទះចរាចរណ៍ គឺទាំងប្រជាជន អ្នករកស៊ី អ្នកវិនិយោគ គឺសុទ្ធគេមិនពេញចិត្តចំពោះបញ្ហាទាំងអស់នេះ។ ការកកស្ទះចរាចរណ៍ គឺកើតចេញកង្វះផែនការលំហគិតទុកមុន ការអនុវត្តច្បាប់ពាក់ព័ន្ធនិងចរាចរណ៍នៅមានកម្រិតកង្វះខាតការថែទាំប្រព័ន្ធហេដ្ឋារចនាសម្ព័ន្ធ និងកង្វះខាតទាក់ទងនឹងការយល់ដឹងពីគ្រោះធម្មជាតិជាដើម។ ចំណុចមួយទៀតគឺការមិនបានគិតគូរមុនឲ្យបានច្បាស់ទាក់ទងទៅនឹង កំណើនប្រជាជនក្នុងទីក្រុង សេវាកម្មលក់ដូរខ្វះសណ្តាប់ធ្នាប់ ទំហំផ្លូវ និងបរិមាណយានយន្តដែលយើងនាំចូលមក តើវាស៊ីចង្វាក់គ្នាទៅនឹងចលនានៃចំនួនប្រជាជនក្នុងទីក្រុងដែរ ឬទេ? យើងក៏ត្រូវពិនិត្យមើលថា តើស្ថានភាពសេដ្ឋកិច្ចរបស់ប្រជាជនខ្មែរស៊ីគ្នាទៅនឹងកំណើននៃការ ទិញរថយន្តដែរ ឬទេ។ ការលក់ ឬការចតរថយន្តរបស់ប្រជាជននៅលើចិញ្ចើមថ្នល់វាមិនមែនជាកំហុសរបស់ប្រជាជនទាំងស្រុងនោះទេ តែវាជាកំហុសនៃការចូលរួមគោរពច្បាប់ផងដែរ។ ហេតុនេះដើម្បីកុំឲ្យប្រជាជនលក់ដូរលើចិញ្ចើមផ្លូវ យើងត្រូវគ្រប់គ្រង និងរៀបចំបង្កើតឲ្យមានផ្សារសមរម្យ ដើម្បីឲ្យប្រជាជនមានកន្លែងលក់ដូរត្រឹមត្រូវ។ ចំណុចមួយទៀតគឺទាក់ទង នឹងផ្នត់គំនិតរបស់ប្រជាជនដែលថា លក់អីទាល់តែដាក់តាមចិញ្ចើមផ្លូវទើបលក់ឆាប់ដាច់ គំនិតនេះនឹងផ្លាស់ប្តូរ ប្រសិនបើមានការគិតគូរឡើងវិញ។ តើការអភិវឌ្ឍបែបណាដែលអាចធ្វើឲ្យប្រជាជនទទួលបានផល ដោយមិនបង្កផលប៉ះពាល់ដល់បរិស្ថាន ហើយសមស្របនឹងរចនាសម្ព័ន្ធដែនដីទីក្រុងរបស់យើង? ដើម្បីធ្វើការងារនេះបានជោគជ័យយើងមានការងារ ៤ ដែលត្រូវធ្វើ ទី១ ការអភិវឌ្ឍត្រូវតែមានផែនការដីធ្លីត្រឹមត្រូវ ដោយផ្សារភ្ជាប់ជាមួយផែនការអន្តរវិស័យទាំងអស់។ ទី២ ការអនុវត្តផែនការនោះត្រូវឲ្យមានការគាំទ្រពីរដ្ឋាភិបាលនិង ប្រជាជន។ទី៣ រាជរដ្ឋាភិបាលត្រូវវិនិយោគលើគម្រោងប្លង់ដែលបានកសាង និងត្រូវមានការលើកទឹកចិត្តដល់អ្នកវិនិយោគ និង ទី៤ ការកសាង និងអនុវត្តផែនការត្រូវស្របតាមស្តង់ដារបច្ចេកទេស និងមានតុល្យភាពពេញលេញ។ ការធ្វើបែបនេះខ្ញុំគិតថាប្រជាជននឹងមានទំនុកចិត្ត ហើយនៅពេលនោះសេដ្ឋកិច្ចនឹងរីកចម្រើន ដែលអាចកាត់បន្ថយគម្លាតអ្នកមាន និងអ្នកក្រ ជនបទ និងទីក្រុងទៀតផង។ ការអភិវឌ្ឍដែលធ្វើតាមផែនការ គឺមិនមែនធ្វើតែនៅរាជធានីភ្នំពេញ មួយនោះទេ គឺទាមទារឲ្យមានការសិក្សាទូទាំងប្រទេសទាំងមូលតែម្តង ដើម្បីធ្វើឲ្យការអភិវឌ្ឍនៅតាមតំបន់នីមួយៗ នៅកម្ពុជាមានផែនការកម្មច្បាស់លាស់ និងប្រកបដោយតុល្យភាពនៃការរីកលូតលាស់ និងដើម្បីទប់លំហូររបស់ប្រជាជនពីតំបន់ជនបទចូលមកកាន់រាជធានី ភ្នំពេញផងដែរ៕ PoskKhmer.com
