ភ្នំពេញៈ បន្ទាប់ពីបានដំណើរការអស់រយៈពេល ២ឆ្នាំ ប្រកបដោយភាពជោគជ័យរួចមក សមាគមអ្នកសាងសង់កម្ពុជា (Cambodia Constructors Association)កាលពីថ្ងៃអង្គារ ទី១២ ខែ វិច្ឆិកា កន្លងមក បានរៀបចំធ្វើមហាសន្និបាតលើក ទីលោក ពុង ឃាវសែ ប្រធានសមាគមអ្នកសាងសង់កម្ពុជា បាននិយាយថា វាជាមោទនភាពយ៉ាងខ្លាំងដែលសមាគមអ្នកសាងសង់កម្ពុជា បានរៀបចំធ្វើអង្គមហាសន្និបាតលើក ទី២ និងពិធីដាក់បង្ហាញផលិតផលសម្ភារ និងសេវាកម្មសំណង់នៅពេលនេះ។ លោកបានប្រាប់ទៀតថា មុននឹងឈានមកដល់ពេលនេះសមាគមអ្នកសាងសង់កម្ពុជាបានជួបនឹងបញ្ហា ប្រឈមជាច្រើន ប៉ុន្តែដោយសារមានកិច្ចខិតខំប្រឹងប្រែង និងកិច្ចសហការយ៉ាងល្អពីបណ្តាសមាជិក និងស្ថាប័នពាក់ព័ន្ធនានាទើបសមាគមមានដំណើរការល្អបានដូចពេលនេះ ដោយរហូតមកដល់ពេលនេះសមាគមអ្នកសាងសង់កម្ពុជា មានក្រុមហ៊ុនជាសមាជិកចំនួន ៥០ ខណៈមានក្រុមហ៊ុនសាងសង់ជាច្រើនទៀតនៅមិនទាន់បានចុះឈ្មោះជាសមាជិករបស់សមាគម។ ក្នុងឱកាសនោះប្រធានសមាគមអ្នកសាងសង់កម្ពុជាបានថ្លែងថា៖ «ខ្ញុំសូមធ្វើការអំពាវនាវដល់ក្រុមហ៊ុន ទាំងអស់ដែលបានចូលរួមក្នុងអង្គសន្និបាតលើកទី២ នៅថ្ងៃនេះ សូមអញ្ជើញមកចុះឈ្មោះចូលជាសមាជិករបស់សមាគមអ្នកសាងសង់កម្ពុជាឲ្យបានច្រើនបន្ថែមទៀត»។ លោក អ៊ឹម ឈុនលឹម រដ្ឋមន្ត្រីក្រសួង រៀបចំដែនដី នគរូបនីយកម្ម និងសំណង់ មានប្រសាសន៍ថា ការប្រារព្ធធ្វើអង្គសន្និបាតនៅពេលនេះ គឺជាសមិទ្ធផលការងារដ៏សំខាន់ដែលឆ្លុះបញ្ចាំងពីការដំណើរការ និងសមិទ្ធផលដែលសមាគមសម្រេចបានក្នុងរយៈពេល ២ឆ្នាំ កន្លងមក។ ជាក់ស្តែងសមាគមបានកសាងទំនាក់ទំនងយ៉ាងល្អប្រសើរក្នុងឋានៈជាដៃគូ របស់ស្ថាប័នក្នុងរាជរដ្ឋាភិបាល ជាមួយស្ថាប័នជាតិ អន្តរជាតិរហូតបានក្លាយជាសមាជិកនៃសមាគមអ្នកសាងសង់អាស៊ាន។ លោក អ៊ឹម ឈុនលឹម បានថ្លែងថា៖ «អង្គសន្និបាតរបស់សមាគមអ្នកសាងសង់កម្ពុជានៅពេលនេះនឹងក្លាយទៅជាវេទិកាមួយដ៏មានសារៈសំខាន់សម្រាប់សមាជិកសមាគម ក៏ដូចជាសម្រាប់វិស័យសំណង់ទាំងមូលក្នុងគោលដៅធ្វើឲ្យវិស័យសំណង់វិវឌ្ឍស្របតាមសម័យកាល និងកាន់តែប្រសើរឡើងស្របតាមស្តង់ដារជាតិ និងអន្តរជាតិ»។ បច្ចុប្បន្ន សមាគមអ្នកសាងសង់កម្ពុជា មានក្រុមហ៊ុនជាសមាជិកចំនួន ៥០ ដែលក្រុមហ៊ុនទាំងនោះមានដូចជា ក្រុមហ៊ុនសាងសង់ក្រុមហ៊ុនសិក្សាគម្រោងប្លង់ ស្ពាន ថ្នល់ ផ្លូវរថភ្លើង អាកាសយានដ្ឋាន ក្រុមហ៊ុនផ្គត់ផ្គង់សម្ភារបរិក្ខារអគ្គិសនី ទឹក ម៉ាស៊ីនត្រជាក់ និងក្រុមហ៊ុនធានារ៉ាប់រងជាដើម។ សមាគមអ្នកសាងសង់កម្ពុជាត្រូវ បានបង្កើនជាផ្លូវការ កាលពីថ្ងៃ ទី១៦ ខែ វិច្ឆិកា ឆ្នាំ ២០១១ ក្នុងគោលបំណងដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការអនុវត្តគោលនយោបាយទាក់ទងទៅនិងវិស័យសំណង់ ធ្វើកិច្ចសហការជាមួយផ្នែកពាក់ព័ន្ធទាំងក្នុងប្រទេស និងក្រៅប្រទេស។ សមាគមអ្នកសាងសង់កម្ពុជានេះបានក្លាយជាសមាជិកនៃសហព័ន្ធអ្នកសាងសង់អាស៊ាន នាថ្ងៃ ទី០៦ ខែ ធ្នូ ឆ្នាំ ២០១១៕ Source : Phnom Penh Post
