ភ្នំពេញៈ សាលាខេត្ត កណ្តាល ដោយមានការគាំទ្រផ្នែកបច្ចេកទេសពីអង្គការ GIZ នៅពេលនេះកំពុងធ្វើការសិក្សារៀបចំប្លង់គោលសម្រាប់ក្រុង តាខ្មៅ និងស្រុក ស្អាង ដើម្បីធ្វើឲ្យការប្រើប្រាស់ដីធ្លីកាន់តែមានភាពប្លោក បណ្ឌិត វ៉ាន់ វ៉ាត អនុប្រធានមន្ទីរ រៀបចំដែនដី នគរូបនីយកម្ម សំណង់ និងសុរិយោដី ខេត្ត កណ្តាល ប្រាប់ ប៉ុស្តិ៍ អចលនទ្រព្យ កាលពីពេលថ្មីៗនេះថា តាមរយៈអនុក្រឹត្យលេខ ៧៧ អនក្រ.បក ចុះថ្ងៃ ទី០៧ ខែ មិថុនា ឆ្នាំ ២០១២ ស្តីពីការបង្កើតគណៈកម្មាធិការរៀបចំដែនដី និងនគរូបនីយកម្ម ថ្នាក់រាជធានី ខេត្ត ក្រុង ស្រុក ខណ្ឌ និងបទដ្ឋានគតិយុត្តិពាក់ព័ន្ធនានា សាលាខេត្ត កណ្តាល បានរៀបចំឲ្យមានគណៈកម្មាធិការរៀបចំដែនដី និងនគរូបនីយកម្ម របស់ខេត្ត កណ្តាល ក្រុង តាខ្មៅ ស្រុក ស្អាង និងនៅស្រុក កណ្តាលស្ទឹង។ លោកបន្តថា ដោយមានការគាំទ្រ និងយកចិត្តទុកដាក់យ៉ាងខ្លាំងពីលោកអភិបាលខេត្ត កណ្តាល ទើបជំរុញឲ្យមានការអនុម័តលើគម្រោងថវិកាសម្រាប់កសាងប្លង់គោល ក្រុង តាខ្មៅ និងស្រុក ស្អាង ហើយជាមួយគ្នានេះក្រុង តាខ្មៅ ក៏ទទួលបានការសហការគាំទ្របន្ថែមពីដៃគូអភិវឌ្ឍន៍ GIZ ផងដែរ។ លោកថ្លែងថា៖ «ការរៀបចំប្លង់គោលប្រើប្រាស់ដីធ្លី គឺជាផែនការគោលដើម្បីអភិវឌ្ឍលើគ្រប់វិស័យទាំងអស់ដូច្នេះរាល់តម្រូវការដីធ្លីនៃការប្រើប្រាស់ទាំងអស់ចាំបាច់ត្រូវដើរតាមផែនការដីធ្លីមួយ ដែលមានការកំណត់ប្រភេទប្រើប្រាស់ដីជាក់លាក់ជាមុនសិន ទើបអាចធ្វើឲ្យការគ្រប់គ្រង និងការប្រើប្រាស់ដីនោះធានាបាននូវប្រសិទ្ធភាពខ្ពស់»។ លោកបានបន្តទៀតថា៖ «ក្រសួងរៀបចំដែនដី នគរូបនីយកម្ម និងសំណង់ បានដើរតួនាទីជាអ្នកសម្របសម្រួលស្នូលកណ្តាលនៃគ្រប់វិស័យពាក់ព័ន្ធទាំងអស់ដើម្បីជួយសម្រួលឲ្យមានការរៀបចំផែនការដីធ្លីនៅគ្រប់កម្រិតថ្នាក់ សំដៅធានាបាននូវការអភិវឌ្ឍសេដ្ឋកិច្ចសង្គម និងការពារបាននូវបរិស្ថានធនធានធម្មជាតិជានិរន្តរ៍»។ លោក បណ្ឌិត វ៉ាន់ វ៉ាត បានប្រាប់ទៀតថា សេចក្តីព្រាងប្លង់គោល ស្រុក/ក្រុង ដែលមាន ៩ ជំហាននោះ គេកំណត់ច្បាស់លាស់ដោយក្រុង តាខ្មៅ និងស្រុក ស្អាង។ពេលនេះបានអនុវត្តបញ្ចប់ជំហាន ទី១ គឺការផ្សព្វផ្សាយគម្រោង និងការចុះសិក្សាទីតាំងហើយ ដោយបច្ចុប្បន្នកំពុងដំណើរការជំហាន ទី២ គឺការចុះប្រមូលទិន្នន័យ ព័ត៌មាន និងកំណត់ព្រំប្រទល់។ លោកបានបន្តថា ប្រជាពលរដ្ឋបានកើនឡើងជាលំដាប់ តែដីធ្លីគឺនៅដដែលហេតុនេះនៅពេលចំនួនមនុស្សកើនឡើងនាំឲ្យតម្រូវការប្រើប្រាស់ដី