ភ្នំពេញៈ សោភណភាពរាជធានីភ្នំពេញនឹងរឹតតែមានភាពទាក់ទាញបន្ថែមទៀតនៅពេល អគារភ្លោះខ្ពស់កប់ពពកកម្ពស់ ៤៥ ជាន់បញ្ចប់ការសាងសង់នារយៈពេលបី ឬបួនឆ្នាំខាងមុខ។លោក ស៊ឹង ប៊ុណ្ណា អគ្គនាយកក្រុមហ៊ុន ប៊ុណ្ណា រៀលធី គ្រុប បានប្រាប់ថា ក្រុមហ៊ុន The Bridge ដែលមានទីតាំងនៅប្រទេស សិង្ហបុរី នឹងសាងសង់អគារភ្លោះកម្ពស់ ៤៥ ជាន់ នៅដំណាច់ឆ្នាំ ២០១៣ នេះឬដើមឆ្នាំ ២០១៤ ខាងមុខ ដោយពេលនេះក្រុមហ៊ុនកំពុងសុំច្បាប់អនុញ្ញាតសាងសង់ពីក្រសួង រៀបចំ ដែនដី នគរូបនីយកម្ម និងសំណង់។ លោកបានបន្តថា អគារនេះនឹងប្រើប្រាស់ជាខុនដូស្នាក់នៅ អគារការិយាល័យ និងផ្សារទំនើប។ ទោះបីជាយ៉ាងណា លោកមិនបានបញ្ជាក់លម្អិតអំពីគម្រោងនិងទំហំទឹកប្រាក់ដែលត្រូវវិនិយោគក្នុងគម្រោងនេះទេ។ លោកបានអះអាងថា៖ «គម្រោងនេះមិនមែនជារបស់ក្រុមហ៊ុនខ្ញុំនោះទេ ខ្ញុំគ្មានប្រាក់ច្រើនបែបនេះទេ តែវាគឺជាគម្រោងរបស់អតិថិជនខ្ញុំ»។ ទីតាំងរបស់អគារនេះស្ថិតនៅភាគខាងត្បូងស្ថានទូត អូស្រ្តាលី ប្រចាំកម្ពុជាគឺនៅក្នុងសង្កាត់ទន្លេ បាសាក់ ខណ្ឌ ចំការមន រាជធានី ភ្នំពេញ។ លោក នួន រិទ្ធី នាយកគ្រប់គ្រងក្រុមហ៊ុន ប៊ុណ្ណា រៀលធីគ្រុប បាននិយាយថា តាមអ្វីដែលលោកដឹង គឺម្ចាស់គម្រោងនេះកំពុងសិក្សា និងរៀបចំយុទ្ធសាស្រ្តដើម្បីលក់គម្រោងរបស់ខ្លួននាពេលអនាគត។ លោកបានបន្តទៀតថា ទីតាំងសាងសង់អគារពាណិជ្ជកម្មនេះបានទទួលការចាប់អារម្មណ៍ច្រើន ពីព្រោះជាតំបន់ប្រមូលផ្តុំទៅដោយសេវាកម្មចម្រុះជាច្រើន ម៉្យាងទៀតនៅទីនោះក៏មានបរិស្ថាន និងខ្យល់អាកាសល្អផងដែរ។ លោកអះអាងថា៖ «គម្រោងនេះនឹងទទួលជោគជ័យ ដោយសារមានកត្តាសំខាន់ៗជាច្រើនដូចជា មានទីតាំងស្ថិតនៅចំកណ្តាលរាជធានីភ្នំពេញ មានបរិស្ថានជុំវិញល្អ ជាតំបន់មានហុងស៊ុយល្អ នៅជិតកន្លែងធ្វើការ និងជាតំបន់លំនៅឋានជាប់ចំណាត់ថ្នាក់ល្អលេខ ១ ទៀតផង»។ បច្ចុប្បន្ននៅតំបន់ជាប់មាត់ទន្លេបាសាក់ក្នុងសង្កាត់ ទន្លេបាសាក់ កំពុងរីកព្រោងព្រាតទៅដោយអគារខ្ពស់ៗដូចជា អគារធំនៅទីក្រុង កោះពេជ្រ អគារស្នាក់នៅរួម Rose Condo គម្រោងសាងសង់ខុនដូ Riviera (កោះពេជ្រ), ខុនដូ CASA Mederian សំណង់សណ្ឋាគារ Toyoko Inn របស់អ្នកវិនិយោគ ជប៉ុន និងខុនដូ Bali Scenery ជាដើម។ លោក គីម ហ៊ាង នាយកក្រុមហ៊ុន ខ្មែរ អចលនទ្រព្យ បានប្រាប់ថា គម្រោងសាងសង់អគារខ្ពស់កប់ពពកខាងលើជាគម្រោងល្អ ពីព្រោះស្ថិតនៅតំបន់ដីល្អលេខ ១ នៅរាជធានីភ្នំពេញ។ លោកបានបន្តថា តាមគម្រោងអគារភ្លោះខាងលើនឹងត្រូវប្រើប្រាស់សម្រាប់វិស័យ ចម្រុះជាច្រើន ដូច្នេះវានឹងទទួលបានជោគជ័យ។ ទីតាំងរបស់គម្រោងសាងសង់អគារភ្លោះកម្ពស់ ៤៥ ជាន់នេះស្ថិតនៅលើដីទំហំ ១,៥ ហិកតា ហើយការសាងសង់អគារនេះ គឺដើម្បីត្រៀមទទួលស្វាគមន៍ភ្ញៀវទេសចរ និងអ្នកវិនិយោគដែលនឹងចូលមកប្រទេសកម្ពុជា នៅពេលកម្ពុជាធ្វើសមាហរណកម្មសេដ្ឋកិច្ចជាមួយបណ្តាប្រទេសក្នុងតំបន់អាស៊ាន នាចុងឆ្នាំ ២០១៥ ខាងមុខ។ លោកស្រី លីវ រតនា ជំនួយការរបស់លោក សៀ រិទ្ធី អគ្គនាយកក្រុមហ៊ុន The Bridge ដែលជាអ្នកអភិវឌ្ឍន៍គម្រោងខាងលើបានបដិសេធផ្តល់ព័ត៌មាន៕ Source : Phnom Penh Post
