ភ្នំពេញៈ បន្ទាប់ពីទទួលជោគជ័យជាបន្តបន្ទាប់នៅលើគម្រោងអភិវឌ្ឍន៍លំនៅឋាន របស់ខ្លួនរួចមកពេលនេះក្រុមហ៊ុនអភិវឌ្ឍន៍បុរី ៩៩៩ បានចាប់ផ្តើមបើកការដ្ឋានសាងសង់ផ្សារទំនើប និងខុនដូកម្ពស់ ១៥ ជាន់មួយទៀត ដែលសលោកស្រី ឌួង ថាវរី ប្រធានផ្នែកលក់គម្រោងសាងសង់ខុនដូ និងផ្សារទំនើប បុរី ៩៩៩ បានប្រាប់ឲ្យដឹងថា បច្ចុប្បន្នក្រុមហ៊ុនអភិវឌ្ឍន៍បុរី ៩៩៩ កំពុងរៀបចំសាងសង់ផ្សារទំនើបកម្ពស់ ៤ ជាន់ និងខុនដូថ្មីមួយ ដោយគ្រោងចំណាយពេលសាងសង់ ៤៨ ខែ ហើយគ្រោងនឹងដាក់ឲ្យដំណើរការនៅអំឡុងចុងឆ្នាំ ២០១៧ ខាងមុខ។ លោកស្រីបានប្រាប់ទៀតថា ការលក់របស់ក្រុមហ៊ុនបុរី ៩៩៩ នាពេលកន្លងមកតែងទទួលបានជោគជ័យ ដូច្នេះការលក់របស់គម្រោងថ្មីលើនឹងមិនមានបញ្ហាអ្វីនោះទេ។ លោកស្រីបានថ្លែងថា៖ «ខ្ញុំរំពឹងថា ការលក់របស់គម្រោងខាងលើនឹងទទួលបានជោគជ័យ ពីព្រោះការលក់របស់គម្រោងមុនៗរបស់ក្រុមហ៊ុនអភិវឌ្ឍន៍លំនៅឋាន បុរី ៩៩៩ តែងទទួលបានជោគជ័យ។ កត្តាដែលធ្វើឲ្យការលក់របស់ក្រុមហ៊ុនទទួលជោគជ័យ គឺដោយសារសំណង់របស់បុរី ៩៩៩ តែងមានគុណភាពល្អ និងមានតម្លៃថោកសមរម្យ ហើយការដ្ឋានរបស់យើងបានប្រើប្រាស់វិស្វករសុទ្ធតែមានជំនាញច្បាស់លាស់មកពីប្រទេស សិង្ហបុរី និងម៉ាឡេស៊ី»។ តូបក្នុងផ្សារទំនើប ដែលមានកម្ពស់ ៤ ជាន់ក្នុងគម្រោងខាងលើមានតម្លៃចាប់ពី ២០.០០០ ដល់ ៣៦.០០០ ដុល្លារ រីឯបន្ទប់ស្ថិតក្នុង ខុនដូ ខាងលើមានតម្លៃចាប់ពី ៥០.០០០ ដល់ ៦៨.០០០ ដុល្លារក្នុងមួយយូនីត។ លោកស្រី ថាវរី បានប្រាប់ទៀតថា អតិថិជនដែលទិញតូបក្នុងផ្សារទំនើប ឬផ្ទះនៅក្នុង ខុនដូ ខាងលើ ក៏អាចទទួលបានប្រាក់កម្ចីពីធនាគារ BIDC ផងដែរ។ ទោះបីយ៉ាងណា លោកស្រីមិនអាចបញ្ជាក់ពីចំនួនទុនវិនិយោគរបស់គម្រោងនេះបានទេ។ លោក ប៉ូ អ៊ាវគង់ ប្រធានគ្រប់គ្រងទូទៅក្រុមហ៊ុនអចលនទ្រព្យ អេស៊ា រៀល អេស្ទេត បានអះអាងថា ការបង្កើតផ្សារទំនើបនៅជិតខុនដូ គឺជាការលើកគម្រោង ដើម្បីបង្កើននូវភាពទាក់ទាញសម្រាប់អតិថិជនចំពោះគម្រោងអភិវឌ្ឍន៍ របស់ខ្លួនប៉ុណ្ណោះ ពីព្រោះនៅក្បែរនោះមានផ្សារទំនើប សុវណ្ណា រួចទៅហើយ ខណៈផ្សារទំនើប សុវណ្ណា នៅពេលនេះក៏មាននៅសល់តូបទំនេរច្រើនដែរ។ លោកបានបញ្ជាក់ថា៖ «គម្រោងមួយទទួលបានជោគជ័យ ឬបរាជ័យ គឺអាស្រ័យទៅលើគុណភាពសំណង់ថា ទទួលបានទំនុកចិត្តពីអតិថិជនកម្រិតណា និងតម្លៃរបស់វាមានភាពសមរម្យដែរឬទេ? តែប្រសិនបើគម្រោងខាងលើលក់ក្នុងតម្លៃដូចការអះអាងខាងលើមែននោះ ខ្ញុំគិតថា គម្រោងខាងលើនឹងទទួលបានជោគជ័យ ប្រសិនបើផ្ទះទាំងនោះមានទំហំចាប់ពី ៣០ ទៅ ៤០ ម៉ែត្រការ៉េឡើងទៅ»។ លោកបានបន្តថា៖ «ទីផ្សារ ខុនដូ នៅកម្ពុជានៅពេលនេះមិនទាន់មានបញ្ហានោះទេ ប្រសិនបើលក់ក្នុងតម្លៃល្អបែបនេះ ព្រោះគម្រោងថ្មីរបស់ក្រុមហ៊ុនបុរី ៩៩៩ នេះមានទីតាំងស្ថិតនៅចំកន្លែងល្អ»។ ទោះបីជាយ៉ាងណាអ្នកជំនាញរូបនេះបានផ្តល់អនុសាសន៍ឲ្យអ្នកអភិវឌ្ឍន៍ ខុនដូ នានាគួរគិតគូរអំពីទីតាំងជាចម្បងផងដែរ ព្រោះបើវានៅតាមផ្លូវធំមានរថយន្តតូចធំឆ្លងកាត់ច្រើននោះ គឺវាអាចបង្កឲ្យមានការរំខានដល់ការស្នាក់នៅរបស់អតិថិជន។ លោកលើកសំណួរថា ហេតុអ្វីបានជាតំបន់ បឹងកេងកង ១ មានភាពទាក់ទាញ? ព្រោះនៅទីនោះមានភាពស្ងប់ស្ងាត់ល្អមិនមានសំឡេងរំខានពីយានយន្ត និងកត្តាមួយចំនួនទៀត៕