និងសេវាកម្មផ្សេងៗមានការកើនឡើងដែរ។ ដូច្នេះប្រសិនបើមិនអាចជួយប្រជាជនឲ្យប្រើប្រាស់ដីធ្លីបានសមស្របទេនោះ នឹងធ្វើឲ្យមានបញ្ហាប្រឈមជាច្រើនដែលមានដូចជា ទី១ ការកកស្ទះចរាចរណ៍ដោយសារផ្លូវតូចចង្អៀត ទី២ មានទឹកជំនន់ខ្លាំងដោយសារខ្វះបណ្តាញរំដោះទឹក ទី៣ ការបំពុលបរិស្ថានដោយសារខ្វះប្រព័ន្ធគ្រប់គ្រងបរិស្ថានសមស្រប និង ទី៤ សំណង់មិនរៀបរយដោយសារខ្វះការយល់ដឹង និងអនុវត្តច្បាប់ឲ្យបានល្អ។ លោកបានអះអាងថា៖ «ប្រសិនបើយើងមានផែនការច្បាស់លាស់ហើយ តែគ្មានគម្រោងគាំទ្រអនុវត្តជាក់ស្តែងទេនោះ ផែនការរបស់យើងដែលបានកសាងរួចរាល់នោះនឹងគ្មានន័យអ្វីឡើយ។ ដូច្នេះផែនការដែលយើងបានកសាងរួចហើយនោះ គឺទាមទារឲ្យមានថវិកាសម្រាប់វិនិយោគផងដែរ»។ លោកបន្តថា៖ «តាមគម្រោងការកសាងប្លង់គោលក្រុង តាខ្មៅ និងស្រុក ស្អាង ចាប់ផ្តើមពីឆ្នាំ ២០១៣ ដល់ឆ្នាំ ២០១៥ ហើយសន្ទុះលំនាំនៃការកសាងនេះវាអាស្រ័យលើការគាំទ្រថវិកាគាំទ្រ ការយកចិត្តទុកដាក់របស់ថ្នាក់ដឹកនាំខេត្ត ក្រុង ស្រុក និងអ្នកពាក់ព័ន្ធទាំងអស់ ប៉ុន្តែបើគ្មានការគាំទ្រច្រើនទេ ពេលវេលានឹងអាចពន្យារពេលតទៅទៀត»។ លោក ផៃ ប៊ុនឈឿន អភិបាលខេត្ត កណ្តាល បានថ្លែងថា ខេត្ត កណ្តាល បានរៀបចំសិក្ខាសាលាមួយស្តីអំពីការរៀបចំការសិក្សាប្លង់គោល ដើម្បីបែងចែកប្រភេទដីតាមតំបន់ៗ ដូចជាដីសម្រាប់កសិកម្ម ដីសម្រាប់ពាណិជ្ជកម្ម ឬដីសម្រាប់កសាងហេដ្ឋារចនាសម្ព័ន្ធដទៃទៀតឲ្យបានច្បាស់លាស់។ នៅពេលសិក្សាចប់ អាជ្ញាធរនឹងផ្សព្វផ្សាយឲ្យប្រជាជនបានចូលរួម និងបានដឹងពីសារៈសំខាន់នៃការរៀបចំប្លង់គោល។ លោកបានប្រាប់ទៀតថា កន្លងមកសាលាខេត្ត កណ្តាល បានរៀបចំធ្វើនៅក្រុង តាខ្មៅ មួយជំហានរួចហើយ ដោយគេបានធ្វើប្រព័ន្ធរំដោះទឹកភ្លៀងដែលជួយធ្វើឲ្យក្រុង តាខ្មៅ នាឆ្នាំ ២០១៣ នេះគេចផុតពីគ្រោះទឹកជំនន់។ លោកមានប្រសាសន៍ថា៖ «ក្រោយពេលសិក្សាចប់ខ្ញុំនឹងផ្សព្វផ្សាយពីការរៀបចំនេះ តាមរយៈវេទិកាសាធារណៈក្នុងខេត្តដើម្បីឲ្យប្រជាជនបានដឹង និងចូលរួម»។ គម្រោងនេះបានប្រើប្រាស់ថវិកាជាតិមួយផ្នែក និងមានការគាំទ្របច្ចេកទេសពីអង្គការ GIZ ផងដែរ។ លោក ប៉ូច សោភ័ណ អនុប្រធានគម្រោងសិទ្ធិលើដីធ្លីនៃអង្គការ GIZ បានប្រាប់ថា អង្គការ GIZ បានជួយគាំទ្របច្ចេកទេស និងទីប្រឹក្សា ប៉ុន្តែមិនជួយថវិកាសម្រាប់ការរៀបចំប្លង់គោលនេះនោះទេ។ លោក ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងលោក ប៊ុណ្ណា រិទ្ធិ ប្រធាននាយកដ្ឋានរៀបចំដែនដី បានបដិសេធមិនអត្ថាធិប្បាយនោះទេ៕
